မုံးကို တရုတ်နယ်စပ် ဂိတ် ကို ထိန်းချုပ်ထားတဲ့ မဟာမိတ် တပ်ပေါင်းစု ကိုးကန့် MNDAA တပ်များ |
နံနက်ပိုင်း ၁၀ နာရီခွဲခန့်မှာ Northern Alliance (Burma) ခေါ် မဟာမိတ် တပ်ပေါင်းစု ကိုးကန့် MNDAA တပ်ဖွဲ့များမှ ဗျူဟာကုန်းကို အပြီးအပိုင် သိမ်းပိုက်နိုင်ခဲ့ပြီး ၎င်းစခန်း ပတ်ဝန်းကျင်ကို ရှင်းလင်းနေကြောင်း မုံးကိုမြို့ ရှေ့တန်းမှ မဟာမိတ် တပ်မှ အရာရှိ တဦး ကချင် သတင်း ဌာန KNG ကို အတည်ပြု ပြောပါသည်။
ယနေ့ နံနက်ပိုင်းမှ အစိုးရ ဂျက်တိုက်လေယာဉ် ၂ စီးဖြင့်လည်း ပစ်ကူ ပေးမှုရှိသော်လည်း စစ်ရေးအရ အရေးပါသော မုံးကို ဗျူဟာကုန်းကို သိမ်းပိုက်နိုင်ခြင်းဖြစ်ပြီး မြို့တွင်း ပစ်ခတ်မှုငယ်များ ဆက်လက်ရှိနေသေးကြောင်း သူက ဆက်ဆိုသည်။
ယမန်နေ့ ဒီဇင်ဘာ ၁ ရက် Sweet December နေ့က ကိုးကန့် (MNDAA) တပ်ဖွဲ့များမှ ၎င်းတို့ ပိတ်ဆို့ ၀ိုင်းထားသော ဗျူဟာကုန်းကို ၀င်ရောက်တိုက်ခိုက်ခဲ့သည်။ ယင်း တိုက်ပွဲ အတွင်း မြန်မာစစ်တပ်မှ ဗျူဟာကုန်းတွင် လူသား ဒိုင်း အဖြစ် ဖမ်းဆီးထားသော မုံးကိုဒေသခံ အများစု ထွက်ပြေး လွတ်မြောက်နိုင်ခဲ့သည်ဟု ဒေသခံများ ပြောပါသည်။
အစိုးရ ပြည်သူ့လွှတ်တော် ဒု-ဥက္ကဌ ဦး T ခွန်မြတ် ဦးဆောင်သော ကွတ်ခိုင် ပြည်သူ့စစ်မှ အဖွဲ့ဝင် အချို့နှင့် ၎င်းတို့၏ ခေါင်းဆောင် တရုတ်အမျိုးသား Hpang Si (ဖန်စီ) ကို ယမန်နေ့ က MNDAA တပ်ဖွဲ့မှ ဖမ်းဆီးခဲ့သည်။
ယမန်နေ့ တရုတ်ဘက်ခြမ်း ပြေးဝင်သွားသည့် မြန်မာစစ်သား ၂၀ခန့်ကိုလည်း တရုတ်တပ်ဖွဲ့များ ဖမ်းဆီး ထိန်းသိမ်းခဲ့သည်ဟု မဟာမိတ် တပ်မှ အတည်ပြုပြောဆိုပါသည်။
ရှမ်းပြည်မြောက်ပိုင်း အထူးသဖြင့် ကွတ်ခိုင်မြို့နယ် နှင့် မူဆယ်မြို့နယ် တွင် မြန်မာစစ်တပ်နှင့် ကချင် (KIA)၊ ပလောင် (တအောင်း) TNLA၊ ကိုးကန့် (MNDAA) နှင့် ရခိုင် (AA) စသည့် တိုင်းရင်းသား တော်လှန်ရေးအဖွဲ့ ၄ ဖွဲ့ ပါဝင်သော ‘မြန်မာပြည်မြောက်ပိုင်း မဟာမိတ် တပ်ပေါင်းစု (Northern Alliance-Burma)’ ကြား နိုဝင်ဘာ ၂၀ ရက်မှ တိုက်ပွဲ ဖြစ်ပွားလာသည်။
ယင်းနောက် နှစ်ဖက်တပ်ကြား တိုက်ပွဲ ပြင်းပြင်းထန်ထန် ဖြစ်ပွားနေသည် ယနေ့ (၁၃)ရက် အကြာမှာ မြန်မာစစ်တပ် တပ်မ ၉၉ မုံးကို (Mongkoe) ဗျူဟာကုန်း ကို မဟာမိတ်တပ်မှ သိမ်းယူနိုင်ခြင်း ဖြစ်သည်။
မြန်မာစစ်တပ် ဂျက်တိုက်လေယာဉ်များက မုံးကိုဒေသ မဟာမိတ်တပ် စခန်းများကိုသာ ပစ်မှတ်ထား တိုက်ခိုက်နေခြင်း မဟုတ်ဘဲ လူနေအိမ်များကိုပါ ရည်ရွယ်ချက် ရှိရှိဖြင့် ဗုံးကြဲ တိုက်ခိုက်နေကြောင်း ဒေသခံများ ကချင် သတင်း ဌာန KNG ကို ပြောပါသည်။
Kachinnews
http://burmese.kachinnews.com
မြန်မာစစ်တပ် မုံးကို ဗျူဟာကုန်း မဟာမိတ်တပ် လက်ထဲ ကျ
Reviewed by THITHTOOLWIN
on
17:28
Rating: