မအူပင်မြို့နယ်၊ ဘီးလင်းကျေးရွာတွင် အသက် ၇ နှစ် အရွယ် ၊ နှစ်တန်းကျောင်းသူတစ်ဦး အသတ်ခံရ


မအူပင်၊ ဇူလိုင် ၂၀ ။

ဧရာဝတီတိုင်းဒေသကြီး၊ မအူပင်မြို့နယ်၊ ဘီးလင်းကျေးရွာ၊ အခြေခံပညာမူလတန်းကျောင်းမှ အသက် ၇ နှစ်အရွယ် နှစ်တန်းကျောင်းသူတစ်ဦး ယနေ့ ဇူလိုင်လ ၂၀ရက်နေ့ နံနက် ၉နာရီကျော်အချိန်ခန့်တွင် အသတ်ခံခဲ့ရကြောင်း အဆိုပါကျောင်းသူလေး ပညာသင်ယူနေသည့် ဘီးလင်းကျေးရွာ၊ အခြေခံပညာမူလတန်းကျောင်းမှ ကျောင်းဆရာတစ်ဦးက AHNသို့ပြောသည်။

“ကျွန်တော့်ကိုရွာသူ၊ ရွာသားတွေက ကျောင်းသူအလောင်းတွေ့လို့ လာခေါ်တယ်။ အဲဒါနဲ့ ကျွန်တော်လိုက်သွားတော့ ကျွန်တော်တို့ကျောင်းက နှစ်တန်းတက်ရောက်နေတဲ့ ကျောင်းသူ လေးဖြစ်နေတာကိုတွေ့ရတယ်။ သူကမနက်ကတောင်ကျောင်းကို လာသေးတယ်။ လွယ်အိတ်လေးထားပြီး ရွာထဲမှာရှိတဲ့ မုန့်ဆိုင်ကို မုန့်သွားဝယ်စားတာလမ်းမှာရှိတဲ့ခြံအကျယ်ကြီးရဲ့ အနောက်ဘက်အစပ် လယ်ကွင်းထဲမှာအသတ်ခံရတာ။ သူ့အိမ်ကပြောတာတော့ ကလေးမှာနားကွင်းတစ်စုံဝတ်ဆင်ထားတယ်လို့ပြောတယ်။ ဒါပေမယ့် သေဆုံးနေချိန်မှာတော့ နားကွင်းမရှိဘူး။ လည်ပင်းမှာတော့ ပွန်းပဲ့ဒါဏ်ရာတော့တွေ့တယ်။ နောက်ပြီး ကလေးသေဆုံးတဲ့နားမှာ အအေးပုလင်း(အဆီပုလင်း)အခွံနဲ့ ထည့်ထားတဲ့ အရက်ပုလင်းလည်းတွေ့ရတယ်။ ကျောင်းနဲ့ သေဆုံးတဲ့နေရာနဲ့တော့ ပေ၄၀၀လောက်ကွာပါတယ်”ဟု ၄င်းကပြောသည်။

ကျောင်းသူလေးမှာ သေဆုံးချိန်တွင် ကျောင်းဝတ်စုံ အဖြူ၊ အစိမ်းကို ၀တ်ဆင်ထားကြောင်းလည်း ၄င်းကဆိုသည်။

လူသတ်တရားခံကို အချိန်နှင့်တပြေးညီဖမ်းဆီးနိုင်ရေးအတွက်ဆောင်ရွက်လျက်ရှိကြောင်း မအူပင်မြို့နယ်ကျွဲဒုံးနယ်မြေရဲစခန်းမှ စခန်းမှူး ရဲအုပ် မြင့်ဇော်ကပြောသည်။

“ကျွန်တော်တို့ကို ရွာက တာဝန်ရှိ သူတွေမကြောင်းကြားပြီးချက်ချင်းပဲ အခင်းဖြစ်တဲ့နေရာကိုသွားပြီး မှတ်တမ်းယူခဲ့ပါတယ်။ပြီးတော့မအူပင်ပြည်သူဆေးရုံကြီးကို ပို့ခဲ့ပါတယ်။အခုချိန်ထိတော့ တရားခံမမိသေးပါဘူး။တရားခံကိုအချိန်နှင့်တပြေးညီဖမ်းဆီးရမိဖို့ဆောင်ရွက်နေပါတယ်။သေဆုံးသူရဲ့ဖခင်က တရားလိုပြုလုပ်တိုင်တန်းထားလို့ ပုဒ်မ ၃၀၂/၃၉၂နဲ့အမှုဖွင့်ထားပါတယ် “ဟုစခန်းမှူး ရဲအုပ် မြင့်ဇော်က ယနေ့နေ့လယ်ပိုင်းတွင်ပြောသည်။

ပြည့်ဖြိုးပိုင်( AHN – MUB)
The Asia Heart News
မအူပင်မြို့နယ်၊ ဘီးလင်းကျေးရွာတွင် အသက် ၇ နှစ် အရွယ် ၊ နှစ်တန်းကျောင်းသူတစ်ဦး အသတ်ခံရ  မအူပင်မြို့နယ်၊ ဘီးလင်းကျေးရွာတွင် အသက် ၇ နှစ် အရွယ် ၊ နှစ်တန်းကျောင်းသူတစ်ဦး အသတ်ခံရ Reviewed by THITHTOOLWIN on 17:30 Rating: 5
Powered by Blogger.