ထိုင်းအလုပ်ရှာကုမ္ပဏီတွေကို အမည်ပျက်စာရင်းသွင်း

ဓါတ်ပုံ - ထိုင်းနိုင်ငံ မဟာချိုင်မြို့မှာ မြန်မာအလုပ်သမားများကို တွေ့ရစဉ်

မြန်မာနိုင်ငံသား အလုပ်သမားတွေကို အလုပ်ရှာဖွေပေးနေတဲ့ ထိုင်းအလုပ်ရှာဖွေရေး အေဂျင်စီ ၂၄ ခုနဲ့ ကိုယ်စားလှယ် ၆ ယောက်ကို မြန်မာအစိုးရက အမည်ပျက်စာရင်း သွင်းလိုက်ပါတယ်။

အလုပ်သမားရှာဖွေရေးအေဂျင်စီတွေ လိုက်နာရမယ့် စည်းမျဉ်းစည်းကမ်းတွေကို မလိုက်နာတာကြောင့် အမည်ပျက်စာရင်း သွင်းလိုက်တာဖြစ်တယ်လို့ အလုပ်ရုံနဲ့ အလုပ်သမား ဥပဒေစစ်ဆေးရေးဦးစီးဌာနက ဒုတိယညွှန့်ကြားရေးမှူးချုပ် ဦးညွှန့်ဝင်း က ပြောပါတယ်။

ထိုင်းအလုပ်ရှာဖွေရေးကုမ္ပဏီတွေဖြစ်တဲ့ MP ၊ PV Thaipart Limited Partnership၊ V V Group အစရှိတဲ့ အလုပ်သမားရှာဖွေရေးကုမ္ပဏီ ၂၄ ခုနဲ့ Mr.Preecha Yindeerak၊ Mrs. Sarima၊ Miss Aliya Panyasopa အစရှိတဲ့ ကိုယ်စားလှယ် ၆ ယောက်ကို အမည်ပျက်စာရင်းသွင်းခဲ့တာဖြစ်ပါတယ်။

အမည်ပျက်စာရင်းသွင်းခံထားရတဲ့ ထိုင်းနိုင်ငံက ကုမ္ပဏီတွေကို မြန်မာနိုင်ငံဘက်က အလုပ်အကိုင် ရှာဖွေရေးအေဂျင်စီတွေ သိရှိအောင်လည်း မြန်မာပြည်ပအလုပ်အကိုင် ဝန်ဆောင်မှုလုပ်ငန်းရှင်များအဖွဲ့ချုပ်ထံ အကြောင်းကြားစာ ပေးပို့ထားတယ်လို့ ဦးညွှန့်ဝင်း က ပြောပါတယ်။

မြန်မာနိုင်ငံဘက်က အလုပ်အကိုင်ရှာဖွေရေးအေဂျင်စီတွေအနေနဲ့ အမည်ပျက်စာရင်းသွင်းခံထားရတဲ့ ထိုင်းနိုင်ငံဘက်က ကုမ္ပဏီတွေနဲ့ ချိတ်ဆက်ဆောင်ရွက်မယ်ဆိုရင် အလားတူ အမည်ပျက်စာရင်းသွင်းခံရမှာဖြစ်တယ်လို့လည်း ပြောပါတယ်။

ပြီးခဲ့တဲ့ ၂၀၀၃ ခုနှစ်က စတင်ပြီး အလုပ်သမားညွှန့်ကြားမှုဦးစီးဌာနက ထိုင်းနိုင်ငံကို တရားဝင်ပို့ဆောင်ပေးတဲ့ အလုပ်သမားအရေအတွက်ဟာ တစ်သိန်းကျော်သာ ရှိတယ်လို့ ပြောပါတယ်။

RFA Burmese
https://www.facebook.com/rfaburmese