SNLD ပါတီမှ ဦးစိုင်းညွှန့်လွင် ဒုသမ္မတလောင်း အမည်စာရင်း တင်သွင်းမှု အစည်းဝေး စမည့်နေ့တွင် နေပြည်တော်သို့ သွားရောက်မည်

ဒုတိယ သမ္မတ ရာထူးနေရာအတွက် ရေပန်းစားလာသူ ဖြစ်နေသည့် SNLD ရှမ်းတိုင်းရင်းသားများ ဒီမိုကရေစီအဖွဲ့ချုပ်မှ အထွေထွေ အတွင်းရေးမှူး ဦးစိုင်းညွန့်လွင်မှာ ဒုတိယသမ္မတ အမည်စာရင်း တင်သွင်းနိုင်ရေးအတွက် အစုအဖွဲ့အစည်းဝေးများ စတင်မည့် မတ်လ ၁၀ ရက်နေ့တွင် နေပြည်တော်သို့ သွားရောက်မည်ဖြစ်ကြောင်း နီးစပ်သူများထံမှသိရသည်။

“ဘာကြောင့် သွားမလဲဆိုတာတော့ မသိဘူး။ မတ်လ ၁၀ ရက်နေ့ နေပြည်တော်မှာ ရှိမှာ။ အဲဒီကို သွားမှာတော့ သေချာတယ်” ဟု အမည်မဖော်လိုသူ နီးစပ်သူက ပြောသည်။

ကာယကံရှင် ကိုယ်တိုင်ကမူ ၄င်း၏ ပါတီဖြစ်သည့် ရှမ်းတိုင်းရင်းသားများ ဒီမိုကရေစီအဖွဲ့ချုပ်အား အစိုးရအဖွဲ့တွင် နေရာတစ်နေရာ ယူရန်သာ အနိုင်ရ အမျိုးသား ဒီမိုကရေစီအဖွဲ့ချုပ်ဘက်မှ ကမ်းလှမ်းခဲ့ခြင်းဖြစ်ပြီး မည်သည့် ရာထူးဆိုသည်ကိုမူ အတိအကျ သိရှိရခြင်း မရှိကြောင်း မီဒီယာများကို ဖြေဆိုထားသည်။

ကမ်းလှမ်းထားသည်မှာ နှစ်လကျော် ကြာမြင့်ခဲ့ပြီ ဖြစ်သော်လည်း ယခုကဲ့သို့ သမ္မတလောင်း စာရင်းများ ကြေညာရန် ရက်နီးကပ်လာချိန်တွင် ရှမ်းပါတီမှ တာဝန်ရှိသူတစ်ယောက်မှာ ဒုသမ္မတ ဖြစ်လာရန် သတင်းများ ထွက်လာခြင်းဖြစ်သည်။

လွန်ခဲ့သည့် နှစ်လကတည်းက ရှမ်းနိုင်ငံရေး အသိုင်းဝန်းတွင် ကျားခေါင်းပါတီ SNLD ခေါင်းဆောင် ဦးခွန်ထွန်းဦးအား အန်အယ်လ်ဒီမှ ဒုတိယ သမ္မတ အဖြစ်ကမ်းလှမ်းထားကြောင်း သတင်းများ သိုးသိုးသန့်သန့် ထွက်ပေါ်ခဲ့ဖူးပြီး ဦးခွန်ထွန်းဦး၏ ဇန်န၀ါရီလ မိုင်းရှူး ခရီးစဉ်တွင်လည်း ရှမ်းဘာသာဖြင့် ၄င်းအား ကမ်းလှမ်းထားကြောင်း ပြောဆိုခဲ့ဖူးသည်။

ဦးခွန်ထွန်းဦး၏ သမီးဖြစ်သူမှာ သြစတြေးလျနိုင်ငံသူအဖြစ် ခံယူထားသောကြောင့် ယခုကဲ့သို့ ဦးစိုင်းညွှန့်လွင်မှာ ဒုတိယသမ္မတ ရာထူးအတွက် ရေပန်းစားလာခြင်းဖြစ်ပြီး အန်အယ်လ်ဒီ၏ အမျိုးသား ပြန်လည်သင့်မြတ်ရေး မူဝါဒအရ မဟာမိတ် တိုင်းရင်းသား ပါတီဖြစ်နေသည့် SNLD ကျားခေါင်းပါတီမှ ဒုသမ္မတ ဖြစ်ရန် ရေပန်းစားလာခြင်းဖြစ်သည်။

ယင်းအပြင် အန်အယ်လ်ဒီ၏ ကာလရှည် မဟာမိတ် တိုင်းရင်းသား ခေါင်းဆောင်တစ်ဦးဖြစ်သည့် ပူးလ်ကျင်ရှင့်ထန်မှာလည်း ၅၉ (စ) သမ္မတ အရည်အချင်း ကန့်သတ်ချက်နှင့် ညှိစွန်းနေသည်ဟု ဇိုမီးအသိုင်းဝန်းက ဆိုနေသောကြောင့် မည်သည့် ရာထူးမျှ မရသေးသော ရှမ်းတိုင်းရင်းသားများ ဒီမိုကရေစီအဖွဲ့ချုပ်မှ တာဝန်ရှိသူများမှာ အစိုးရ ထိပ်တန်းရာထူးရယူနိုင်ရန် ရေပန်းစားလာခြင်း ဖြစ်သည်။

The Ladies News
https://www.facebook.com/News.TheLadies