ရေမဆေးကျောက်တူးဖော်သူတွေကို သက်သေခံစိစစ်ရေးကဒ် ထုတ်ပေးမည်

ကချင်ပြည်နယ် လုံးခင်း-ဖားကန့်နယ်မြေမှာ တစ်နိုင်တစ်ပိုင်လုပ်ကိုင်စားသောက်နေတဲ့ ရေမဆေးကျောက်ရှာဖွေသူ တစ်ဦးကို တွေ့ရစဉ်။ Photo: Kyaw Myo Min/RFA

ကချင်ပြည်နယ် ဖားကန့်ကျောက်စိမ်းတွင်းဒေသမှာ တနိုင်တပိုင် ရေမဆေးကျောက် တူးဖော်လုပ်ကိုင်နေသူတွေကို သက်သေခံစိစစ်ရေးကဒ်ပြားတွေ လုပ်ဆောင်ပေးဖို့ လွှတ်တော်ကိုယ်စားလှယ်တွေနဲ့ အုပ်ချုပ်ရေးအဖွဲ့တွေ စီစဉ်နေပါတယ်။

ရေမဆေးသမားတစ်ဦးချင်းစီအတွက် သက်သေခံကဒ်ပြားတွေကို အခမဲ့လုပ်ဆောင်ပေးဖို့ ကျောက်မျက်လုပ်ငန်းရှင်များအသင်းက တာဝန်ယူထားပြီး အုပ်ချုပ်ရေးအဖွဲ့တွေနဲ့ ညှိနှိုင်းတိုင်ပင်နေတယ်လို့ ဖားကန့်မြို့နယ် ပြည်သူ့လွှတ်တော် ကိုယ်စားလှယ် ဦးတင့်စိုး က ပြောပါတယ်။

သက်သေခံကဒ်ပြားတွေမှာ ရေမဆေးသမားတစ်ဦးချင်းစီရဲ့ အမည်၊ မှတ်ပုံတင်၊ နေရပ်စတဲ့ ကိုယ်ရေးအချက်အလက်တွေကို ထည့်သွင်းပေးမှာဖြစ်ပါတယ်။

ဖားကန့်မြို့နယ် ပြည်သူ့လွှတ်တော်ကိုယ်စားလှယ်နဲ့ ပြည်နယ်လွှတ်တော် ကိုယ်စားလှယ်တို့ဟာ အုပ်ချုပ်ရေးအဖွဲ့တွေ၊ ကျောက်မျက်လုပ်ငန်းရှင်တွေ၊ ရေမဆေးကျောက် ရှာဖွေတူးဖော်နေသူတွေ နဲ့ ကွင်းဆင်းညှိနှိုင်းတိုင်ပင်ပြီး သက်သေခံကဒ်ပြားတွေ ထုတ်ပေးဖို့ စီစဉ်ခဲ့တာဖြစ်ပါတယ်။

ဒါ့အပြင် တနိုင်တပိုင် တူးဖော်လုပ်ကိုင်ကြသူတွေနဲ့ ကုမ္ပဏီတွေကြားမှာ အပြန်အလှန်နားလည်မှုရှိရှိ လုပ်ကိုင်နိုင်ဖို့ ညှိနှိုင်းပေးတာအပြင် မြန်မာ့ကျောက်မျက်ရတနာဥပဒေကို ပြင်ဆင်နိုင်ရေးအတွက်လည်း ကွင်းဆင်းလေ့လာနေကြတာဖြစ်ပါတယ်။

ဖားကန့်ကျောက်စိမ်းတွင်းဒေသမှာ တနိုင်ငံလုံးက ရွှေ့ပြောင်းလာရောက်လုပ်ကိုင်နေသူတွေဟာ နှစ်သိန်းဝန်းကျင်ရှိနိုင်တယ်လို့ ခန့်မှန်းထားပေမယ့် အခုလို သက်သေခံကဒ်ပြားတွေနဲ့ စိစစ်ဆောင်ရွက်ပြီးမှသာ မှန်ကန်တဲ့ စာရင်းအချက်အလက်တွေကို ရနိုင်မှာဖြစ်ပါတယ်။

RFA Burmese
http://www.rfa.org/burmese