ဒေါ်အောင်ဆန်းစုကြည် မျက်စိခွဲစိတ်ကုသ

မျက်စိခွဲစိတ်ကုသရန် နေပြည်တော်ရှိ မျက်စိ၊ နား နှာခေါင်းနဲ့ လည်ချောင်း အထူးကုဆေးရုံသို့ ရောက်ရှိလာသည့် ဒေါ်အောင်ဆန်းစုကြည်ကို ဧပြီလ ၉ ရက်နေ့က တွေ့ရစဉ်။ Photo: Win Naung Toe/ RFA

နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ နေပြည်တော် ဥတ္တရသီရိမြို့နယ် မျက်စိ၊ နား နှာခေါင်းနဲ့ လည်ချောင်း အထူးကုဆေးရုံမှာ ဒီနေ့ ညာဖက်မျက်စိ ခွဲစိတ်ခဲ့ပါတယ်။

ဒေါ်အောင်ဆန်းစုကြည်ရဲ့ မျက်စိနှစ်ဖက်စလုံးမှာ တိမ်စွဲနေတာကြောင့် ခွဲစိတ်တာဖြစ်ပြီး ဒီနေ့ ခွဲစိတ်မှုဟာ အောင်မြင်တယ်လို့ ဒေါ်အောင်ဆန်းစုကြည်ရဲ့ မိသားစုဆရာဝန် ဒေါက်တာတင်မျိုးဝင်း က ပြောပါတယ်။

"အခြေအနေအားလုံးကောင်းပါတယ်၊ တိမ်ပေါ့နော်၊ လူကြီးတွေမှာ အများဆုံး တိမ်ရှိကြပါတယ်၊ အဲ့ဒါခွဲတဲ့သဘောပါပဲ၊ သိပ်ပြီးတော့ ထွေထွေထူးထူး မဟုတ်ပါဘူး၊ ဧပြီလ ၁၆ရက်နေ့မှာ နောက်တစ်ဖက် ထပ်ခွဲမှာပါ"

လာမယ့် ဧပြီလ ၁၆ရက်နေ့မှာ ဘယ်ဖက်မျက်စိကို ခွဲစိတ်ကုသမှာ ဖြစ်ပါတယ်။

ဒေါ်အောင်ဆန်းစုကြည်ရဲ့မျက်စိကို မျက်စိအထူးအကုဆရာဝန်ကြီး ဒေါက်တာ ခင်ဥမ္မာခိုင် ဦးဆောင်ပြီး တစ်နာရီကြာ ခွဲစိတ်ခဲ့တာဖြစ်ပါတယ်။ ခွဲစိတ်မှုပြီးစီးတဲ့ အချိန်မှာ ဒေါ်အောင်ဆန်းစုကြည်ကို နိုင်ငံတော်သမ္မတ ဦးထင်ကျော်နဲ့ ဇနီးဖြစ်သူ ဒေါ်စုစုလွင် တို့လာရောက်ကြည့်ရှုခဲ့ပါတယ်။

အန်အယ်လ်ဒီပါတီရဲ့ ဗဟိုအလုပ်အမှုဆောင် ကော်မတီဝင် ဦးဝင်းထိန် လည်း မျက်စိခွဲစိတ်မှုခံယူမှာဖြစ်ပြီး လက်ရှိမှာ စစ်ဆေးနေဆဲဖြစ်တယ် လို့ ဒေါက်တာတင်မျိုးဝင်း က ပြောပါတယ်။

RFA Burmese
http://www.rfa.org/burmese