အရှိန် မထိန်းနိုင်သော သုံးဘီးယာဉ် လမ်းဘေး အ.မ.က ကျောင်းဝန်းအတွင်း ထိုးကျ ယာဉ်မောင်းသေဆုံး

ကျိုင်းတုံ မတ် ၂၅

ရှမ်းပြည်နယ်(အရှေ့ပိုင်း)၊ ကျိုင်းတုံ-တာချီလိတ် ကားလမ်း၊ ပန်လော့အောက်ရွာ အနီးတွင် မတ်လ(၂၄)ရက်နေ့ ညနေ (၄)နာရီခွဲက သုံးဘီးဆိုင်ကယ် တစ်စီးတိမ်းမှောက်၍ ယာဉ်မောင်း သူ သေဆုံးသွားကြောင်း သိရသည်။

ဖြစ်စဉ်မှာ ကျိုင်းတုံမြို့နယ် နောင်နွန်း(အာခါ) ကျေးရွာနေ၊ မောင်အားတေ (၁၉)နှစ် မောင်းနှင်သော ၆ဟ/-------၊ Bashan အမျိုးအစား သုံးဘီးဆိုင်ကယ် လိမ္မော်ရောင် သည် ကျိုင်းတုံ-တာချီလိတ် ကားလမ်း၊ ပန်လော့အောက် ရွာ အနီး မိုင်တိုင်အမှတ် (၆၅၆)ကီလိုမီတာအနီး ကုန်းဆင်းတွင် အရှိန်မထိန်းနိုင်ဘဲ လမ်း၏ တစ်ဘက် ယာဉ်ကြော သို့ ရောက်ရှိကာ လမ်းဘေး အောက်ဘက် ရှိ အမက(မူလွန်) ကျောင်းဝန်းအတွင်း ထိုးကျ၍ တိမ်းမှောက် သွားခဲ့သည်။

ယာဉ်မောင်းဖြစ်သူ မောင်အားတေမှာ အခင်းဖြစ်နေရာ၌ သေဆုံးသွားပြီး ယာဉ်ပေါ်ပါသူ ကျိုင်းတုံမြို့နယ်၊ ဟွေလန်းကျေးရွာနေ ကျသား(၁၂)နှစ် နှင့် လောဆေး(၁၅)နှစ်တို့ ဒဏ်ရာ ရရှိသွားပြီးကျိုင်းတုံ ဆေးရုံကြီးတွင် ဆေးကုသမှု ခံယူလျက်ရှိသည်။ ကျသားမှာစိုးရိမ်ရသည့် အခြေအနေတွင်ရှိပြီး ကျိုင်းတုံမြို့မ ရဲစခန်းမှ အရေးယူ ဆောင်ရွက် ထားကြောင်း သိရသည်။

မောင်မောင်နိုင်(ကျိုင်းတုံ)
MOI Webportal Myanmar
https://www.facebook.com/MOIWebportalMyanmar