EMG အမှုဆောင်အရာရှိချုပ်ကို ဖမ်းဆီးဖို့ ရှာဖွေနေ

ရန်ကုန်အနောက်ပိုင်းခရိုင် ရဲမှူးကြီး ဦးမြင့်ထွေးက မီဒီယာတွေကို ဖြေကြား
ဆက်သွယ်ရေးပုဒ် ၆၆(ဃ)အရ အမှုဖွင့်ခံထားရတဲ့ Eleven Media Group ရဲ့အမှုဆောင်အရာရှိချုပ် ဒေါက်တာသန်းထွဋ်အောင်နဲ့ Eleven သတင်းစာရဲ့ အယ်ဒီတာချုပ် ကိုဝေဖြိုးတို့ကို အရေးယူဖိုိ့ စုံစမ်းဆောင်ရွက်နေကြောင်း တာဝန်ရှိ ရဲအရာရှိတဦးက ပြောကြားလိုက်ပါတယ်။ ဒေါက်တာသန်းထွဋ်အောင်နဲ့ ကိုဝေဖြိုးတို့ကို လာရောက်ဖို့ တာမွေရဲစခန်းက ဆင့်ခေါ်ခဲ့ပေမယ့် အချိန်မီ ရောက်မလာတဲ့အတွက် သူတို့ကို ဖမ်းဆီးနိုင်ဖို့ လိုက်လံရှာဖွေနေပြီ ဖြစ်ပါတယ်။ အဆက်သွယ်မေးမြန်းထားတဲ့ ကိုဉာဏ်ဝင်းအောင်က တင်ပြမှာပါ။

နိုဝင်ဘာ ၆ ရက်နေ့ထုတ် Daily Eleven သတင်းစာပါ “ရွေးကောက်ပွဲ တနှစ်ကြာသော်”ဆိုတဲ့ အယ်ဒီတာ့အာဘော် ဆောင်းပါးမှာ ၀န်ကြီးချုပ် တဦးဟာ ဒေါ်လာ တသိန်းလောက်တန်တဲ့နာရီကို ရန်ကုန်မြို့သစ်စီမံကိန်း တင်ဒါအောင်ထားတဲ့ မူးယစ်ဆေးမှုနဲ့ထောင်ကျဖူးသူ သူဌေးကြီး တဦးဆီက လက်ခံရယူခဲ့တယ်ဆိုပြီး ရေးသားခဲ့တာနဲ့ ပတ်သက်လို့ Eleven Media Group ရဲ့CEO ဒေါက်တာ သန်းထွဋ်အောင်နဲ့ Daily Eleven သတင်းစာအယ်ဒီတာချုပ် ကိုဝေဖြိုးတို့ကို ရန်ကုန်တိုင်းအစိုးရအဖွဲ့က တရားလိုလုပ်ပြီး တာမွေရဲစခန်းမှာ နိုဝင်ဘာ ၉ ရက်နေ့က ဆက်သွယ်ရေးပုဒ် ၆၆(ဃ)နဲ့ အမှုဖွင့် ထားတာဖြစ်ပါတယ်။

ဒီတိုင်ကြားချက်အရ အောက်တိုဘာ ၁၀ ရက်နေ့မှာ တာမွေရဲစခန်းကို လာရောက်အစစ်ခံဖို့ Eleven အမှုဆောင်အရာရှိချုပ် ဒေါက်တာသန်း ထွဋ်အောင်နဲ့ အယ်ဒီတာချုပ် ကိုဝေဖြိုးတို့ကို ဆင့်ခေါ်ထားပေမယ့် ရောက်မလာကြဘူးလို့ ရန်ကုန်အနောက်ပိုင်းခရိုင် ရဲမှူးကြီး ဦးမြင့်ထွေးက မီဒီယာတွေကို ဖြေကြားခဲ့ပါတယ်။

