မတရားအသင်း ဆက်သွယ်မှုနဲ့ ဖမ်းဆီးခံ သတင်းထောက်တွေ တရားရုံးပြောင်းစစ်ဆေးမယ်

ဖမ်းဆီးခံထားရတဲ့ သတင်းထောက် (၃) ဦး။ ဓာတ်ပုံ- လ၀ီဝမ်ဖေ့ဘုပ်

တအာင်းပလောင် တပ်ဖွဲ့ TNLA နယ်မြေမှာကျင်းပတဲ့ မူးယစ်ဆေးဝါး တိုက်ဖျက်ရေးနေ့ အခမ်းအနားကို သွားရောက်ခဲ့ပြီး အပြန် နမ့်ဆန်မြို့နယ်ထဲမှာ ဖမ်းဆီးခံခဲ့ရတဲ့ သတင်းထောက်တွေကို မူလ စီစဉ်ထားတဲ့ နမ့်ဆန်မြို့နယ် တရားရုံးမှာ ရုံးထုတ်စစ်ဆေးဖြစ်မှာမဟုတ်ပဲ သီပေါမြို့နယ် တရားရုံးမှာပဲ ရုံးထုတ်စစ်ဆေးသွားမှာဖြစ်တယ်လို့ သတင်းထောက်တွေရဲ့ ရှေ့နေ ဖြစ်သူက ပြောပါတယ်။

မူလက ရုံးထုတ်စစ်ဆေးဖို့ စီစဉ်ထားတဲ့ နမ့်ဆန်မြို့မှာ သွားရောက်ရုံးထုတ်ဖို့ လမ်းပန်းဆက်သွယ်ရေးနဲ့ လုံခြုံရေးအခက်အခဲတွေ ရှိနေတာကြောင့် ရုံးပြောင်းစစ်ဆေးပေးဖို့ ကျောက်မဲခရိုင်တရားရုံးကို လျှောက်ထားခဲ့ရာမှာ သီပေါမြို့နယ် တရားရုံးမှာ ပြောင်းရွှေ့ စစ်ဆေးဖို့ ဇူလိုင်လ ၁၂ ရက်နေ့က အမိန့်ချမှတ်လိုက်တာလို့ သတင်းထောက်တွေရဲ့ ရှေ့နေ ဖြစ်တဲ့ ဒေါ်ခင်မိမိက ဘီဘီစီကို ပြောပါတယ်။

ဧရာဝတီ သတင်းဌာနက ဦးသိန်းဇော် ( ခ) လ၀ီဝမ် ၊ ဒီဗီဘီ သတင်းဌာနမှ အကြီးတန်းသတင်းထောက် ဦးအေးနိုင် ၊ ဦးပြည့်ဘုန်းနိုင်တို့ဟာ ဇွန်လ ၂၆ ရက်နေ့က TNLA အဖွဲ့က ပြုလုပ်တဲ့ မူးယစ်ဆေးဝါး မီးရှို့ဖျက်ဆီးမှု အခမ်းအနားကို သတင်းယူပြီးအပြန် နမ့်ဆန် - သီပေါကားလမ်းပေါ်မှာ တပ်မတော်စစ်ကြောင်းရဲ့ ဖမ်းဆီးမှုကို ခံခဲ့ရတာဖြစ်ပါတယ်။ အဲဒီ သတင်းထောက်တွေကို မတရားအသင်းဆက်သွယ်မှု ပုဒ်မ ၁၇ (၁) နဲ့ အမှုဖွင့်ထားပြီး သီပေါအကျဉ်းထောင်မှာ ထိန်းသိမ်းထားတာလည်း ဖြစ်ပါတယ်။

ဘီဘီစီမြန်မာပိုင်း
BBC Burmese
https://www.facebook.com/bbcburmese/