မိုင်းခတ်၌ နေအိမ်(၄၈)လုံး မီးလောင်ကျွမ်းပြီး လူ(၂၅၈)ဦး မီးဘေးသင့်


ရှမ်းပြည်နယ်အရှေ့ပိုင်း၊ မိုင်းခတ်မြို့နယ်၊ နောင်လုံး အုပ်စု ၊ အင်လုံရွာတွင် မတ်လ(၁၂)ရက်နေ့ ညနေပိုင်းက လူစောင့်မရှိဘဲ ထမင်းအိုးတည်ခဲ့ရာမှ အိမ်ခြေ(၄၈)လုံး မီးလောင်ကျွမ်းခဲ့ကြောင်း မီးသတ်ဦးစီးဌာနမှ သိရသည်။

မီးလောင်ကျွမ်းမှုကြောင့် ပျက်စီးဆုံးရှုံးမှု တန်ဖိုးမှာ ကျပ်(၂၀၄.၈)သိန်းရှိပြီး အိမ်ထောင်စု (၄၈) ခုမှ လူကြီးနှင့် ကလေးစုစုပေါင်း (၂၅၈) ဦး မီးဘေးသင့်ခဲ့ကြောင်း မီးသတ်တပ်ဖွဲ့မှ သိရသည်။


ဖြစ်စဉ်မှာ မိုင်းအင်ကျေးရွာအတွင်း နေထိုင်သူ ဦးအိုက်ယိုး၏ နေအိမ်တွင် လူစောင့်မရှိဘဲ ထမင်းအိုး တည်ထားရာမှ သက်ကယ်မိုး၊ ဝါးထရံကာ၊ ပျဉ်ကြမ်းခင်းဖြင့် တည်ဆောက်ထားသော (၁၅ × ၂၀ ) ပေ အရွယ်အိမ်၏ ဝါးထရံကို မီးကူးစက်ကာ လောင်ကျွမ်းသွားပြီး အခြားနေအိမ်များသို့ ဆက်လက် မီးလောင်ကျွမ်းသွားခဲ့ခြင်းဖြစ်ကြောင်း သိရသည်။


"မီးသတ်တပ်ဖွဲ့တွေ ရောက်သွားတော့ အိမ်တော်တော်များများ မီးထဲပါသွားပါပြီ။ ကျွန်တော်တို့ မရောက်ခင် မီးသတ်ဆေးဘူးနဲ့ ကြိုတင်ငြိမ်းသတ်ထားခြင်း မရှိပါဘူး။ မီးဘေးသင့် ခံရတဲ့ သူတွေအားလုံးကို ရွာက ဘုန်းတော်ကြီးကျောင်းမှာ နေရာချပေးထားရတယ်။ " ဟု မိုင်းခတ်မီးသတ်စခန်းမှ ဦးစီးအရာရှိ ဦးမျိုးဇင်ဝင်းက ပြောသည်။

မီးလောင်သည့် ကျေးရွာနှင့် မီးသတ်တပ်ဖွဲ့စခန်းမှာ (၁၅)မိုင်ခန့်ဝေးပြီး စတင်မီးလောင်ကျွမ်းပြီး (၄၅)မိနစ်ကြာမှ မီးလောင်ကျွမ်းသည့် ကျေးရွာသို့ရောက်ရှိကာ မီးငြိမ်းသတ်နိုင်ခဲ့သဖြင့် နေအိမ်(၄၈)လုံး မီးလောင်ကျွမ်းခဲ့ခြင်းဖြစ်ကြောင်း ၎င်းထံမှ သိရသည်။

မီးလောင်ကျွမ်းမှုကြောင့် ဦးအိုက်ယိုးအား မိုင်းခတ်မြို့နယ်ရဲတပ်ဖွဲ့စခန်းမှ (ပ-၂/၂၀၁၆) ၊ ပုဒ်မ (၂၈၅) ဖြင့် အမှုဖွင့် အရေးယူထားကြောင်း သိရှိရသည်။

(၁၂.၃.၂၀၁၆)ရက်နေ့၊ (၁၆း၃၀)အချိန် ရှမ်းပြည်နယ်၊ မိုင်းခတ်မြို့နယ်၊ အင်လုံကျေးရွာ မီးလောင်မှုမှတ်တမ်း ။ ဓာတ်ပုံ - Myanmar Fire Services Department

သတင်း။ ။ ‪‎ဇင်အောင်‬
Tachileik News Agency
http://www.tachileik.net/2016/03/MgK.html
မိုင်းခတ်၌ နေအိမ်(၄၈)လုံး မီးလောင်ကျွမ်းပြီး လူ(၂၅၈)ဦး မီးဘေးသင့်   မိုင်းခတ်၌ နေအိမ်(၄၈)လုံး မီးလောင်ကျွမ်းပြီး လူ(၂၅၈)ဦး မီးဘေးသင့် Reviewed by THITHTOOLWIN on 19:58 Rating: 5
Powered by Blogger.