ရွှေပြည်သာလွှတ်တော်အမတ် အပြုအမူအပေါ် တုံ့ပြန်မှု


ပြည်သူ့လွှတ်တော်ကိုယ်စားလှယ်တဦးဟာ ဂုဏ်သိက္ခာနဲ့အညီ ပြောဆိုဆက်ခံခြင်းမရှိဘဲ၊ တာဝန် လုပ်ပိုင်ခွင့်တွေကို အလွဲသုံးစားလုပ်ပြီး ခြိမ်းခြောက်မှုတွေ လုပ်လာတဲ့အခါမျိုးမှာ သက်ဆိုင်ရာ မဲဆန္ဒရှင်တွေအနေနဲ့ အဲဒီလွှတ်တော်ကိုယ်စားလှယ်ရဲ့ တာဝန်တွေကို ပြန်ရုပ်သိမ်းပေးဖို့ ရွေးကောက်ပွဲကော်မရှင်ကို တိုင်ကြား တောင်းဆိုနိုင်တယ်လို့ ဥပဒေပညာရှင်တချို့က သုံးသပ်ပါတယ်။ ရန်ကုန် ရွှေပြည်သာမြို့နယ်က မိုတယ်တခုကို NLD ပြည်သူ့လွှတ်တော် ကိုယ်စားလှယ်တဦးနဲ့ အပေါင်းအပါတွေက လာရောက် ဆဲဆိုခြိမ်းခြောက်တယ်ဆိုပြီး ရဲစခန်းမှာ အမှု ဖွင့်ထားတဲ့ကိစ္စ လူမှုမီဒီယာတွေပေါ် ပျံ့နှံ့လာအပြီး အခုလို ပြောဆိုလိုက်တာပါ။ အကြောင်းစုံကို ကိုဉာဏ်ဝင်းအောင်က တင်ပြပါမယ်။

ရန်ကုန် ရွှေပြည်သာမြို့နယ် ၈ ရပ်ကွက်မှာရှိတဲ့ ရွှေပြည်သာမိုတယ်ကို အောက်တိုဘာလ ၁ ရက်နေ့ ညသန်းခေါင်မတိုင်ခင်အချိန် လာရောက် ဆဲဆို ခြိမ်းခြောက်တယ်ဆိုပြီး ရွှေပြည်သာမြို့နယ် NLD ပြည်သူ့လွှတ်တော်ကိုယ်စားလှယ် ဦးဉာဏ်လင်းနဲ့ အပေါင်းပါနှစ်ဦးကို၊ ပုဒ်မ ၃ ခုနဲ့ မိုတယ်မန်နေဂျာက ရွှေပြည်သာမြို့မရဲစခန်းမှာ အမှုဖွင့်ထားပါတယ်။ အမှုဖွင့်ချိန်မှာ CCTV ရုပ်သံမှတ်တမ်း အထောက်ထားတွေ တင်ပြထားတယ်လို့ ဆိုပါတယ်။ လွှတ်တော်အမတ် ဦးဉာဏ်လင်းကတော့ ဒီမိုတယ်ဟာ ဥပဒေနဲ့ မညီတာတွေကို လုပ်ကိုင်နေတာကြောင့် ရပ်ကွက်က တိုင်ကြားထားလို့ ၀င်ရောက်စစ်ဆေးဖို့ အဲဒီမိုတယ်ကို သွားရောက်ခြင်းသာဖြစ်ကြောင်း သတင်းဌာနတွေကို ရှင်းပြခဲ့ပါတယ်။

“ကျနော် နဂိုကတည်းက ဒီကိုသွားတဲ့ ရည်ရွယ်ချက်ကိုက လေ့လာဖို့၊ တိုင်တဲ့တောတဲ့သူတွေ လုပ်သလို တကယ်ပဲ ပြစ်မှုတွေ ကျူးလွန်နေသလား၊ တံခါးပိတ်ပြီးတော့ နောက်ကွယ်မှာ မူးယစ်ဆေးဝါးမှုတွေ ဖြစ်နေသလား။ ခုနပြောသလို အမျိုးသမီးငယ်တွေကိုလည်း သူတို့ပြောသလို ဖျက်ဆီးနေတာလား။ ဒါလေးကို ကျနော် ကြည့်ဖို့သွားတာ။”

ဦးဉာဏ်လင်းနဲ့ပါလာသူ ရပ်ကွက်အုပ်ချုပ်ရေးမှူးနဲ့ အခြားတဦးတို့ဟာ ရွှေပြည်သာမိုတယ်မှာ ကာရာအိုကေ သီချင်းဆိုဖို့ လာရောက်ခဲ့တာဖြစ်ပြီး၊ ကာရာအိုဆိုဖို့ ၀င်ခွင့်မပေးတဲ့အပေါ် မိုတယ်ဝန်ထမ်းတွေကို ၀ိုင်းဝန်းဆဲဆို ခြိမ်းခြောက်ကြကြောင်း မိုတယ်မန်နေဂျာ မသင်းစံပယ်က မီဒီယာတွေကို ရှင်းပြပါတယ်။

“အကိုတို့က ဘာကိစ္စရှိလို့ပါလဲမေးတော့ ကာရာအိုကေဆိုမယ်လို့ပြောတာနဲ့ ကာရာအိုကေမရဘူးအကို၊ ပိတ်ထားပါတယ်။ မရဘူး ငါတို့ကို တံခါးဖွင့်ပေး၊ ငါတို့ ဘယ်သူလဲသိလားလို့ သူတို့က ပြောပါတယ်။ နင်တို့က အထဲမှာ တံခါးတွေပိတ်ပြီး ဘာမဟုတ်တန်းတွေ လုပ်နေလဲလို့ ကျမကို အဲလိုမျိုး စွပ်စွဲပါတယ်။ အဲဒီအချိန်မှာ ဦးဉာဏ်လင်းဆိုတဲ့လူက ဖုန်းဆက်ပါတယ်။ ဘယ်သူ့ကို ဆက်မှန်းမသိပါဘူး။ အရပ်ပုပုနဲ့လူက ကျမကို ဆဲရေးတိုင်းထွာ ပြောဆိုပါတယ်။ ဦးဉာဏ်လင်း ဆိုတဲ့လူကလည်း ငါ ဘယ်သူလဲ နင်တို့သိလား သူ အဲ့အချိန်မှာ ဖုန်းခေါ်တယ်။ ဘယ်သူ့ကိုခေါ်လဲတော့ ကျမမသိဘူး။ ဖုန်းခေါ်တဲ့အချိန်မှာ ပြောပါတယ်။ ငါတို့ ရွှေပြည်သာမိုတယ်မှာ ရောက်နေတယ်။ လာခဲ့ အခု။ ငါတို့ ဒီဟိုတယ်ကို မြေလှန်ပစ်လိုက်မယ်။ သိန်း ၁၀၀ ပေးရင်တောင် မရဘူး။ မြေလှန်ပစ်လိုက်မယ်လို့ ကျမဟိုတယ်ကို လာခြိမ်းခြောက်ပါတယ်။”

လွှတ်တော်အမတ် ဦးဉာဏ်လင်းပေါ် စွဲဆိုထားတဲ့ အမှုနဲ့ပတ်သက်လို့ ရဲစခန်းက ဘယ်လို ကိုင်တွယ်ဖြေရှင်းမလဲ ဆိုတာကတော့ ရှင်းရှင်းလင်းလင်း မသိရသေးပါဘူး။ NLD ပါတီ ဗဟိုအလုပ်မှုဆောင်လည်းဖြစ် ပြောခွင့်ရလည်းဖြစ်တဲ့ ဦးဝင်းထိန်ကတော့ ဒီကိစ္စမှာ ပါတီက ဘာမှ ၀င်ရောက် စွက်ဖက်မှာ မဟုတ်ဘူးလို့ အောက်တိုဘာ ၄ ရက် နေပြည်တော်မှာ သတင်းထောက်တွေကို ပြောခဲ့ပါတယ်။

“အဲဒါကတော့ တရားဥပဒေအတိုင်းပဲ။ တရားဥပဒေအတိုင်းပဲ လုပ်မယ်။ ဘာမှ ၀င်စွက်စရာ အကြောင်းမရှိဘူး။”

ရှေ့နေတဦးလည်းဖြစ်တဲ့ လွှတ်တော်အမတ် ဦးဥာဏ်လင်းကို ပါတီစည်းမျဉ်းစည်းကမ်းတွေအရ အရေးယူခဲ့ရင်တောင် ပါတီတာဝန်တွေ ရပ် ဆိုင်းခံရတာမျိုး၊ နောက်ဆုံး ပါတီဝင်အဖြစ်ကနေ ထုတ်ပယ်တာမျိုး လုပ်နိုင်ပေမယ့်၊ ရွေးကောက်ပွဲမှာ ပြည်သူက မဲပေးတင်မြှောက်ထားတဲ့ ကိုယ်စားလှယ်တဦးကိုတော့ လွှတ်တော်ကနေ အလွယ်တကူ ဖယ်ရှားလို့ မရနိုင်ပါဘူး။ ဘယ်လိုအခြေအနေတွေနဲ့ ကိုက်ညီခဲ့ရင် လွှတ်တော် ကိုယ်စားလှယ် တာဝန်တွေ ပြန်အရုပ်သိမ်းခံရမှာပါလဲ၊ ဥပဒေပညာရှင် ရှေ့နေကြီး ဦးအောင်သိန်းက ခုလိုရှင်းပြပါတယ်။

