ယီမင်နိုင်ငံက ဟူသီသူပုန်ပစ်မှတ်တွေအပေါ် တိုက်ခိုက်နေတဲ့ Saudi Arabia နိုင်ငံဦးဆောင်တဲ့ လေကြောင်း တိုက်ခိုက်မှုတခုအတွင်း ယီမင်မြောက်ပိုင်း Hajja ပြည်နယ်က ဆေးရုံတခုကို ထိမှန်ခဲ့ပြီး ၁၀ ယောက်ထက် မနည်းသေဆုံးခဲ့ပါတယ်။
၁၁ ယောက်သေဆုံးပြီး ၁၉ ယောက် ထိခိုက်ဒဏ်ရာရခဲ့တယ်လို့ နယ်စည်းမခြားဆရာဝန်များ ပရဟိတအဖွဲ့ MSF ကပြောပါတယ်။ အဲဒီဆေးရုံဟာ MSF က ဆရာဝန်တွေ ဆေးဝန်ထမ်းတွေ ကြီးကြပ်ကုသပေးနေတဲ့ ဆေးရုံဖြစ်ပါတယ်။ စနေနေ့တုန်းကလည်း လေကြောင်းတိုက်ခိုက်မှုအတွင်း အိမ်နီးချင်း Saada ပြည်နယ်က ကျောင်းတခုထိမှန်ခဲ့တဲ့အတွက် ၁၀ ယောက်သေဆုံးပြီး နောက်ထပ် ၂၈ ယောက်ဒဏ်ရာရခဲ့ပါတယ်။ သေဆုံးခဲ့သူတွေဟာ အသက် ၈ နှစ်ကနေ ၁၅ နှစ်ကြား ဖြစ်တယ်လို့ MSF က ပြောပါတယ်။
အဲဒီတိုက်ခိုက်မှုအပေါ် ကုလသမဂ္ဂအတွင်းရေးမှူးချုပ် Ban Ki-moon က ပြစ်တင်ဝေဖန်ခဲ့ပါတယ်။ယီမင်နိုင်ငံမှာ ဟူသီသူပုန်တွေကြောင့် သမ္မတ Abdu Rabu Mansour Hadi ရဲ့ အစိုးရအဖွဲ့ မြို့တော်ထဲကနေ ထွက်သွားခဲ့ရပြီးနောက် သမ္မတကို ထောက်ခံတဲ့အနေနဲ့ Saudi ဦးဆောင်တဲ့ မဟာမိတ်တွေက လေကြာင်းတိုက်ခိုက်မှုတွေကို ၂၀၁၅ ခုနှစ်ထဲက စတင်ပြုလုပ်နေတာဖြစ်ပါတယ်။
ဗွီအိုအေ (မြန်မာပိုင်း)
http://burmese.voanews.com
ဆော်ဒီညွှန့်ပေါင်းတပ် ဗုံးကျဲမှု ယီမင် ရှိ MSF ဆေးရုံ ထိမှန်
Reviewed by THITHTOOLWIN
on
08:07
Rating: