မန္တလေးတိုင်းဒေသကြီး ဝမ်းတွင်းမြို့နယ် ရွှေတောင်ကျေးရွာရှိ ရန်ကုန် - မန္တလေး လမ်းဟောင်းတွင် ယာခင်းမှ နွားဆွဲပြန်လာသူ အမျိုးသားနှစ်ဦးအား နောက်ကျောမှ ကားဖြင့် မတော်တဆ ဝင်တိုက်မိသဖြင့် လူနှစ်ဦးလုံး သေဆုံးပြီး နွားတစ်ကောင် ပေါင်ကျိုးသွားကြောင်း သိရသည်။
“နွားကတော့ ပေါင်ကျိုးသွားတယ်။ လူနှစ်ဦးကတော့ နေရာမှာ ပွဲချင်းပြီး သေဆုံးခဲ့တယ်။ လူနှစ်ဦးကလည်း တောင်ဘက် မျက်နှာမူပြီး ငရုတ်ခင်းက ပြန်လာတာ။ ကင်တာကားနဲ့ လားရာဘက် အတူတူပါပဲ။ အရှိန်ပြင်းလွန်းတော့ နေရာမှာပဲ နှစ်ဦးလုံးသေသွားတယ်”ဟု ရွှေတောင်ကျေးရွာနေ ဦးကြည်မြင့်က ပြောသည်။
အဆိုပါ ယာဉ်တိုက်မှုမှာ စက်တင်ဘာလ (၃၀) ရက် နေ့လယ် (၁၂) နာရီက ဖြစ်ပွားခဲ့ပြီး၊ ရွှေတောင်ကျေးရွာမှ အသက် (၃၅)နှစ်အရွယ် ကိုဆန်းဝင်းနှင့် အသက် (၄၇)နှစ်အရွယ် ကိုမောင်လွင် (ခ)ရှင်ကြီးတို့ သေဆုံးသွားကြောင်း သိရသည်။
"ကားမောင်းလာတဲ့ အရှိန်က သိပ်မြန်လွန်းတော့ ဖြစ်လိုက်တာ မျက်စိတမှိတ်ပဲဗျာ၊ လူနှစ်ယောက်လုံး သေသွားတယ်၊ မြင်မကောင်းဖူး"ဟု ဒေသခံ ကိုအုန်းကြိုင်က ပြောသည်။
ယာဉ်တိုက်မှုနှင့် ပတ်သက်၍ အသက် (၄၁)နှစ်အရွယ် ယာဉ်မောင်း ကိုအောင်မင်းအား ရွှေတောင်နယ်မြေရဲစခန်းတွင် ယာဉ်(ပ)၁၃/၂၀၁၆ ယာဉ်မဆင်မခြင် မောင်းနှင်၍ လူသေစေမှု ပုဒ်မ ၃၀၄ (က)ဖြင့် အမှုဖွင့်ဆောင်ရွက်ထားကြောင်း သိရသည်။
သတင်း/ဓာတ်ပုံ - ကိုလင်း(TNA)
Tachileik News Agency
http://www.tachileik.net
ဝမ်းတွင်း၌ နောက်ကျောမှ ယာဉ်ဝင်တိုက်မှုကြောင့် လူနှစ်ဦးသေဆုံး နွားတစ်ကောင်ပေါင်ကျိုး
Reviewed by THITHTOOLWIN
on
11:01
Rating: