အီရတ်က အမေရိကန်တပ်စခန်း ကန့်ဓါတ်ငွေ့ဒဏ် ကာကွယ်နေရ

နှစ်ရက်ဆက် ပြန့်နေတဲ့ ကန့်ဓါတ်ငွေ့တွေ
အီရတ်က ကိုင်ယာရာလေတပ်စခန်းကို ဦးတည်လာတဲ့ ကန့်ဓါတ်အဆိပ်ငွေ့တွေကြောင့် အမေရိကန်တပ်သားတွေ ဓါတ်ငွေ့ကာ မျက်နှာဖုံးတွေနဲ့ ကာကွယ်ထားရပါတယ်။

မိုဆိုးမြို့တောင်ဘက်က အယ်မစ်ရှရက်ဒေသမှာရှိတဲ့ ကန့်ဓါတ်ထုတ် စက်ရုံတရုံကို အိုင်အက်စ်အဖွဲ့တွေက မနေ့က ဖောက်ခွဲလိုက်တဲ့အတွက် အခုလို အဆိပ်ငွေ့တွေ ထွက်လာတာ ဖြစ်ပါတယ်။

မိုဆိုးမြို့သိမ်းတိုက်ပွဲခြောက်ရက်မြောက်နေ့အတွင်း မိုဆိုးမြို့ကနေ ကီလိုမီတာ ၂၀ကွာတဲ့ ကာရာကို့ရ်ှမှာ တိုက်ပွဲအပြင်းထန်ဆုံးဖြစ်နေပါတယ်။

အဲဒီ့နေရာမှာ အီရတ်စစ်တပ်က နိုင်ငံ့အလံ လွှင့်ထူနိုင်ခဲ့ပေမယ့် အစ္စလမ်မစ်နိုင်ငံအဖွဲ့ရဲ့ ပြန်လည် တိုက်ခိုက်မှုတွေလည်း ကြုံနေရပါတယ်။

အမေရိကန် ကာကွယ်ရေးဝန်ကြီး အက်ရ်ှကာတာဟာ အီရတ်နိုင်ငံက မိုဆိုးမြို့သိမ်းတိုက်ပွဲ အခြေအနေကို စစ်ဆေးဖို့အတွက် အီရတ်နိုင်ငံကို ရောက်ရှိနေပါတယ်။

မိုဆိုးတိုက်ပွဲဖြစ်စဉ်မှာ တူရကီတပ်တွေပါဖို့ မလိုအပ်သေးကြောင်း အီရတ်ဝန်ကြီးချုပ် ဟိုင်ဒါ အယ်အဘာဒီက မစ္စတာ ကာတာနဲ့ တွေ့ဆုံတဲ့အချိန်မှာ ပြောဆိုလိုက်ပါတယ်။

တူရကီနိုင်ငံကတော့ တိုက်ပွဲဖြစ်စဉ်မှာ သူလည်း ပါသင့်တယ်လို့ ပြောဆိုထားတဲ့အတွက် အီရတ်နဲ့ အခြေအနေတင်းမာမှုတချို့ ရှိနေပါတယ်။

မိုဆိုးမြို့သိမ်းတိုက်ပွဲမှာ အီရတ်စစ်တပ်နဲ့ အမေရိကန်ဦးဆောင်တဲ့ ညွန့်ပေါင်းတပ်တွေအပြင် ကာ့ဒ်တပ်ဖွဲ့တွေလည်း ပါဝင်နေပါတယ်။

BBC Burmese
http://www.bbc.com/burmese
အီရတ်က အမေရိကန်တပ်စခန်း ကန့်ဓါတ်ငွေ့ဒဏ် ကာကွယ်နေရ  အီရတ်က အမေရိကန်တပ်စခန်း ကန့်ဓါတ်ငွေ့ဒဏ် ကာကွယ်နေရ Reviewed by THITHTOOLWIN on 21:48 Rating: 5
Powered by Blogger.