ထီးလိုမင်းလိုဘုရားကိစ္စ ဂေါပကကို စစ်ဆေးမည်

(ရွှေပြည်တော်သို့ဆုံမှတ် ပရဟိတအသင်းက ထီးလိုမင်းလိုဘုရားမှာ ချိတ်ဆွဲထားတဲ့ ဗီနိုင်းကို တွေ့ရစဉ်) ဓါတ်ပုံ - ရွှေပြည်တော်သို့ဆုံမှတ် (facebook)

ပုဂံငလျင်ကြောင့် ပျက်စီးသွားတဲ့ စေတီတွေထဲက ထီးလိုမင်းလိုဘုရားရဲ့စေတီအစိတ်အပိုင်းတချို့နဲ့ အရံစေတီအချို့ ထိခိုက်ပျက်စီးတာတွေကို "ရွှေပြည်တော်သို့ဆုံမှတ် ပရဟိတအသင်း"ကို ပြုပြင်ဖို့ ခွင့်ပြုပေးလိုက်တဲ့ ဂေါပကအဖွဲ့ကို ဒီတစ်ပတ်အတွင်း စစ်ဆေးသွားမှာဖြစ်တယ်လို့ ရှေးဟောင်းသုတေသနနှင့် အမျိုးသားပြတိုက်ဦးစီးဌာန ပုဂံဌာနခွဲက ပြောပါတယ်။

ဘယ်ပရဟိတအဖွဲ့ကိုမှ ပုဂံစေတီဘုရားတွေကို ပြုပြင်ခွင့်မပြုထားတဲ့အတွက် တကယ်လို့ ဂေါပကအဖွဲ့ ပြုပြင်ခွင့်ပေးခဲ့တယ်လို့ စစ်ဆေးတွေ့ရှိရင်တော့ တည်ဆဲဥပဒေတွေအရ အရေးယူသွားမှာဖြစ်တယ်လို့ ရှေးဟောင်းသုတေသနနဲ့ အမျိုးသားပြတိုက်ဦးစီးဌာန ပုဂံဌာနခွဲ ညွှန်ကြားရေးမှူး ဦးအောင်အောင်ကျော်က ပြောပါတယ်။

ပြီးခဲ့တဲ့ သြဂုတ်လမှာ လှုတ်ခတ်ခဲ့တဲ့ ငလျင်ကြောင့် ထီးလိုမင်းလိုဘုရားကို ပြုပြင်ဖို့ဆိုပြီး ငြမ်းဆင် ဆောင်ရွက်နေတဲ့ ရွှေပြည်တော်ဆုံမှတ် ပရဟိတအသင်းကို ခွင့်ပြုချက်မရှိဘဲ ပြုပြင်တာတွေမလုပ်ဖို့ ရှေးဟောင်းသုတေသနနှင့် အမျိုးသားပြတိုက်ဦးစီးဌာန မနေ့က သတင်းထုတ်ပြန်ပါတယ်။
ငလျင်ဒဏ်ကြောင့် ထိခိုက်ပျက်စီးခဲ့တဲ့ ဘုရား၊ စေတီတွေကို ပုဂ္ဂလိကတွေ၊ အဖွဲ့အစည်းတွေ၊ ဂေါပကတွေက ပြုပြင်ခွင့်မရှိဘဲ နိုင်ငံတော်က ကြီးကြပ်ပြီး ပြင်ဆင်ထိန်းသိမ်းတာတွေ လုပ်မှာဖြစ်ကြောင်းကို ဂေါပကအဖွဲ့ကို အသိပေးထားတယ်လို့ ထုတ်ပြန်ချက်မှာ ပါရှိပါတယ်။

ရွှေပြည်တော်သို့ဆုံမှတ် ပရဟိတအသင်းက ဘုရားမှာ ချိတ်ဆွဲထားတဲ့ ဗီနိုင်းမှာ အဂ္ဂမဟာသီရိသုဓမ္မ ဦးသိန်းစိန်နှင့် ဇနီးဒေါ်ခင်ခင်ဝင်းတို့အား အမှူးထားပြီး ၇ ရက်သားသမီး စုပေါင်းအလှူဖြင့် ဘက်စုံပြန်လည်ပြုပြင်ခြင်း လုပ်ငန်းခွင်လို့ စာသားပါရှိပါတယ်။

ပုဂံငလျင်ကြောင့် ထိခိုက်ပျက်စီးခဲ့တဲ့ စေတီ၊ ပုထိုးပေါင်း ၃၈၉ ဆူရှိပြီး ထိခိုက်ပျက်စီးမှုပမာဏနဲ့ တန်ဖိုးပေါ်မူတည်ပြီး ပထမဦးစားပေး ၃၆ ဆူ၊ ဒုတိယဦးစားပေး ၅၃ ဆူနဲ့ တတိယဦးစားပေး ၃၀၀ ဆူတို့ကို ခွဲခြားထားပါတယ်။

ရှေးဟောင်းသုတေသနနှင့် အမျိုးသားပြတိုက်ဦးစီးဌာနက တတိယဦးစားပေး စေတီ ၃၀၀ ဆူထဲက အသေးစားထိခိုက်ပျက်စီးတဲ့ဘုရား ၂၂၄ ဆူကို ပြုပြင်ဖို့အတွက် ၀န်ကြီးဌာနကို ခွင့်ပြုချက် လျှောက်ထားဆဲဖြစ်တယ်လို့ သိရပါတယ်။

RFA Burmese
https://www.facebook.com/rfaburmese