လောဂျာကျေးရွာ တောင်သူပိုင် တောင်ယာအတွင်း မပေါက်ကွဲသေးသည့် အမြောက်ကျည်ဆံကို တပ်မှ လာရောက်ဖောက်ခွဲ

 ကယား(ကရင်နီ)ပြည်နယ် ဖရူဆိုမြို့နယ် ရှိ လောဂျာတောင်သူတဦးပိုင် တောင်ယာခင်းအတွင်း မပေါက်ကွဲသေးသည့် အမြောက်ကျည်ဆံ ကို အမှတ် ၁၄ စစ်လေ့ကျင့်ရေးကျောင်းမှ ယနေ့ မေလ ၅ ရက်နေ့တွင် လာရောက်ဖောက်ခွဲခဲ့သည်။

အဆိုပါကျည်ဆံမှာ ပြီးခဲ့သည့် ဧပြီလ လယ်ပိုင်း အချိန်က အမှတ်၁၄ စစ်လေ့ကျင့်ရေးကျောင်းမှ လေ့ကျင့်ပတ်ခတ် စဉ် တောင်ယာခင်းအတွင်း မပေါက်ကွဲပဲ ကျန်နေသည့်ကျည်ဆံဖြစ်ကြောင်းဒေသခံများမှသိရသည်။

ကျွန်တော်တို့ဒါကို ဓါတ်ပုံရိုက်ပြီး ဖေ့ဘွတ်ပေါ်တင်လိုက်တယ်။ တချို့လူ ၊ တောင်သူလယ်သမားအဖွဲ့က မြင်ပြီးတော့ သူတို့လိုက်ပြီး အဲ့ဒီအမှတ် ၁၄ ကျောင်းက အဲ့ဒီတာဝန်ရှိတဲ့ စစ်တပ်ကို သူတို့အကြောင်းကြားပြီးတော့ ဒီမနက်မှာ သွားဖောက်ခွဲခဲ့ပါတယ်” ဟု လောဂျာကျေးရွာဒေသခံ ဦးဗျားရယ်က ပြောသည်။

လောဂျာကျေးရွာ တောင်သူပိုင် တောင်ယာအတွင်း မပေါက်ကွဲသေးသည့် အမြောက်ကျည်ဆံကို တပ်မှ လာရောက်ဖောက်ခွဲ (ဓါတ်ပုံ - ဦးဗျားရယ်)

၎င်းအမြောက်ကျည် ကျရောက်သည့်နေရာသည် ဒေါခူး ခူကျေးရွာနှင့် လောဂျာကျေး ရွာကြားရှိ တောင်သူ တို့၏ တောင်ယာခင်းထဲ ဖြစ်သည်။

ထိုသို့ အမြောက်ကျည်ဆံ ကျရောက်သည့်အပေါ် ဒေသခံတောင် သူများက ထွန်ယက်စိုက်ပျိုးသည့် အချိန်တွင် ၎င်းအမြောက်ဗုံးအား ခိုက်မိပေါက်ကွဲမည်ကို စိုးရိမ်နေကြသည်။

“သူတို့ပစ်ခတ်တဲ့ချိန်မှာ ဆိုရင်တော့ တခါတလေ ကျတော်တို့ တောင်ယာသွားရမယ့်အချိန်ဆို နှစ်ရက် မဟုတ် သုံးရက်ထိ ပိတ်ထားလိုက်ရတယ်” ဟု ဒေသခံတစ်ဦး ကပြောသည်။

တပ်အနေဖြင့် စစ်ရေးလေ့ကျင့်ပြီး ကျန်နေသည့် ကိစ္စရပ်များကို တာဝန်ယူရန် လိုအပ်သည်ဟု တောင်သူလယ်သမားသမဂ္ဂအဖွဲ့မှ ကိုတူရယ်က ပြောသည်။

“အသက်အန္တာရာယ်တွေစိုးရိမ်ရတာပေါ့။ မတွေ့မမြင်ရသေးတဲ့ မပေါက်ကွဲသေးတဲ့ ဗုံးဘယ်လောက်ထပ်ရှိအုံးမလဲ ။ တောင်သူတွေ၊ ကလေးတွေ၊ တိရိဆ္တာန်တွေအတွက် အသက်အန္တာရာယ်ကို အမြဲခြိမ်းခြောက်နေတယ်” ဟု ပြောသည်။

ပြီးခဲ့သည့် ၂၀၁၅ ခုနှစ်အတွင် အလားတူ တောင်ယာခင်းများအတွင်း အမြောက်ကျည်ဆံများကို သုံးလေးကြိမ်ခန့်တွေ့ဖူးကြောင်းဒေသခံများကဆိုသည်။

Written by သီတာအောင်
ကန္တာရ၀တီတိုင်း(မ်)
http://www.ktimes.org