KBC မှ စုဆောင်းပေးသည့် KIA သင်တန်းဆင်း (၄၉) ဦးအား ဖမ်းဆီးရမိ

Photo- ဖမ်းဆီးရမိသည့် တရားခံများ

11-10-1016 By Bamaw News

KIA သောင်းကျန်းသူအဖွဲ့မှ ၂၀၁၆ ခုနှစ် စက်တင်ဘာ ၁၀ ရက်နေ့မှ အောက်တိုဘာ ၁၀ ရက်နေ့ထိ ဌာနချုပ် လိုင်ဇာတွင် ဖွင့်လှစ်သည့် ပြည်သူ့စစ်သင်တန်းအား တက်ရောက်ပြီး ယာဉ် များဖြင့် ပြန်လည် ထွက်ခွာလာသည့် အမျိုးသား(၄၃) ဦးနှင့် အမျိုးသမီး (၆) ဦး စုစုပေါင်း (၄၉) ဦးအား စိန်လုံနှင့် လွယ်ဂျယ်စစ်ဆေးရေးဂိတ်များမှ ဖမ်းဆီးရမိခဲ့တယ်လို့ သိရှိရပါသည်။

ဖမ်းဆီး ရရှိသူ (၄၉) ဦးအနက် အောက်တိုဘာလ (၁၁)ရက်နေ့  နေ့လည် ၁၁ နာရီခန့်၌ စိန်လုံ စစ်ဆေးရေးဂိတ်တွင် အမျိုးသား(၉) ဦး၊ အမျိုးသမီး(၃) ဦး စုစုပေါင်း (၁၂) ဦးနှင့် ကျန် အမျိုးသား(၃၄) ဦးနှင့် အမျိုးသမီး(၃) ဦး စုစုပေါင်း (၃၇) ဦး တို့အား လွယ်ဂျယ် စစ်ဆေးရေးဂိတ်၌ တစ်နာရီ အချိန်ခန့်မှာ ဖမ်းဆီးရမိခဲ့တာပါ။

အဆိုပါ ဖမ်းဆီးရမိသူ တရားခံအားလုံးမှာ ပူတာအို ခရိုင်တွင်းမှဖြစ်ကြပြီး ရဝမ် တိုင်းရင်းသား အများစုနှင့်
ဂျိမ်းဖောအနည်းငယ်ပါဝင်ကာ မချမ်းဘောမြို့၊ မန်နူနှစ်ခြင်းဘုရား ကျောင်း ဓမ္မ ဆရာထင်ဆိုင်းက မချမ်းဘောမြို့နယ် ဓမ္မဆရာများမှတစ်ဆင့် ကျေးရွာလူထုများအား လိုင်ဇာမြို့တွင် ဖွင့်လှစ်မည့် စိုက်ပျိုးရေးနှင့်မွေးမြူရေး သင်တန်းသို့ တက်ရောက်ကြရန်ဟု ပြောဆို၍ မြစ်ကြီးနားသို့ စည်းရုံး စုဆောင်းခံခဲ့ရတာပါ။

တရားခံများ ပူတာအိုမှ မြစ်ကြီးနားသို့ လာရောက်သည့် လေယာဉ် စီးနင်းခအား ပက်ဂျီဆန်အဖွဲ့မှ အကုန်အကျခံပေးခဲ့ကာ မြစ်ကြီးနား-လွယ်ဂျယ်-လိုင်ဇာ ခရီးစဉ်အတွက်ကိုမူ ဓမ္မဆရာ ထင်စိုင်းမှ အဓိက ဆောင်ရွက်
ပေးခဲ့တယ်လို့ သိရတယ်။

တစ်လကြာသင်ကြားရသည့် သင်တန်းမှာတော့ ကချင်သမိုင်းကြောင်း၊ စစ်ပညာနှင့် လက်နက်ကြီး သင်ခန်းစာများ၊ မိုင်းထောင် ဖောက်ခွဲခြင်းများပါ သင်ကြားခဲ့ရပြီး တစ်ဦးလျှင် ကျည်(၅) တောင့်စီ လက်တွေ့ ပစ်ခတ်လေ့ကျင့်ခဲ့ရတယ်လို့လည်း သိရှိရပါတယ်။

KIA သောင်းကျန်းသူများဟာ ရဝမ်လူမျိုးများကို မလိမ့်တပတ်ဖြင့် ဘာသာရေး ဆရာများမှ တစ်ဆင့် ခေါ်ယူခဲ့ပြီးမိုင်းထောင် ဖောက်ခွဲ ပစ်ခတ်ခြင်းများ သင်ကြားပေးခြင်းမှာ တိုက်ပွဲများတွင် ဂျိမ်းဖောလူမျိုးများအစား ရဝမ်မျိုးနွယ်စုများကိုပါ ရှေ့တန်းကျကျ အသုံးချရန် ရည်ရွယ်ခြင်းဖြစ်တယ်ဟု သုံးသပ်ရပြီး ဖမ်းဆီးရမိသူများကိုတော့ တပ်မတော်မှ တရားဥပဒေအတိုင်း အရေးယူနိုင်ရေး ဆောင်ရွက် သွားမယ်လို့ သတင်းရရှိပါသည်။

By Bamaw News