စစ်တွေမြို့နယ်မှ အများပြည်သူ အသုံးပြုနေသည့် လမ်းကို တပ်ထိန်း တပ်ရင်းမှ သံတံခါးလုပ်ပြီး ပိတ်ဆို့မှု အပေါ် တပ်မတော်လူကြီးများ ဖြေရှင်းပေးစေလို

နိရဉ္စရာ၊ ဇူလိူင် ၂၅

စစ်တွေမြို့နယ် ကန်တော်ကြီး အနီးရှိ သင်္ဂနက် ကျေးရွာသားများ စစ်တွေမြို့နှင့် အသွားအလာပြုနေသည့် လမ်းကို အမှတ် (၈၆၈) တပ်ထိန်းတပ်ရင်းမှ တံခါးလုပ်ပြီး ပိတ်ထားသဖြင့် ကျေးရွာသူ ကျေးရွာသားများ အနေဖြင့် သွားရေးလာရေး အထူးအခက်အခဲ ဖြစ်ပေါ်လျက်ရှိကြောင်း သိရသည်။

“ ကျွန်တော်တို့ ဒီလမ်းကို ခေတ်အဆက်ဆက် အသုံးပြုလာတာပါ။ ပုံမှာ မြင်တဲ့ အတိုင်းဘဲ လမ်းကို သံတံခါးလုပ်ပြီး သွားလာလို့ မရအောင်ပိတ်ဆို့ထားတယ်။ လွန်ခဲ့တဲ့လ ဇွန် ၂၄ ရက်နေ့ကတည်းက စပိတ်ထားလိုက်တာပါ။ အမှတ် (၈၆၈) တပ်ထိန်း တပ်ရင်းမှူး ဟိန်းဇံမြင့် ဆိုသူရဲ့ အမိန့်နဲ့ ပိတ်တာလို့ သိရပါတယ်”ဟု ကျေးရွာသား တစ်ဦးက ပြောဆိုသည်။

ယခုကဲ့သို့ လမ်းကို သံတံခါးဖြင့် ပိတ်ဆို့ထားသဖြင့် ကျောင်းသူကျောင်းသားများ အနေဖြင့် ကျောင်းတက်ရာတွင် အခက်အခဲများ ကျရောက်နေသလို နေ့တဓူဝ စစ်တွေမြို့သို့ သွားလာနေကြရသည့် ကျေးရွာသားများ အနေဖြင့်လည်း သွားလာရာတွင် အခက်အခဲများ ဖြစ်ပေါ်နေသည်ဟု ဆိုသည်။

“ အဓိကတော့ သူတို့ တပ်ရင်းက သိမ်းထားတဲ့ လယ်တွေကို ကျွန်တော်တို့ ရွာသားတွေကို ပြန်ပေးလိုက်ရတဲ့ အပေါ် မကျေနပ်လို့ လုပ်တာပါ။ အဲဒီလမ်းဟာ တပ်ထိန်း တပ်ရင်းနဲ့ လည်း မဆိုင်ပါဘူး။ လမ်းဘေးမှာတော့ တပ်ထိန်း တပ်ရင်းက အိမ်တစ်ချို့ ရှိတာပေါ့။ ဒါပေမယ့် ဒီလမ်းနဲ့တော့ အလွတ်ကြီးပါ” ဟု ပြောဆိုသည်။

အဆိုပါ ကိစ္စနှင့် ပတ်သက်ပြီး စစ်တွေ အခြေစိုက် ဒကစမှူးရုံးသို့လည်း တိုင်ကြားထားပြီး ဖြေရှင်းပေးမည်ဟု ဆိုသော်လည်း ယနေ့ထိ ဖြေရှင်း ပေးခြင်း မရှိသဖြင့် မီဒီယာသို့ အကြောင်းကြားရခြင်း ဖြစ်ကြောင်း ပြောဆိုသည်။

“ ကျွန်တော်တို့ တောင်းဆိုလိုပါတယ်။ ရခိုင်ပြည်နယ် ၀န်ကြီးချုပ် ဦးညီပု အပါအ၀င် တပ်မတော်က လူကြီးတွေ ဒီလို ဖြစ်နေတာကို မြေပြင်ကို လာရောက်စစ်ဆေးကြစေလိုပါတယ်။ အများပြည်သူ လမ်းပေါ်မှာ သံတံခါးလုပ်ပြီး ပိတ်ဆို့ထားတာဟာ လုပ်သင့် မလုပ်သင့်ဆိုတာကို လာရောက်ကြည့်ကြပါ” ဟု ရပ်ရွာလူကြီး တစ်ဦးကလည်း ပြောဆိုသည်။

သင်္ဂနက် ကျေးရွာသည် အိမ်ခြေ ၃၀၀ ကျော် ၄၀၀ ပါးခန့်ရှိသည့် ရွာကြီး တစ်ရွာဖြစ်ပြီး ယခုကဲ့သို့ တပ်ထိန်း တပ်ရင်းမှ လမ်းကို ပိတ်ဆို့ထားသဖြင့် ဂေါက်ကွင်းကို ပတ်ပြီး စစ်တွေမြို့သို့ သွားလာနေကြရသည်ဟု သိရသည်။

ယခုကိစ္စနှင့် ပတ်သက်ပြီး စစ်တွေမြို့ ဒကစ ရုံးသို့ ယနေ့ မွန်းလွဲ ၂ နာရီခန့်က ဖုန်းဆက်သော်လည်း ဖုန်းကိုင် ဖြေဆိုခြင်း မရှိပါ။

Narinjara
https://www.facebook.com/Narinjara