အင်ဒီယားနား အထက်တန်းကျောင်း တချို့ မြန်မာစာ စသင်မယ်

စိတ်ဝင်စားတဲ့ ကျောင်းသားတိုင်း မြန်မာစာနဲ့ နီးစပ်နိုင်ခွင့် ရလာမယ်
မြန်မာ ဒုက္ခသည်တွေနဲ့ ရွှေ့ပြောင်း အခြေချသူတွေ အများအပြား ရှိနေတဲ့ အမေရိကန် ပြည်ထောင်စု အင်ဒီယာနာ ပြည်နယ်ထဲက အထက်တန်းကျောင်း တချို့မှာ မြန်မာ ဘာသာစကားကို ဘာသာရပ် တစ်ခု အနေနဲ့ စတင် သင်ကြား လာတော့မှာ ဖြစ်ပါတယ်။

လာမယ့် ဩဂုတ်လကစလို့ အစိုးရ စာသင်ကျောင်းတွေ ရှိတဲ့ ဖို့ဒ်ဝိန်းမြို့၊ East Allen County နယ်ထဲက ကျောင်း ၃ ကျောင်းမှာ မြန်မာစာ ဘာသာရပ် စတင် သင်ကြားနိုင်ဖို့ သင်ရိုးညွှန်းတမ်းထဲမှာ ပြည်နယ် အစိုးရက ထည့်သွင်း လိုက်ပြီလို့ ဒီ အစီအစဉ် ဖြစ်မြောက် လာအောင် ကမကထလုပ် ဆော်ဩခဲ့တဲ့ ဆရာတစ်ယောက်က ဘီဘီစီကို ပြောပါတယ်။

ဒီလို သင်ကြား လာနိုင်တာကြောင့် မြန်မာ နွယ်ဖွား ကလေးတွေ မြန်မာစာ လေ့လာ နိုင်တဲ့ အခွင့်အရေး ရှိလာရုံ သာမက၊ ကိုရီးယားနဲ့ ဂျပန်စာတွေလိုပဲ စိတ်ဝင်စားတဲ့ ကျောင်းသားတိုင်း မြန်မာစာနဲ့ နီးစပ်နိုင်ခွင့် ရလာမှာ ဖြစ်တယ် ဆိုပြီး မြန်မာစာ ဆရာ ဦးကျော်သိန်းစိုးက ဘီဘီစီကို ပြောပါတယ်။

မြန်မာစာ ဘာသာရပ် စတင် ထားလာမယ့် East Allen County နယ်ထဲမှာ မြန်မာ နွယ်ဖွား ကျောင်းသား ဦးရေ တစ်ထောင်နီးပါး ရှိနေပြီး၊ အင်ဒီယားနား တပြည်နယ်လုံးမှာ ဆိုရင် တစ်သောင်း နီးနီး ရှိနေတယ်လို့ ဦးကျော်သိန်းစိုးက ဆိုပါတယ်။

ကျောင်းတွေမှာ မြန်မာစာ ဘာသာရပ် ထားရှိ လာစေချင်တယ် ဆိုရင် မြန်မာနွယ်ဖွား ကျောင်းသား ဦးရေ များများ ရှိနေတဲ့ ကျောင်းတွေမှာ မိဘတွေဘက်က စတင် ဆော်ဩ တောင်းဆိုမှုတွေ ပြုလုပ်သင့်တယ် လို့လည်း ဦးကျော်သိန်းစိုးက အကြံပြု ထားပါတယ်။

BBC Burmese
http://www.bbc.com/burmese
အင်ဒီယားနား အထက်တန်းကျောင်း တချို့ မြန်မာစာ စသင်မယ် အင်ဒီယားနား အထက်တန်းကျောင်း တချို့ မြန်မာစာ စသင်မယ် Reviewed by THITHTOOLWIN on 06:39 Rating: 5
Powered by Blogger.