မဘသ ဆက်လက်ရပ်တည်နိုင် မလား ဆိုတာ ၀န်ကြီးပြော

ရန်ကုန်မြို့ ကမ္ဘာအေးကုန်းမြေ ၀ိဇယမင်္ဂလာဓမ္မသဘင်မှာ ကျင်းပတဲ့ နိုင်ငံတော်သံဃမဟာနာယက (မဟန) အစည်းအဝေးပွဲကို တက်ရောက်လာတဲ့ သာသနာရေးဝန်ကြီး သူရဦးအောင်ကို ကို ဇူလိုင်လ ၁၃ ရက်နေ့က တွေ့ရစဉ်။ Photo: Aung Thain Kha/ RFA

မဘသအဖွဲ့အနေနဲ့ ဒီမိုကရေစီကို နောက်ပြန်သွားလိုပြီး အာဏာရှင်စနစ်ကို အသက် သွင်းလိုတဲ့ လူပုဂ္ဂိုလ် တစ်စု တစ်ဖွဲ့ရဲ့ အသုံးချခြင်းကို မခံဘူးဆိုရင် ၊ ( Hate Speech ) အမုန်းပွားစေတဲ့စကားတွေ မပြောဘူး ဆိုရင် အမျိုးသားရေး အဖွဲ့တစ်ဖွဲ့အနေနဲ့ ရေရှည် ရပ်တည်နိုင်မယ်လို့ ယုံကြည်ကြောင်း သာသနာရေးဝန်ကြီး သူရဦးအောင်ကို က RFA ကို ပြောပါတယ်။

ဒီကနေ့ရန်ကုန်မြို့ ကမ္ဘာအေးကုန်းမြေ ၀ိဇယမင်္ဂလာဓမ္မသဘင်မှာ ကျင်းပတဲ့ နိုင်ငံတော်သံဃမဟာနာယက (မဟန) အစည်းအဝေးပွဲကို တက်ရောက်လာစဉ် RFAက မေးမြန်းရာမှာ ဖြေကြားခဲ့တာဖြစ်ပါတယ်။

"တစ်ခုပဲရှိတာပေါ့၊ မဘသအဖွဲ့အနေနဲ့ ဒီမိုကရေစီကိုနောက်ပြန်သွားလို့တဲ့ အာဏာရှင်စနစ်ကိုပြန်လည်အသက်သွင်းလိုတဲ့ လူပုဂ္ဂိုလ်တစ်စုတစ်ဖွဲ့ ရဲ့လက်ကိုင်တုတ်အနေနဲ့ အသုံးချခြင်းမခံဘူးဆိုရင်တော့ ရေရှည်ရပ်တည်နိုင်တဲ့ လူမှုရေး၊ အမျိုးသားရေးအဖွဲ့တစ်ဖွဲ့အဖြစ်နဲ့ ရပ်တည်နိုင်မယ်လို့ ယုံကြည်ပါတယ်၊ မဘသအနေနဲ့ အားလုံးမဟုတ်ပါဘူး၊ ကြည်ညိုလေးစားဖွယ်ရာ၊ ထည်ကြီး၊ ဝါကြီးသံဃာတော်တွေအများကြီးပါပါတယ်၊ တချို့လည်း ဘာသာတစ်ခုကြား၊ ဘာသာကိုအခြေခံပြီးလူမျိုးတစ်ခုနဲ့ တစ်ခုကြား၊ ပဋိပက္ခဖြစ်ဖို့ အမုန်းစကားတွေမဖြန့်ဘူးဆိုရင် ဘာသာရေးကိုအခြေခံတဲ့ လူမှုရေးအဖွဲ့ အစည်းတစ်ရပ်အနေနဲ့ ရေရှည်ရပ်တည်သွားနိုင်မယ်လို့ ယုံကြည်ပါတယ်၊ "

၂၀၀၈ ဖွဲ့စည်းပုံ အခြေခံဥပဒေမှာ ဘာသာရေးနဲ့ ဆိုင်သော လူမှုရေးနဲ့ဆိုင်သော အသင်းအဖွဲ့တွေကို လွတ်လပ်စွာ ဖွဲ့စည်းနိုင်သည်လို့ ပြဌာန်းထားကြောင်းလည်း ၀န်ကြီး သူရဦးအောင်ကိုက ပြောပါတယ်။

ရန်ကုန်တိုင်းဝန်ကြီးချုပ် ဦးဖြိုးမင်းသိန်းပြောခဲ့တဲ့ စကားဟာ ပုဂ္ဂလိက အမြင်သာဖြစ်ကြောင်းနဲ့ အန်အယ်လ်ဒီနဲ့ အစိုးရက တောင်းပန်ရမယ်ဆိုတာလည်း မဖြစ်သင့်ကြောင်း ၊ မဘသ အဖွဲ့ကလည်း ဒီကိစ္စအပေါ် ဖြေရှင်းပြီးဖြစ်ကြောင်းလည်း ပြောပါတယ်။

နိုင်ငံတော် သံဃာ့မဟာနာယကအဖွဲ့က မဘသ အပေါ် ထုတ်ပြန်တဲ့ ကြေညာချက်ဟာ ဆရာတော် ဘုရား ၄၇ ပါးရဲ့ တစိတ်တ၀မ်းတည်း ချမှတ်တဲ့ သဘောထားဖြစ်ကြောင်း လည်း ၀န်ကြီးက ပြောပါတယ်။

RFA Burmese
http://www.rfa.org/burmese