မြကျွန်းသာ အပန်းဖြေဥယျာဉ်အတွင်း ဆောက်လုပ်ဆဲလုပ်ငန်းများ ရပ်ဆိုင်းရန် ကုမ္ပဏီ (၈) ခုအား YCDC မှ တရားဝင် အသိပေး အကြောင်းကြား

စည်ပင်၏မူလခွင့်ပြုချက်ပုံစံဖြင့်ကွဲလွဲကာ တည်ဆောက်နေသော မြကျွန်းသာအပန်းဖြေဥယျာဉ်အတွင်း ဆောက်လုပ်ဆဲ လုပ်ငန်းများ ရပ်ဆိုင်းရန် ကုမ္ပဏီ (၈) ခုအား မတ်လ ၈ ရက်နေ့တွင် တရားဝင်အသိပေးအကြောင်းကြားထားကြောင်း ရန်ကုန်မြို့တော် စည်ပင်သာယာ ရေးကော်မတီ (YCDC ) ဦးခင်လှိုင်(ဇော်တိက) က News Watch သို့ ပြောသည်။

ပြီးခဲ့သည့် ၂၀၁၅ ခုနှစ်အတွင်းက အဆောက်အအုံဆောက်လုပ်မှုများတွင် စည်ပင်မှ သတ်မှတ်ထားသည့် စည်း ကမ်းချက်များနှင့် အညီ ဆောင်ရွက်ခြင်းမရှိသည်ကို တွေ့ရှိသည့်အတွက် သွားရောက် တားမြစ်ခဲ့ရကြောင်း၊ ရန်ကုန် တိုင်းဒေသကြီးအစိုးရအဖွဲ့မှ စစ်ဆေးခဲ့ပြီးနောက် လုပ်ငန်းများ ရပ်ဆိုင်းခဲ့ရကြောင်း၊ ယင်းအပြင် ဆက်လက်လုပ်ကိုင် ခွင့် ပေး၊မပေးကိုမူ ယနေ့ထက်ထိ တရားဝင်စာထုတ်ပြန်ခြင်းမရှိသေးကြောင်းလည်း ၂၀၁၆ ခုနှစ် မတ်လ ၄ ရက်နေ့က မြကျွန်းသာ စီမံခန့်ခွဲရေးရုံးတွင် ကုမ္ပဏီ ၈ ခုနှင့် ဆွေးနွေးရာမှ သိရှိခဲ့ရကြောင်း ၎င်းကပြောသည်။

“ဆက်လုပ်ခွင့်ပေး၊ မပေး ဆက်ပြီးအကြောင်း မပြန်တဲ့အတွက် ဆက်လက်လုပ်နေရတယ်လို့ ကုမ္ပဏီတချို့ထံမှ ကြားခဲ့ရတယ်။ အခု သွားစစ်ဆေးတဲ့အခါ ပိုပြီး ဆိုးရွားနေတာတွေ့ရတယ်။ စည်ပင်ကို ခွင့်ပြုချက်တောင်းခဲ့တာက ကုမ္ပဏီ ၄ ခု။ ၄ ခုမှာတစ်ခုကို ခွင့်ပြုချက်ပေးပြီး ကျန်တဲ့ တစ်ခုကို ခွင့်ပြုချက်မပေးခဲ့ဘူး။ အဲတော့ စည်ပင်ကို ခွင့်ပြုချက်တောင်းခဲ့တာနဲ့ ပုံစံကွဲလွဲပြီး တင်လို့ မရပါဘူး”ဟု ဦးခင်လှိုင်ကပြောသည်။

ရန်ကုန်မြို့တော်စည်ပင်သာယာရေးကော်မတီပိုင် မြကျွန်းသာအပန်းဖြေဥယျာဉ်အား နိုင်ငံတကာအဆင့်မီ သဘာဝဥယျာဉ်ကြီး (Natural Park) အသွင်သဏ္ဍာန်ဖြစ်စေပြီး၊ အများပြည်သူ အပန်းဖြေနိုင်သည့် Recreation Centre ဖြစ်ရန်၊ အများပြည်သူများ လွတ်လပ်စွာအနားယူနိုင်မည့် Relaxation Centre ဖြစ်ရန် ရည်ရွယ်၍ ကုမ္ပဏီ(၈)ခုအား ၂၀၁၃ ခုနှစ်၊ ဧပြီ(၁၀)ရက်နေ့တွင် အငှားစာချုပ်ချုပ်ဆို၍ နှစ်(၆၀) သက်တမ်းဖြင့် တစ်လလျှင် မြေတစ်ဧက (ကျပ်တစ်ဆယ်သိန်း)နှုန်းဖြင့် Inya Palace Co,.Ltd (၁.၈၃ ဧက)၊ (Mandaly Golden Win)(Magic Land Co,.Ltd (၁၃.၈၆၄၃ ဧက)၊ (Game City)၊ Ryuji Co.,Ltd (၁.၃၇၇ ဧက)၊ Nay La Pwint (၂.၆၀၆ ဧက)၊ Edin (၄.၇၂၉ ဧက)၊ Good Shan Brother (၇.၇၈၉ ဧက)၊ Myanmar Golder Star (၄.၁၅၂ ဧက)၊ နှင့် Max Myanmar (၆.၈၆၅ ဧက)ကုမ္ပဏီတို့အား မြေအငှားချထားပေးခဲ့ခြင်းဖြစ်ကြောင်းသိရသည်။

လင်းလင်းအောင်
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal