အာရှဖလား ခြေစစ်ပွဲမှာ မြန်မာအမျိုးသမီးအသင်း အီရန်ကိုနိုင်

မြန်မာနဲ့ အီရန်အသင်းတို့ ယှဉ်ပြိုင်နေကြစဉ်။

၂၀၁၈ ခုနှစ် AFC အာရှဖလား အမျိုးသမီးဗိုလ်လုပွဲ တက်နိုင်ဖို့ အုပ်စု ပါတ်လည် ခြေစစ် ပွဲတွေကို စတင်ကျင်းပနေတာမှာ အုပ်စု D မှာပါတဲ့ မြန်မာအမျိုးသမီး ဘောလုံးအသင်းနဲ့ ဆီးရီးယားအသင်းတို့ ဧပြီလ ၇ ရက်သောကြာနေ့မှာ ကန်ကြမှာ ဖြစ်ပါတယ်။

အုပ်စုပါတ်လည်ပွဲတွေ စတင်တဲ့ တနင်္လာနေ့ကတော့ မြန်မာအသင်းက အီရန်အသင်းကို ၂ ဂိုး - ဂိုးမရှိနဲ့ နိုင်ထားတဲ့အတွက် ၃ မှတ်ရပြီး အုပ်စု ဇယားထိပ်မှာ ရောက်နေပါတယ်။

ဗီယက်နမ်နိုင်ငံ ဟနွိုင်းမြို့တော်က ဗီယက်နမ် လူငယ်ဘောလုံး သင်တန်းကွင်းမှာ ကစားခဲ့ကြတဲ့ပွဲမှာ ပွဲစပြီး ၅ မိနစ်မပြည့်ခင်မှာပဲ မြန်မာအသင်းဖက်က မဝင်းသိင်္ဂီထွန်း ပေးလိုက်တဲ့ ဘောလုံးကို ဂိုးတိုင်ရှေ့နား ရောက်နေတဲ့ တိုက်စစ်မှူး မဂျူလိုင်ကျော်က ခေါင်းနဲ့တိုက်ပြီး ပထမဂိုးကို သွင်းခဲ့ပါတယ်။ ဒုတိယဂိုးကိုတော့ ပထမပိုင်း ပြီးခါနီးလေးမှာ အလယ်တန်းလူ မဝင်းသိင်္ဂီထွန်းက သွင်းခဲ့တာ ဖြစ်ပါတယ်။

မြန်မာအသင်းအတွက် အုပ်စုပါတ်လည် ဒုတိယပွဲကို ဆီးရီးယားနဲ့ သောကြာနေ့မှာ ကစားပြီးရင်၊ တနင်္ဂနွေနေ့ ဧပြီလ ၉ ရက်နေ့ကျရင် မြန်မာအသင်း၊ စင်္ကာပူအသင်းနဲ့ ကစားရမှာဖြစ်ပါတယ်။ လောလောဆယ် ဆီးရီးယားအသင်းကို ၁ ဂိုး ဂိုးမရှိနဲ့နိုင်ထားတဲ့ စင်္ကာပူ အသင်းကလည်း ၃ မှတ်ရထားပြီး ဇယားမှာ ဒုတိယ နေရာမှာ ရှိနေပါတယ်။

အုပ်စု D ထဲက မြန်မာအသင်းအတွက် နောက်ဆုံး အုပ်စုပါတ်လည် ပွဲကိုတော့ ဗီယက်နမ်အသင်းနဲ့ ၁၁ ရက်၊ အင်္ဂါနေ့မှာ ကန်ကြမှာ ဖြစ်ပါတယ်။

၁၉ ကြိမ်မြောက်AFC အာရှဖလား အမျိုးသမီး ဗိုလ်လုပွဲတွေကတော့ ဂျော်ဒန်နိုင်ငံမှာ ၂၀၁၈ ခုနှစ်မှာ ကျင်းပမှာ ဖြစ်ပါတယ်။

VOA (မြန်မာပိုင်း)
http://burmese.voanews.com