ဦးကိုနီလုပ်ကြံခံရသည့်အမှုကို တပ်မတော်နှင့် ရဲ ပူးပေါင်းအဖွဲ့မှ သံသယရှိသူများအား ဖမ်းဆီးထိန်းသိမ်းစစ်ဆေးနေ

အမျိုးသားဒီမိုကရေစီအဖွဲ့ချုပ်ရဲ့ ဥပဒေအကြံပေး တရားလွှတ်တော်ရှေ့နေ ဦးကိုနီ လုပ်ကြံခံရတဲ့ အမှုနဲ့ပတ်သက်ပြီး တပ်မတော်နဲ့ မြန်မာနိုင်ငံရဲတပ်ဖွဲ့တို့ပူးပေါင်းပြီး အဖွဲ့ဖွဲ့စည်းကာ နောက်ကွယ်က ဆက်စပ်သံသယရှိသူတွေ ဖမ်းဆီးထိန်းသိမ်း စစ်ဆေးနေတယ်လို့ သမ္မတရုံးဝန်ကြီးဌာန ဒုတိယညွှန်ကြားရေးမှူးချုပ် ဦးဇော်ဌေးကပြောပါတယ်။

 ဖေဖော်ဝါရီ(၆)ရက်က နေပြည်တော်ရှိ သင်္ဂဟဟိုတယ်မှာကျင်းပတဲ့ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ အစည်းအဝေးအပြီးမှာ မီဒီယာတွေရဲ့ မေးမြန်းချက်ကိုပြန်လည်ဖြေကြားရာမှာ ပြောကြားတာဖြစ်ပါတယ်။

 တရားလွှတ်တော်ရှေ့နေ ဦးကိုနီ လုပ်ကြံခံရတဲ့အမှုကို အစိုးရအနေနဲ့ အထူးအလေးအနက်ထားဆောင်ရွက်နေကြောင်းနဲ့ တပ်မတော်နဲ့ မြန်မာနိုင်ငံရဲတပ်ဖွဲ့ ပူးပေါင်းအဖွဲ့က နောက်ကွယ်မှ သံသယရှိသူတွေကို ဖမ်းဆီးထိန်းသိမ်း စစ်ဆေးမှုတွေလုပ်နေတာဖြစ်ကြောင်း ဦးဇော်ဌေး
ကပြောပါတယ်။

 အဲဒီလို သံသယရှိသူတွေကို ဖမ်းဆီးစစ်ဆေးနေမှုနဲ့ပတ်သက်ပြီး လောလောဆယ်စစ်ဆေးမှုတွေပြုလုပ်နေသလို အမှုရဲ့ကွင်းဆက် ဖြစ်ပေါ်တဲ့ အကြောင်းအရင်းအချက်အလက် တွေကိုပြောဖို့စောနေတယ်လို့ ဆိုပါတယ်။

 အမှုနဲ့ ပတ်သက်ပြီး သတင်းထုတ်ပြန်မပေးတာဟာ အမှုရဲ့နောက်ဆက်တွဲ ကွင်းဆက်တွေပျောက်သွားမှာ စိုးတာကြောင့် ပြည်သူတွေ အနေနဲ့နားလည်ပေးနိုင်ဖို့ ဦးဇော်ဌေးကပြောပါတယ်။

အမျိုးသားဒီမိုကရေစီအဖွဲ့ချုပ်ရဲ့ ဥပဒေအကြံပေးတရားလွှတ်တော်ရှေ့နေ ဦးကိုနီဟာ ဇန်နဝါရီလ (၂၉)ရက်နေ့က အင်ဒိုနီးရှား နိုင်ငံမှပြန်လာစဉ် ရန်ကုန်လေဆိပ်မှာ သေနတ်သမား ကြည်လင်းရဲ့သေနတ်နဲ့ ပစ်သတ်လုပ်ကြံခြင်းကို ခံခဲ့ရတာဖြစ်ပြီး လုပ်ကြံသူကြည်လင်းကို အခင်းဖြစ်ရာမှာပင်ဖမ်းဆီးရမိခဲ့ပြီး ဆက်စပ်ပါဝင်သူအောင်ဝင်းဇော်ကိုလည်း ဖမ်းဆီးရမိထားတယ်လို့ သိရပါတယ်။ ဒီသတင်းကို နေပြည်တော်ဗျူရိုမှ ကေသွယ်စန်းက ပေးပို့တာဖြစ်ပါတယ်။

Central News Bureau
https://www.facebook.com/skynetcnb/