လောက်ကိုင်မှာ အစိုးရတပ်နဲ့ ကိုးကန့်တပ်တို့ တိုက်ပွဲပြင်းထန်

တရုတ်မြန်မာနယ်စပ်မှာ ကိုးကန့်တပ်မတော် MNDAA တပ်ဖွဲ့ဝင်တချို့ကို တွေ့ရစဉ်။ Photo: AFP

ရှမ်းပြည်နယ်မြောက်ပိုင်း၊ လောက်ကိုင်မြို့နယ်အတွင်းမှာ အစိုးရတပ်မတော်နဲ့ ကိုးကန့်တပ်ဖွဲ့ MNDAAတို့ ဒီနေ့မနက်အစောပိုင်းက စတင်ပြီးတိုက်ပွဲတွေပြင်းပြင်းထန်ထန် ဖြစ်ပွားနေတယ်လို့ မြန်မာပြည်မြောက်ပိုင်း မဟာမိတ်တပ်ဖွဲ့က သတင်းထုတ်ပြန်ပါတယ်။

မြောက်ပိုင်းမဟာမိတ်တပ်ဖွဲ့တွေက စုပေါင်းတိုက်ခိုက်တာမဟုတ်ဘဲ မြောက်ပိုင်းမဟာမိတ်တပ်ဖွဲ့ဝင် ကိုးကန့်တပ်ဖွဲ့နဲ့သာ တိုက်ပွဲဖြစ်ပွားတာဖြစ်ပါတယ်။

တဖက်ကလည်း မြောက်ပိုင်းမဟာမိတ်တပ်ဖွဲ့ကို ဖျက်သိမ်းတာမရှိသေးတာကြောင့် ရခိုင့်တပ်မတော်၊ တအာင်း လွတ်မြောက်ရေးတပ်မတော်၊ ကိုးကန့်တပ်မတော်နဲ့ ကချင်လွတ်မြောက်ရေးတပ်မတော်တို့ အခြေချရာ ဒေသ အသီးသီးမှာ ဖြစ်ပွားနေတဲ့တိုက်ပွဲတွေဟာ မြောက်ပိုင်းမဟာမိတ်တပ်ဖွဲ့တွေနဲ့ အစိုးရကြား တိုက်ပွဲတွေဖြစ်ပွားနေ တာလို့ မြောက်ပိုင်းမဟာမိတ်တပ်ဖွဲ့ရဲ့ ပြောရေးဆိုခွင့်ရှိသူ ဗိုလ်မှူး တာအိုက်ကျော် ကပြောပါတယ်။

တိုက်ပွဲတွေကြောင့် ဒေသခံတွေ ထိခိုက်သေဆုံးမှုတွေရှိနေတယ်လို့ ကနဦးသတင်းတွေကြားသိရပြီး အဲဒီမှာတာဝန်ကျနေတဲ့ မူလတန်းပြ ဆရာမတစ်ဦး သေဆုံးသွားတယ်လို့ မြန်မာနိုင်ငံလုံးဆိုင်ရာဆရာ၊ ဆရာမများအဖွဲ့ချုပ်က သတင်းထုတ်ပြန်ထားပါတယ်။

ဒီနေ့ မနက် ၁ နာရီမထိုးခင်ကစတင်ပြီး လောက်ကိုင်မြို့နယ်၊ ရန်လုံကျိုက်ကျေးရွာ၊ တုန်ချိန်၊ ကျိုဖန်၊ ရှင်းပိုင်ရှင့်၊ ကျင်ရှင့်ချိန် နှင့် ကျင်ဆန်ကျော်တို့မှာ တိုက်ပွဲတွေဖြစ်ပွားတာလို့ သိရပါတယ်။

RFA Burmese
http://www.rfa.org/burmese