ဘတ်စ်ကားလိုင်းများ ရန်ပြုတိုက်ခိုက်ခံရမှုများလာသောကြောင့် ခရီးသွားပြည်သူများကြား စိုးရိမ်မှုမြင့်တက်လာ

ရန်ကုန်မြို့တော်၏ အစွန်အဖျား ဆင်ခြေဖုံးဒေသများတွင် ပြေးဆွဲနေသော မော်တော်ယာဉ်လိုင်းအချို့တွင် အုပ်စုဖွဲ့ရန်ပြုတိုက်ခိုက်၊ လုယက်မှုများ ဖြစ်ပွားမှုများလာသဖြင့် ခရီးသွားပြည်သူများကြား လုံခြုံမှုမရှိတော့ဘဲ စိုးရိမ်စိတ်များ မြင့်တက်လာကြောင်း သိရသည်။

လတ်တလော လူမှုကွန်ရက်စာမျက်နှာများတွင် ပျံ့နှံ့နေသည့် ၃၃ မီနီဘတ်စ်ယာဉ်လိုင်းပေါ်တွင် မိန်းကလေး တယောက်ကို ခါးပိုက်နှိုက် လေးယောက်ခန့်မှဝိုင်းပြီး ပိုက်ဆံအိတ်ကို ဓားဖြင့်ခွဲရာ ကားစပယ်ယာက မြင်တွေ့သွားပြီး သတိပေးလိုက်သဖြင့် ယာဉ်မောင်းနှင့် စပယ်ယာနှစ်ဦးကို ခါးပိုက်နှိုက်များက ဓားဖြင့်ထောက်၊ လက်သီးဖြင့် ၀ိုင်းဝန်းထိုးကြိတ်မှုဖြစ်ပွားခဲ့သည်။

''အဲဒီလို ဖြစ်စဉ်တွေရှိတယ်။ တလောက မြောက်ဒဂုံဘက်ကို ပြေးဆွဲနေတဲ့ မော်တော်ယာဉ်လိုင်းတခုက တိုင်စာတစောင် မထသ (ဗဟို) ကို တက်လာတယ်။ ဘယ်လိုတိုင်သလဲဆိုတော့ ခရီးသည် အမျိုးသမီးငယ်တဦးကို အဲဒီမော်တော်ယာဉ်လိုင်းက စပယ်ယာက ကားပေါ်ကနေ ရင်ဘတ်ကိုတွန်းပြီး အောက်ကိုဆင်းခိုင်းတယ်လို့ တိုင်လာတယ်။ အဲဒီဖြစ်စဉ်ကို စုံစမ်းကြည့်တဲ့အခါ ကောင်မလေးကို တွန်းချတာ အဲဒီယာဉ်လိုင်းက စပယ်ယာ မဟုတ်ဘူး။ အဲဒီမြောက်ဒဂုံတ၀ိုက်က လူခြောက်ယောက်၊ ခုနစ်ယောက်လောက် စုပြီး ကားပေါ်တက် ပိုက်ဆံတက်ကောက်တယ်။ ပြီးရင် နှစ်မှတ်တိုင်လောက်စီးပြီး ပြန်ဆင်းသွားတယ်။ လူအုပ်များတော့ စပယ်ယာနဲ့ ဒရိုင်ဘာကလည်း မပြောရဲဘူး။ အဲဒီလိုဖြစ်စဉ်တွေ အများကြီးရှိသေးတယ်။ ရဲကိုတိုင်မှ ရဲကသိမှာ။ ၂၀၁၅ နှစ်ကုန်ပိုင်းကဆို တောင်ပိုင်းခရိုင်၊ သန်လျင်ဂိတ်မှာ ဖြစ်တာ။ မထသဂိတ်ထဲက ဂိတ်မှူးကို ထွက်ခိုင်းပြီး လူအုပ်နဲ့ ခရီးသည်တင်ယာဉ်တွေဆီက ပိုက်ဆံခပ်တည်တည်နဲ့ ကောက်တယ်။ အဲဒီက ဖုန်းဆက်အကြောင်းကြားလာမှ ရဲတွေခေါ်သွားပြီး သွားဖမ်းခဲ့ရတဲ့ ဖြစ်စဉ်တွေရှိခဲ့တယ်။ ပြောရရင် ဒီလိုအုပ်စုဖွဲ့ မိုက်ကြေးခွဲရမ်းကားတာတွေကို မထသယာဉ်လိုင်းမှာပါ ဖြစ်နေတယ်ဆိုတာကိုပါ''ဟု မထသ(ဗဟို) ဥက္ကဋ္ဌ ဦးလှအောင်က News Watch သို့ ပြောသည်။

၂၀၁၅ ခုနှစ် နိုဝင်ဘာ ၂၁ ရက် ည ၉ နာရီခန့်အချိန်တွင် တာမွေအ၀ိုင်း မီးပွိုင့်ထိပ်၌ ၁၇၄ မော်တော်ယာဉ် လိုင်းမှ ဒရိုင်ဘာနှင့် စပယ်ယာတို့အား အိမ်စီးကားတစီးပေါ်မှ လူတစုက ဓာတ်ဆီဖြင့်လောင်း မီးရှို့တိုက်ခိုက်ခဲ့သည့်ဖြစ်စဉ်ကြောင့် ခရီးသည်တချို့ဒဏ်ရာရရှိမှုဖြစ်ပွားခဲ့ပြီး ပြစ်မှုကျူးလွန်သော တရားခံများကို ယနေ့ထိ ဖမ်းဆီးရမိခြင်းမရှိကြောင်း သိရသည်။

''ကျွန်မက သန်လျင်မှာနေတာ။ အလုပ်လုပ်တာက ပုဇွန်တောင်မှာ။ ပြန်ရင် ပန်းဆိုးတန်းကနေ သန်လျင် ကားစီးပြီး ပြန်ရတာ။ အဲဒီလို အုပ်စုဖွဲ့ပြီးလုပ်နေတာတွေကြားတော့ ညဥ့်နက်တဲ့အထိ မနေရဲဘူး။ မလုံခြုံသလိုပဲ''ဟု သန်လျင်မြို့၌ နေထိုင်သူ မသီတာထွေးက ပြောသည်။

အောင်သူရိန်
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal