လှိုင်သာယာ(၆)ရပ်ကွက်နေပြည်သူများ၏ အသက်ပြင်းပြင်း မရှုရဲတဲ့ ဒုက္ခနှင့် ရေပုတ်မြောင်းများကိစ္စ (ပေးစာ)

ကျွန်တော်တို့(၆)ရပ်ကွက်အတွင်းရှိ နောက်ဖေးရေမြောင်းများသည် စည်းကမ်းမဲ့ဈေးသည် များ၊ အဆောင်ငှားရမ်းနေသူများနှင့် ကျူးကျော်အိမ်များကြောင့် အလွန်ညစ်ညမ်းသော အမှိုက်ကန်များသဖွယ်ဖြစ်နေပြီး၊ ရေစီးရေလာ လုံးဝမရှိတော့ဘဲ အိမ်ရှေ့လမ်းများပေါ်သို့တိုင် ညစ်ညမ်းရေများ ရောက်ရှိနေသည်မှာ ကြာပြီဖြစ်ပါသည်။

 အပေါ့၊ အလေးများကိုလည်း တွေ့ရာနေရာစွန့်နေကြပါသည်။ နောက်ဖေးလမ်းကြားအား အမှိုက်ကန်သဖွယ်အသုံးပြုနေပုံကိုလည်း ဓာတ်ပုံအထောက်အထားများဖြင့် တင်ပြအပ်ပါသည်။

အဆောင်များသည် နောက်ဖေးရေမြောင်းအားပိတ်ဆို့၍ မြေဖို့ခြင်း၊ ကွန်ကရစ်ခင်းခြင်း၊ မိလ္လာကန်များတည်ဆောက်ခြင်း၊ အိမ်သာများဆောက်လုပ်ထားခြင်း၊ ကျန်ရှိလမ်းကြားမြေပေါ်တွင် အမှိုက်များစွန့်ပစ်ခြင်းကြောင့်၊ ပိုးမွှား ခြင် ယင် ကြွက်များ အလွန်အမင်းပေါက်ပွား၍ အနံ့အသက် ဆိုးဝါးပြီး ရပ်ကွက်နေပြည်သူများ
ကျန်းမာရေးအလွန်ထိခိုက်နေရပါသည်။

 ရေမြောင်းရှင်းပေး သည်ဟုဆိုကာ မိမိတို့အဆောင်ဘက်မှ အမှိုက်များအား လူနေအိမ်များဘက်သို့ စုပုံတင်ထားသည်ကိုလည်း ဓာတ်ပုံပါအတိုင်းတွေ့ရှိရပါသည်။ တိုင်ကြားသောသူများရှိခဲ့သော်လည်း တိကျသေချာ စွာ ရှင်းလင်းပေးခြင်းမရှိဘဲ၊ ဈေးသည်များ၊ အဆောင်များမှ အားလုံးလာရောက်စွန့်ပစ်ထားသော အမှိုက်များကို အဆောင်များရှိရာဘက်မှ လူနေအိမ်များဘက်သို့ ရွှေ့ပြောင်း စုပုံထားခြင်းသာ ခံခဲ့ရပါသည်။

အချို့သောအဆောင်များသည် နောက်ဖေးမြောင်း၊ အိမ်ရှေ့မြောင်း၊ လမ်းကြားနေရာမကျန် ပိတ်ဆို့တည်ဆောက်ထားသည့်အပြင် အမှိုက်များ၊ အညစ်အကြေးများကိုလည်းတွေ့ရာ နေရာစွန့်ပစ်နေပါသဖြင့် မီးဘေးစိုးရိမ်ရခြင်း၊ ကျန်းမာရေး အလွန်အမင်းထိခိုက်ခြင်းများကြောင့် ရပ်ကွက်နေမိသားစုများမှာ အသက်ပင်ရဲရဲမရှုရဲလောက်အောင် ဆိုးရွားလာပါသဖြင့် သက်ဆိုင်ရာမှ အမြန်ဆုံး ထိရောက်စွာ ကွင်းဆင်းစစ်ဆေးဆောင်ရွက်ပေးပါရန် သစ်ထူးလွင်မှတစ်ဆင့် တင်ပြ အပ်ပါသည်။

ရပ်ကွက်နေ ပြည်သူတစ်ဦး