“ ၂၀၁၆ ဆက်သွယ်ရေးပုဒ်မ ၆၆(ဃ) နဲ့ ရန်ကုန်တိုင်းဒေသကြီးအစိုးရအဖွဲ့ ညွန်ကြားရေးမှူး ဦးမိုးဝင်းက တရားလိုလုပ်ပြီးတော့ Eleven မီဒီယာ CEO ဦး သန်းထွဋ်အောင် နဲ့ Eleven မီဒီယာ ကို အမှုဖွင့် ဆောင်ရွက်ထားတာ ဖြစ်ပါတယ်။ အဲဒီအတွက် ကျနော်တို့ စုံစမ်းစစ်ဆေးဆောင်ရွက်လျှက်ရှိပါတယ်။ အဲဒီအတွက်ကြောင့် ကျနော်တို့က လက်ရှိ ဦး သန်းထွဋ်အောင် နဲ့ Eleven မီဒီယာက ကိုဝေဖြိုးတို့လာဖို့ ကျနော်တို့ မနေ့က ကျင့်ထုံးဥပဒေ ၁၆၀ အရ ဒီကနေ့ ၁၀ နာရီအရောက် ဆင့်ခေါ်ခဲ့ပါတယ်။ ဆင့်ခေါ်တာနဲ့ ပတ်သက်ပြီးတော့ အဲဒီမှာ GN ဖြစ်တဲ့ ကိုထိန်လင်းနဲ့ တွေ့ခဲ့တယ်။ ကိုထိန်လင်း က ဒီစာကို လက်မှတ်ထိုးပေးခဲ့ပါတယ်။ ကိုထိန်လင်း က ခုနက ကျနော်တို့ ဆီပြန်လာပါတယ်၊ ကိုထိန်လင်းက လောလောဆယ်မှာ မလုပ်နိုင်သေးတဲ့အတွက် ပြန်လည်ပြီးတော့ ကျနော်တို့ကို အချိန်တောင်းတဲ့အတွက် ညနေ ၂ နာရီမှာ တခါတည်းခေါ်လာဖို့ ကျနော်တို့ မှာလိုက်ပါတယ်။”

ရဲစခန်းရဲ့ ဆင့်ခေါ်မှုအတိုင်း ရောက်မလာတဲ့အတွက် ဒေါက်တာသန်းထွဋ်အောင်ကို ဖမ်းဆီးနိုင်ဖို့ ရဲတပ်ဖွဲ့က ရှာဖွေနေတယ်လို့ ရဲမှူးကြီး ဦးမြင့်ထွေးက ပြောပါတယ်။

“ဒါကတော့ ကျနော်တို့ ရဲတပ်ဖွဲ့ဝင်တွေအနေနဲ့ ရဲလုပ်ငန်းအရကော ၊ လုပ်ငန်းလုပ်တဲ့အခါမှာလည်း ကျနော်တို့ ကျင့်ထုံးဥပဒေနဲ့ အညီဆောင်ရွက်မှာဖြစ်ပါတယ်။ ကျနော်တို့ကလုပ်ထုံးလုပ်နည်းဥပဒေအတိုင်း ကျနော်တို့ ညနေ ၄ နာရီအထိစောင့်ပေးမယ် မရရင် ကျနော်တို့ရဲ့ ရဲလုပ်ငန်းဥပဒေအတိုင်း ဆောင်ရွက်မှာဖြစ်ပါတယ်။”

ဒီအတောတွင်း Daily Eleven သတင်းစာ ရေးသားချက်အပေါ် ကြားဝင်ဖြေရှင်းပေးဖို့ ရန်ကုန်တိုင်းအစိုးရ ညွှန်ကြားရေးမှူး ဦးမိုးဟိန်းက မြန်မာနိုင်ငံ သတင်းမီဒီယာကောင်စီကို နိုဝင်ဘာ ၉ ရက်နေ့က စာရေးသား မေတ္တာရပ်ခံခဲ့တာပါ။ ဒါပေမယ့် တဖက်မှာ တရားဥပေဒကြောင်း အရ အမှုဖွင့်ထားရင် သူတို့ မီဒီယာကောင်စီလုပ်ထုံးအရ ကြားဝင် ဖြန်ဖြေဖို့ အခက်အခဲရှိတာကြောင့် တရားစွဲတဲ့အမှုကို ပြန်ရုပ်သိမ်းဖို့ လိုမယ်လို့ မြန်မာနိုင်ငံ သတင်းမီဒီယာကောင်စီ ဒုဥက္ကဌ ဦးအောင်လှထွန်းက VOA မြန်မာပိုင်းကို ရှင်းပြပါတယ်။

“ကျနော်တို့ သတင်းမီဒီယာဥပဒေအရဆိုရင် ကျနော်တို့က ကူညီပြီးတော့ ဖြေရှင်းပေးတာပေါ့လေ၊ ဒါပေမယ့် အဲဒီတဘက် တိုင်ကြားတဲ့လူက တခြားဥပဒေတခုခုနဲ့ အရေးယူဖို့အတွက် ရဲစခန်းကို မတိုင်ကြားမှသာလျှင် ကျနော်တို့က ကူညီဖြေရှင်းလို့ရပါတယ်။ အခုက ကျနော်တို့ဆီကို အကြောင်းကြားလာတယ်၊ တချိန်ထဲမှာပဲ ဦးဖြိုးမင်းသိန်းကိုယ်တိုင်က သတင်းစာရှင်းလင်းပွဲမှာပြောတာပေါ့လေ ဆက်သွယ်ရေးပုဒ်မ ၆၆(ဃ) နဲ့ အမှုဖွင့်ထားတယ်ဆိုပြီးပြောခဲ့ပါတယ်။ အဲဒီတော့ ကျနော်တို့ရဲ့ သတင်းဥပဒေပုဒ်မ ၃၇ မှာက ဒီ နစ်နာတဲ့ဘက်ကပေါ့လေ ကျနော်တို့ကိုတိုင်ကြားပြီးရင် တရားမကြောင်းအရ တရားစွဲထားတာဆိုရင် ကျနော်တို့က ၀င်လုပ်လို့မရဘူး။ အဲဒါကြောင့်မို့လို့ ကျနော်တို့ကို ၀င်ပြီးတော့ ဖြေရှင်းပေးစေချင်ရင် သူတို့ တရားမကြောင်းအရလုပ်ထားတဲ့ဟာကို ရုပ်သိမ်းပေးဖို့ အကြောင်းပြန်တာပါ ဟုတ်ကဲ့။”

ဒါပေမယ့် သူတို့အနေနဲ့ တရားစွဲထားတဲ့အမှုကို ပြန်ရုပ်သိမ်းမှာ မဟုတ်ဘူးလို့ ရန်ကုန်တိုင်းအစိုးရအဖွဲ့ ပြောခွင့်ရပုဂ္ဂိုလ် ဦးမိုးဟိန်းက ပြော ပါတယ်။

“ဒီဟာနဲ့ ပတ်သက်လို့ တရားစွဲဆိုထားတဲ့ အတိုင်းပဲ ကျနော်တို့ ဥပဒေကြောင်းအရပဲ ဆက်လက်ဆောင်ရွက်သွားဖို့ ရှိပါတယ်ခင်ဗျ ၆၆(ဃ)ပါ။”

တချိန်တည်းမှာပဲ ဝန်ကြီးချုပ်ကို နာရီလက်ဆောင်ပေးတယ်ဆိုတဲ့ကိစ္စမှာ သူမဟုတ်ကြောင်း သတင်းစာရှင်းလင်းပွဲလုပ်ပြီး ငြင်းဆိုထားတဲ့ လုပ်ငန်းရှင်သူဌေးကြီး ဦးမောင်ဝိတ်ကိုလည်း တာမွေရဲစခန်းက ဆင့်ခေါ်စာပို့ထားတာကြောင့် ဒီနေ့ညနေ ၄ နာရီကျော်မှာ လာရောက် အစစ် ဆေးခံတယ်လို့ တာမွေရဲစခန်း တာဝန်ကျ အရာရှိတဦးက ပြောပါတယ်။

စစ်ဆေးထွက်ဆိုချက်အသေးစိတ်ကိုတော့ ပြောဆိုခြင်းမရှိပါဘူး။ ဆက်သွယ်ရေးပုဒ် ၆၆(ဃ)ဟာ လူမှုကွန်ယက်မီဒီယာကတဆင့် နိုင်ငံတော်အကြီးအကဲတွေကို ဝေဖန်ရေးသားတဲ့အခါမျိုးမှာ အရေးယူ အပြစ် ပေးတဲ့ပုဒ်မဖြစ်ပြီး အာမခံ မရနိုင်တဲ့ ပုဒ်မလည်း ဖြစ်ပါတယ်။ NLD အစိုးရလက်ထက်မှာ မီဒီယာလွတ်လပ်ခွင့်ကို လေးစားသင့်ပြီး ဆက်သွယ် ရေးပုဒ်မ ၆၆(ဃ)ကို ဆက်လက်သုံးနေတာနဲ့ ပတ်သက်လို့ လူ့အခွင့်အရေးလှုပ်ရှားသူတွေက ဝေဖန်နေကြပါတယ်။

ကိုဉာဏ်ဝင်းအောင်  / ဗွီအိုအေ (မြန်မာပိုင်း)
http://burmese.voanews.com
EMG အမှုဆောင်အရာရှိချုပ်ကို ဖမ်းဆီးဖို့ ရှာဖွေနေ EMG အမှုဆောင်အရာရှိချုပ်ကို ဖမ်းဆီးဖို့ ရှာဖွေနေ Reviewed by THITHTOOLWIN on 23:03 Rating: 5
Powered by Blogger.