ဧရာဝတီတိုင်းမှာ လာဘ်ပေးလာဘ်ယူကင်းရမည်

Photo: Thiha Tun/ RFA ( ဧရာဝတီတိုင်းဒေသကြီး ၀န်ကြီးချုပ် ဦးမန်းဂျော်နီကို ဧပြီလ ၂၅ ရက်နေ့က တွေ့ရစဉ် )

ဧရာဝတီတိုင်းဒေသကြီးမှာ နေထိုင်တဲ့ ပြည်သူတွေအားလုံး ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ တိုးတက်မှုရှိစေဖို့အတွက် တရားဥပဒေစိုးမိုးပြီး လာဘ်ပေး လာဘ်ယူ ကင်းစင်အောင် ဆောင်ရွက် သွားမယ်လို့ ဧရာဝတီတိုင်းဒေသကြီး ၀န်ကြီးချုပ် ဦးမန်းဂျော်နီ က ပြောလိုက်ပါတယ်။

ဧရာဝတီတိုင်းဒေသကြီး အစိုးရအဖွဲ့ရဲ့ ဆောင်ရွက်ချက်တွေနဲ့ပတ်သက်ပြီး ၀န်ကြီးချုပ် ဦးမန်းဂျော်နီကို RFA က တွေ့ဆုံမေးမြန်းရာမှာ ၀န်ကြီးချုပ်က အစိုးရအဖွဲ့ရဲ့ လုပ်ဆောင်သွားမယ့် ရည်ရွယ်ချက်ကို ပြောလိုက်တာဖြစ်ပါတယ်။
ဒါ့အပြင် ပြီးခဲ့တဲ့ အစိုးရ လက်ထက်မှာ ရေးဆွဲခဲ့တဲ့ စီမံကိန်းတွေကို ဆက်လက် လုပ်ဆောင်ဖို့ သင့်မသင့် ဆိုတာ ပြည်သူတွေကို ချပြပြီး ဆောင်ရွက်သွားမယ်လို့ ပြောပါတယ်။

ဧရာဝတီတိုင်းအတွင်း တပ်မတော်နဲ့ ပုဂ္ဂလိကကုမ္ပဏီကြီးတွေက သိမ်းယူထားတဲ့ လယ်ယာမြေ တွေကို မူလတောင်သူတွေထံ ပြန်လည်ပေးအပ်ပေးနေပေမယ့် အားရကျေနပ်လောက်တဲ့အထိ မရှိသေးဘူးလို့လည်း ပြောပါတယ်။

လွန်ခဲ့တဲ့ ၂၀၀၈ ခုနှစ် မေလအတွင်း ဖြစ်ပွားခဲ့တဲ့ နာဂစ်မုန်တိုင်းဒဏ်ကြောင့် ဧရာဝတီတိုင်းက ပျက်စီးဆုံးရှုံးခဲ့တဲ့ လယ်ယာမြေတွေမှာ ပြန်လည်စိုက်ပျိုးနိုင်ဖို့ ကြိုးစားနေသလို လယ်သမားတွေ အတွက် လယ်ပိုင်ခွင့်ရရှိရေးအတွက် ဆောင်ရွက်နေကြောင်းလည်း ၀န်ကြီးချုပ်က ပြောပါတယ်။

ဝန်ကြီးချုပ် ဦးမန်းဂျော်နီဟာ အန်အယ်လ်ဒီပါတီကနေ ၁၉၉၀ ရွေးကောက်ပွဲ၊ ၂၀၁၂ ကြားဖြတ် ရွေးကောက်ပွဲ နဲ့ ၂၀၁၅ ရွေးကောက်ပွဲတို့မှာ ၃ကြိမ်တိုင်တိုင် ရွေးကောက်ခံခဲ့ရသူဖြစ်ပါတယ်။

သူဟာ အစိုးရ၀န်ထမ်းအဖြစ် လက်ထောက်မြို့နယ် ပညာရေးမှူးအဆင့်အထိ တာဝန်ထမ်းဆောင် ခဲ့သူဖြစ်ပါတယ်။

RFA Burmese
https://www.facebook.com/RFA-Burmese