“လွှတ်တော်ကိုယ်စားလှယ် တဦးနဲ့ ပတ်သက်ပြီးတော့ အရေးယူဆောင်ရွက်နိုင်တာတွေကို ဖွဲ့စည်းပုံမှာလည်း ပြဌာန်းထားတယ်၊ လွှတ်တော်ကိုယ်စားလှယ်များရဲ့ ကျင့်ဝတ်သိက္ခာနဲ့ ပတ်သက်ပြီးတော့လည်း ဥပဒေ၊ နည်းဥပဒေတွေလည်း ရှိတာပေါ့။ အဲဒီတော့ ဒီ ဖွဲ့စည်းပုံအခြေခံ ဥပဒေပုဒ်မ ၃၉၆(က) ကနေ (င) အထိမှာဆိုရင်တော့ ကိုယ်စားလှယ်ရဲ့ အရည်အချင်း ချို့ယွင်းပျက်ကွက်မှုနဲ့ ပတ်သက်ပြီးတော့ သတ်မှတ်ထားတာတွေ ရှိတယ်ပေါ့။ နောက်တခါ ပြည်သူ့လွှတ်တော်ဆိုင်ရာ ဥပဒေ/ နည်းဥပဒေမှာ ကျင့်ဝတ်ပိုင်းနဲ့ ပတ်သက်ပြီး ပြဌာန်းချက်တွေ ရှိတယ်ဗျ၊ လွှတ်တော်ကိုယ်စားလှယ် တယောက်က သူ့ရဲ့ဂုဏ်သိက္ခာနဲ့အညီ ကျင့်ကြံဆောင်ရွက်ခြင်း မရှိဘဲနဲ့ ကိုယ်ကျုိးရှာ လုပ်ပိုင်ခွင့်နဲ့ လာဘ်ပေးလာဘ်ယူမှုတွေ၊ ခြိမ်းခြောက်ပြောဆိုမှုတွေ ရှိလာလို့ရှိရင် အဲဒီဥပဒေနဲ့ ငြိစွန်းတယ်ဆိုတာ ကျနော်တို့ တွေ့ရှိရပါတယ်”

ဖွဲ့စည်းပုံ အခြေခံဥပဒေပုဒ်မ ၃၉၆ လွှတ်တော်ကိုယ်စားလှယ် တာဝန်မှ ပြည်လည်ရုပ်သိမ်းခြင်းမှာ နိုင်ငံတော်ကို သစ္စာဖေါက်ခြင်း၊ ဖွဲ့စည်း ပုံ ဥပဒေပါ တချက်ချက်ကို ဖေါက်ဖျက်ခြင်း၊ အကျင့်သိက္ခာပျက်ပြားခြင်း၊ လွှတ်တော်ကိုယ်စားလှယ်၏ အရည်အချင်း ပျက်ယွင်းခြင်းတွေ ဖေါ် ပြထားပြီး၊ ကိုယ်စားလှယ်တဦးကို တာဝန်မှ ရုပ်သိမ်းပေးဖို့ မိမိမဲဆန္ဒနယ်က တစ်ရာခိုင်းနှုန်းသော ပြည်သူတွေက ရွေးကောက်ပွဲကော်မရှင် ကို တင်ပြလာခဲ့ရင် ကော်မရှင်က ဆက်လက်စစ်ဆေး အရေးယူနိုင်တယ်လို့ ဖေါ်ပြထားပါတယ်။ ပြည်သူ့လွှတ်တော်ဆိုင်ရာ ဥပဒေ/ နည်းဥပဒေ အခန်း(၃)မှာတော့ ကိုယ်စားလှယ်တဦးဟာ ဂုဏ်သိက္ခာနဲ့အညီ ပြောဆိုဆက်ခံရမယ်၊ လုပ်ပိုင် ခွင့်တွေကို အလွဲသုံးစားလုပ်ပြီး ခြိမ်းခြောက်မှုတွေ ရှောင်ကြဉ်ရမယ်လို့ ပြဌာန်းထားပြီး၊ အခန်း(၁၄)မှာတော့ ပြည်သူ့လွှတ်တော်ဆိုင်ရာ ဥပဒေ နည်းဥပဒေတွေအရ လွှတ်တော်ကိုယ်စားလှယ်တဦးကို တာဝန်က ရပ်စဲနိုင်ကြောင်း ဖော်ပြထားပါတယ်။

 ကိုဉာဏ်ဝင်းအောင် / ဗွီအိုအေ (မြန်မာပိုင်း)
http://burmese.voanews.com

မှတ်ချက်ရေးသားလိုတဲ့ စာဖတ်ပရိတ်များ တောင်းဆိုချက်အရ ဖွင့်ပေးလိုက်ပါပြီ။ မှတ်ချက်များ ရေးသားနိုင်ပါပြီ။

အချိန်နဲ့ တပြေးညီ သတင်းများ ဖတ်ရှုနိုင်ဖို့  facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့ နိုင်ပါသည်။
နောက်ဆုံးရ သတင်းများကို အောက်ပါ Tweets မှာ ဖော်ပြထားပါတယ်။ Tweets ရဲ့ ဘေးဘောင်တန်းကို ဆွဲချပြီ မိမိတို့ စိတ်ဝင်စားတဲ့ သတင်းခေါင်းစဉ် အောက်က Link ကို နှိပ်ပြီ အပြည့်အစုံဖတ်ရှုနိုင်ပါတယ်။
 

Advertisement

 

သင်ရဲ့မိတ်ဆွေတွေ ဘာတွေဖတ်သလဲ စိတ်ဝင်စားသလဲ

အသစ် တင်သမျှ သတင်းများ အလို အလျှောက်ပို့  ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ

သတင်းစာနှင့် ဂျာနယ်များ