စနစ်ကျသည့် ရန်ကုန်မြို့သယ်ယူပို့ဆောင်ရေးစနစ်ကို ပီပြင်စွာ မြင်တွေ့လာ

ဒီရက်ထဲအပြင်ထွက်လိုင်းကားစီးရမှာ အတော့်ကိုကြောက်မိခဲ့သည်။ အစရက် ဖြစ်သည့် ဇန်နဝါရီ ၁၆ ရက်မှာ နဖူးတွေ့ ဒူးတွေ့ကြုံခဲ့ရသော အခက်အခဲများကြောင့် ဖြစ်သည်။

သို့အတွက် ဒီရက်အတွင်း ဘယ်မှမထွက်၊ လိုင်းကားမစီးသေးဟု သန္နိဋ္ဌာန်ချ ထားခဲ့သည်။ သို့သော် ဇန်နဝါရီ ၁၈ ရက်က မဖြစ်မနေအပြင်ထွက်ရမည့် အနေ အထားရှိလာခဲ့သည်။ ကြည့်မြင်တိုင်ကမ်းနားလမ်း သီရိမင်္ဂလာဈေးဟောင်းမှတ်တိုင်မှ ဆင်မလိုက်(အဝေးပြေးဂိတ်ဟောင်း)ဆီသို့ ၂၃ လိုင်းကားတက်စီးလာခဲ့သည်။ နေ့ခင်း ထမင်းစားချိန်ဖြစ်၍လားမသိ ကားပေါ်တွင် ထိုင်ခုံပြည့်ရုံမျှသာ ခရီးသည်ပါလာသည်။ ယာဉ်ဟောင်းကြီးဖြစ်၍ ယာဉ်စီးခကို ယာဉ်နောက်လိုက်က လိုက်လံကောက်ခံခြင်း ဖြစ်သည်။ လိုရာခရီးကို မပင်မပန်းရောက်ခဲ့ရသည်။

ဆင်မလိုက်မှအပြန် မှတ်တိုင်အရောက်တွင် ကိုရီးယားကားအသစ်ကြီးတစ်စီးထိုးဆိုက်လာခဲ့သည်။ ယာဉ်ပေါ်တွင် ခရီးသည်က ထိုင်ခုံအပြည့်ပင်ပါမလာပေ။ သီရိ မင်္ဂလာဈေးဟောင်းရောက်သည်ဆို၍ တက်စီးလာခဲ့သည်။ နံပါတ် ၃ဝ (အနီ) ဖြစ်သည်။ ရှေ့ပေါက်က အတက်ဖြစ်ပြီး နောက်ပေါက်က အဆင်းဖြစ်သည်။
ယာဉ်စီးခထုတ်ပေးသည့်အခါ ယာဉ်နောက်လိုက်လူငယ်လေးက ''ယာဉ်စီးခ ပုံးထဲထည့်ပေးပါခင်ဗျား'' ဟု ဆိုလာသည်။ လက်ထဲဆောင်လာသည့် ယာဉ်စီးခ ကျပ်နှစ်ရာကို ပုံးထဲအဆင်ပြေပြေထည့်ပေးလိုက်သည်။
စနစ်တကျရှိလှသည်။ အချို့ ခရီးသည်များက ထိုင်ခုံအရယူထိုင်ပြီးမှ ယာဉ်စီးခထုတ်ပေးသည်။ ဒါကိုလည်း ယာဉ် နောက်လိုက်က လိုက်လံရယူပြီး ပုံးထဲထည့်ပေးခဲ့သည်။

အလွန်ကောင်းသည့် စီစဉ်မှုလေးဖြစ်သည်။ လက်တွေ့မြင်တွေ့လိုက်ရမှ လူကြီး များ စီစဉ်ခြင်းမှာ ဤကဲ့သို့ပါတကားဟု အတွေးပေါက်ခဲ့ရသည်။ လိုင်းတိုင်းဤကဲ့သို့ စနစ်ဖြင့်သွားပါ။ ရန်ကုန်မြို့၏ သယ်ယူပုိ့ဆောင်ရေးစနစ်သည် လွန်စွာမှပင် အဆင့် အတန်းမြင့်၍ နိုင်ငံကြီးသားများအဖြစ် ပီပီပြင်ပြင်မြင်တွေ့လာကြရတော့မည်ဟု အတွေး၌ ပေါ်လာခဲ့သည်။

မိမိတို့ခရီးသွားပြည်သူများ၊ သယ်ယူပို့ဆောင်ရေး၌ပါဝင်သူအုပ်ချုပ်သူ၊ ယာဉ် ပိုင်ရှင်၊ ယာဉ်မောင်း၊ ယာဉ်နောက်လိုက်များသည် နေပူထဲမှ လျှောက်လှမ်းလာရသူ များဖြစ်ကြသည်။ နေရိပ်ထဲသို့ ရောက်ရန် ခြေလှမ်းများစွာ လှမ်းကြရဦးမည်ဖြစ်သည်။

သို့သော် ယခုကဲ့သို့YBS အကောင်းစားလေးများနှင့်ဆုံတွေ့လိုက်ရသည့် အခိုက်ဝယ် ယခင်နေ့များက ကြုံတွေ့ခဲ့ရသော အခက်အခဲများအပေါ် နားလည် ခွင့်လွှတ်နိုင်ခဲ့ပေပြီ။

 သတင်းဆောင်းပါးနှင့်ဓာတ်ပုံ-တင်ဝင်းလေး(ကြည့်မြင်တိုင်)
Myanmaalinn
https://www.facebook.com/MYANMAALINNNEWS