တရားမ၀င်သစ်ထုတ်လို့ သစ်တောပြုန်းတီးဟုဆို

တရားဝင် သစ်တောထွက်ပစ္စည်းများ ဥပဒေနှင့်အညီ ကူးသန်းရောင်းဝယ်ဖွံ့ဖြိုးရေးဆိုင်ရာ ကောင်းမွန်သော သစ်တောစီမံအုပ်ချုပ်လုပ်ကိုင်မှု တိုးမြင့်ဆောင်ရွက်ခြင်း " FLEGT-VPA အလုပ်ရုံဆွေးနွေးပွဲကို မေလ ၃၁ ရက်နေ့က မြစ်ကြီးနားမြို့ မြို့တော်ခန်းမမှာ ကျင်းပစဉ်။ Photo: Kyaw Myo Min/ RFA

တရားမဝင်သစ်အလွန်အကျွံ ထုတ်လုပ်ရောင်းဝယ်မှုတွေဟာ သစ်တောပြုန်းတီးမှုကိုဖြစ်စေတဲ့ အကြောင်းတွေထဲ မှာ အဓိက အခန်းကဏ္ဍကပါဝင်နေတယ်လို့ ကချင်ပြည်နယ်ဝန်ကြီးချုပ် ဒေါက်တာခက်အောင်က ပြောလိုက် ပါတယ်။

မြစ်ကြီးနားမြို့ မြို့တော်ခန်းမမှာ ဒီကနေ့ပြုလုပ်တဲ့ " တရားဝင် သစ်တောထွက်ပစ္စည်းများ ဥပဒေနှင့်အညီ ကူးသန်းရောင်းဝယ်ဖွံ့ဖြိုးရေးဆိုင်ရာ ကောင်းမွန်သော သစ်တောစီမံ အုပ်ချုပ်လုပ်ကိုင်မှု တိုးမြင့်ဆောင်ရွက်ခြင်း " FLEGT အခမ်းအနားမှာ ဒေါက်တာခက်အောက်က အဲဒီလိုထည့်သွင်းပြောခဲ့တာပါ။

သစ်တွေကို အလွန်အကျွံထုတ်ယူမှုတွေကြောင့် အကျိုးဆက်အနေနဲ့ သဘာဝပတ်ဝန်းကျင် ထိခိုက်ပျက်စီးမှု၊ လူမှုစီးပွားထိခိုက်မှု၊ အကျင့်ပျက်ခြစားမှုတွေနဲ့ အတူ နိုင်ငံတော်ကလည်း အခွန်ဝင်ငွေတွေထိခိုက်နစ်နာစေတယ် လို့ဆိုပါတယ်။

ဒါ့အပြင် သစ်ထုတ်လုပ်ရေးတွေနဲ့ ဆက်စပ်ပြီး စီးပွားရေးလက်ဝါးကြီးအုပ်လိုတဲ့ဆန္ဒနဲ့ မြေယာရယူ မှုတွေကြောင့် ဒေသခံဋ္ဌာနေတိုင်းရင်းသားတွေ ရဲ့မူလရပိုင်ခွင့်အခွင့်အရေးတွေ ဆုံးရှုံးနေရတယ်လို့ လည်း ဒေါက်တာခက်အောင်က ပြောပါတယ်။

" တရားဝင် သစ်တောထွက်ပစ္စည်းများ ဥပဒေနှင့်အညီ ကူးသန်းရောင်းဝယ်ဖွံ့ဖြိုးရေးဆိုင်ရာ ကောင်းမွန်သော သစ်တောစီမံအုပ်ချုပ်လုပ်ကိုင်မှု တိုးမြင့်ဆောင် ရွက်ခြင်း " FLEGT ကို ဥရောပသမဂ္ဂ EU က ဆောင်ရွက် တာဖြစ်ပါတယ်။

မြန်မာနိုင်ငံအနေနဲ့ ဥရောပသမဂ္ဂကို သစ်တင်ပို့ရောင်းချမယ်ဆိုရင် " နှစ်နိုင်ငံမိတ်ဖက်သဘောတူ သစ်ကုန်သွယ်ရေးစာချုပ် " VPA ( Voluntary Partnership Agreement ) ကို ချုပ်ဆိုရမှာဖြစ်ပါတယ်။

အဲဒီလို FLEGT-VPA လုပ်ငန်းစဉ်အတိုင်းဆောင်ရွက်မယ်ဆိုရင် တရားဝင်သစ်ဖြစ်ကြောင်း အာမခံနိုင်ခြင်း၊ သစ်ထောက်ပံ့ရေးစနစ်ကို ခြေရာခံတဲ့ စနစ်ဖော်ထုတ်နိုင်ခြင်း နဲ့ သစ်တောကဏ္ဍ စီမံအုပ်ချုပ်မှုကို တိုးတက်ကောင်းမွန်လာနိုင်ခြင်းစတဲ့ရလဒ်တွေကို ရရှိစေမယ်လို့ ဆိုပါတယ်။

ဒီကနေ့ပြုလုပ်တဲ့ အလုပ်ရုံဆွေးနွေးပွဲကို သစ်တောဋ္ဌာနအဆင့်မြင့်အရာရှိတွေ နဲ့ ဋ္ဌာနဆိုင်ရာတချို့၊ ဥရေပသမဂ္ဂ EUကတာဝန်ရှိသူတွေ၊အရပ်ဘက် အဖွဲ့အစည်းတွေနဲ့ဒေသခံတချို့တက်ရောက် ခဲ့ကြပါတယ်။

RFA Burmese
http://www.rfa.org/burmese