ရှမ်းပြည်နယ် တောင်ကြီးမြို့မှာ ဖမ်းဆီးရမိတဲ့ မူးယစ်ဆေးဝါးများကို မီးရှို့ဖျက်ဆီးနေစဉ်။ Photo: RFA |
ရှမ်းပြည်နယ်မြောက်ပိုင်းအတွင်း မူးယစ်ဆေးဝါးကို အုပ်စုလိုက်သုံးစွဲမှုတွေ ရှိနေတဲ့အတွက် မူးယစ်ဆေးဝါး အန္တရာယ် ပညာပေးမှုတွေ၊ ပြန်လည်ပြုစုရေးစခန်းတွေ ဖွင့်လှစ်ပေးဖို့ တိုက်တွန်းကြောင်း အဆိုကို ကိုယ်စားလှယ် ၈ ဦး ဆွေးနွေးအပြီးမှာ ပြည်ထဲရေးဝန်ကြီးဌာန ဒုတိယ၀န်ကြီး ဗိုလ်ချုပ်အောင်စိုးက မူးယစ်တိုက်ဖျက်ရေး ဆောင် ရွက်နိုင်ဖို့အတွက် လိုအပ်တာတွေကို ရှင်းလင်းပြောကြားခဲ့တာဖြစ်ပါတယ်။
မူးယစ်ဆေးဝါးထွက်ရှိတဲ့ အရင်းအမြစ်နေရာတွေဟာ ဥပဒေလက်လှမ်းမမီတဲ့ နေရာတွေဖြစ်တဲ့အတွက် တပ်မတော်နဲ့ ပူးပေါင်းဆောင်ရွက်နေကြောင်း၊ သီးခြားမူးယစ်ဆေးဝါး စစ်ဆင်ရေးတွေ ဆောင်ရွက်နေကြောင်း လည်း ဒုတိယ၀န်ကြီး ဗိုလ်ချုပ်အောင်စိုး က ပြောခဲ့ပါတယ်။
ဆွေးနွေးခဲ့တဲ့ ကိုယ်စားလှယ်တွေက မူးယစ်ဆေးဝါးအမှုတွေနဲ့ ပတ်သက်တဲ့ ဥပဒေတွေကို ပြင်ဆင်ဖို့လိုကြောင်း၊ သုံးစွဲသူတွေကို အရေးယူတာထက် ပြန်လည်ထူထောင်ရေးကို ဦးစားပေးလုပ်ဖို့ လိုအပ်ကြောင်းတို့ကို ဆွေးနွေးခဲ့ ကြပါတယ်။
မူးယစ်ဆေးဝါးဟာ မြန်မာနိုင်ငံ အနှံ့အပြားမှာ ဖြစ်ပွားနေတာဖြစ်တဲ့အတွက် မူလအဆိုမှာပါတဲ့ ရှမ်းပြည် နယ် မြောက်ပိုင်းအစား မြန်မာတစ်နိုင်ငံလုံးလို့ ပြင်ဆင်သင့်ကြောင်း အမျိုးသားလွှတ်တော် ဥက္ကဌ မန်းဝင်းခိုင်သန်း က အကြံပြုခဲ့ပါတယ်။
အဲဒီအဆိုကို အမျိုးသားလွှတ်တော်ဥက္ကဌ ဦးမန်းဝင်းခိုင်သန်း ပြင်ဆင်တဲ့အတိုင်း အဆိုတင်သွင်းတဲ့ ကိုယ်စားလှယ် ဦးစိုင်းဝမ်းလှိုင်းခမ်း က လက်ခံခဲ့ပါတယ်။
ပြင်ဆင်လိုက်တဲ့ အဆိုအရ မြန်မာတစ်နိုင်ငံလုံးမှာ မူးယစ်ဆေးဝါးရောင်းဝယ်ဖောက်ကားမှုတွေကို ဖမ်းဆီး အရေးယူဖို့၊ မူးယစ်ဆေးဝါးအန္တရာယ် အသိပညာပေးတာတွေ၊ မူးယစ်ဆေးသုံးစွဲသူတွေအတွက် ပြန်လည် ထူထောင်ရေးစင်တာတွေ ဖွင့်လှစ်ပေးဖို့ အဆိုကို ထောက်ခံသူဦးရေ ၂၀၀ ရှိတာကြောင့် လွှတ်တော်က အတည်ပြုလိုက်ပါတယ်။
RFA Burmese
http://www.rfa.org/burmese
မူးယစ်ဆေးဝါးကို တစ်နိုင်ငံလုံး အတိုင်းအတာနဲ့ တိုက်ဖျက်ဖို့ ဆုံးဖြတ်
Reviewed by THITHTOOLWIN
on
21:57
Rating: