ထားဝယ်မှာ ကြက်ငှက် တုပ်ကွေး ဖြစ်ပွား

တနင်္သာရီတိုင်းဒေသကြီး ထားဝယ်မြို့က ကြက်ခြံတစ်ခြံမှာ ကြက်ငှက်တုပ်ကွေးရောဂါ (H5N1) ဖြစ်ပွားနေတဲ့ အတွက် ကြက်ဥနဲ့ ကြက်သား ဖြန့်ဖြူးရောင်းချမှုတွေ မလုပ်ဖို့ မနေ့ကစပြီး တားမြစ် လိုက်ပါတယ်။

ရောဂါကို ထိန်းချုပ်နိုင်ဖို့အတွက် တိုင်းဒေသကြီးအစိုးရအဖွဲ့ လမ်းညွှန်ချက်အတိုင်း ဆောင်ရွက် သွားမယ်လို့ တနင်္သာရီတိုင်းဒေသကြီး မွေးမြူရေးနဲ့ ကုသရေးဦးစီးဌာန ညွှန်ကြားရေးမှူး ဒေါက်တာဥာဏ်လင်း က ပြောပါတယ်။

ပြီးခဲ့တဲ့ဇူလိုင်လ ၁၆ ရက်နေ့ကစပြီး ထားဝယ်မြို့ ၀ဲကျွန်းထိန်သစ်ရပ်ကွက်မှာရှိတဲ့ ကြက်ခြံတချို့မှာ မွေးမြူထားတဲ့ ကြက်တွေ ထောင်ချီသေဆုံးခဲ့တာကြောင့် ရန်ကုန်မြို့မှာရှိတဲ့ ဓာတ်ခွဲခန်းကိုပေးပို့ပြီး ဓာတ်ခွဲစစ်ဆေးပြီးနောက် ကြက်ငှက်တုပ်ကွေး H5N1 ဖြစ်တယ်ဆိုတာကလို အတည်ပြုလိုက်တာ ဖြစ်ပါတယ်။

ဒီနေ့မှာ ကြက်ငှက်တုပ်ကွေးဖြစ်ပွားနေတဲ့ ကြက်ခြံတွေက ကြက်တွေကို ရှင်းလင်းတာတွေ ပြုလုပ်နေပါတယ်။

ကြက်ငှက်တုပ်ကွေးရောဂါဟာ မြန်မာနိုင်ငံမှာ ၂၀၀၆ ခုနှစ်ကစပြီးဖြစ်ပွားခဲ့ရာ ၂၀၁၆ ခုနှစ်အထိ စုစုပေါင်း ၈ ကြိမ်ဖြစ်ပွားခဲ့တယ်လို့ မွေးမြူရေးနဲ့ ကုသရေးဦးစီးဌာနက သတင်းထုတ်ပြန်ထားပါတယ်။

RFA Burmese
http://www.rfa.org/burmese