တာချီလိတ်မြို့ ဟိုတယ်တစ်ခုတွင် သေနတ်ပစ်ခတ်မှုဖြစ်၊ တစ်ဦးသေဆုံး၊ ပစ်ခတ်သူ ထွက်ပြေးနေ


မြန်မာ - ထိုင်း နယ်စပ် တာချီလိတ်မြို့ရှိ 1G1 7Hotel ဟိုတယ်၏ ကားပါကင်တွင် လူမှုရေးကိစ္စဖြင့် စကားများပြီး သေနတ်ဖြင့် ပစ်ခတ်မှုဖြစ်ပွားရာမှ တစ်ဦးဒဏ်ရာရပြီး တစ်ဦးသေဆုံးသွားကြောင်း သိရသည်။

"လူမှုရေးကိစ္စနဲ့စကားများပြီး အခုလိုဖြစ်သွားတဲ့သဘောပါ။ တရားခံကိုတော့ အမြန်ဆုံး ဖမ်းဆီးရမိရေးအတွက် ကြိုးပမ်းဆောင်ရွက်နေပါတယ်"တာချီလိတ်မြို့နယ်ရဲစခန်းမှ တာဝန်ရှိသူ တစ်ဦးက ပြောသည်။

တာချီလိတ်မြို့ ဆန်ဆိုင်း(ခ)ရပ်ကွက်ရှိ 1G1 7Hotel ဟိုတယ် KTV သို့ နိုဝင်ဘာလ(၁၈)ရက်နေ့အကူး (၀၀း၃၀)နာရီဝန်းကျင်က မနန်းဆိုင်ဖောင်း၊ ဦးစိုင်းလုံ၊ စိုင်းဝမ်ရှီးနှင့် နန်းစီဝမ်းတို့ ရောက်ရှိလာပြီး နံနက်(၅)နာရီခွဲတွင် နေအိမ်သို့ ပြန်ရန် အဆိုပါ ဟိုတယ်ကားပါကင်သို့ ရောက်ရှိစဉ် နန်းဆိုင်ဖောင်း၏ ရည်းစားဟောင်းဖြစ်သူ စိုင်းပန် ရောက်လာကာ နန်းဆိုင်ဖောင်းနှင့် စကားပြောချင်ကြောင်းပြောရာ နန်းဆိုင်ဖောင်းမှ လက်မခံလိုကြောင်းနှင့် မပြောချင်ကြောင်း ပြောရာမှ စကားများခဲ့ခြင်းဖြစ်ကြောင်း သိရသည်။

နန်းဆိုင်ဖောင်းအပါအ၀င် (၄)ဦးသည် နေအိမ်သို့ ပြန်ရန်အတွက် ကားပေါ်သို့ တက်၍ ဟိုတယ်ကားပါကင်မှ ထွက်ခွာမည်ပြုစဉ် စိုင်းပန်က ကားရှေ့မှ သေနတ်ဖြင့် (၆)ချက်ခန့် ပစ်ခတ်ခဲ့သဖြင့် ကားအတွင်း၌ ထိုင်နေသည့် အသက်(၃၉)နှစ်ရှိ ဦးစိုင်းလုံ၏ ရင်ညွှန့်တွင် ကျည်ဖောက်ဝင် ဒဏ်ရာ (၁)ချက်ရရှိကာ အခင်းဖြစ်ပွားရာ နေရာ၌ သေဆုံးသွားခဲ့ကြောင်း သိရသည်။

အဆိုပါပစ်ခတ်မှုကြောင့် နန်းဆိုင်ဖောင်း၏ ယာဘက်ခြေသလုံးတွင် ကျည်ဝင်ဒဏ်ရာ (၂)ချက် (မစိုးရိမ်ရ) ဒဏ်ရာရရှိခဲ့ပြီး သေနတ်ဖြင့် ပစ်ခတ်သူ စိုင်းပန်မှာ ကားဖြင့် အဆိုပါနေရာမှ ထွက်ပြေးသွားခဲ့ကြောင်း သိရသည်။

ယင်းဖြစ်စဉ်များနှင့် ပတ်သက်၍ သေနတ်ဖြင့် ပစ်ခတ်ခဲ့သူ စိုင်းပန်အား ဥပဒေအရ အရေးယူ ဆောင်ရွက်နိုင်ရန် တာချီလိတ်မြို့မရဲစခန်းတွင် (ပ)၂၁၇/၂၀၁၆၊ ရာဇသတ်ကြီးပုဒ်မ ၃၀၂/၃၀၇ဖြင့် အမှုဖွင့် အရေးယူ ဆောင်ရွက်ထားရှိပြီး သေနတ်ဖြင့် ပစ်ခတ်ခဲ့သူအား အမြန်ဆုံး ဖမ်းဆီးရမိနိုင်ရန်အတွက် တာချီလိတ်ရဲတပ်ဖွဲ့မှ ကြိုးပမ်းဆောင်ရွက်နေလျှက်ရှိကြောင်း သိရသည်။

သေနတ်ဖြင့် ပစ်ခံရသူများမှာ တာချီလိတ်မြို့ မိုင်းကိုးကျေးရွာအုပ် နှင့် မယ်ခေါင်ရပ်ကွက်တွင် နေထိုင်သူများ ဖြစ်ကြောင်း သိရသည်။

Tachileik News Agency
http://www.tachileik.net
တာချီလိတ်မြို့ ဟိုတယ်တစ်ခုတွင် သေနတ်ပစ်ခတ်မှုဖြစ်၊ တစ်ဦးသေဆုံး၊ ပစ်ခတ်သူ ထွက်ပြေးနေ  တာချီလိတ်မြို့ ဟိုတယ်တစ်ခုတွင် သေနတ်ပစ်ခတ်မှုဖြစ်၊ တစ်ဦးသေဆုံး၊ ပစ်ခတ်သူ ထွက်ပြေးနေ Reviewed by THITHTOOLWIN on 18:34 Rating: 5
Powered by Blogger.