ရထားတွယ်စီးသည့် အမျိုးသားတစ်ဦး ရထားကြိတ်မိကာ သေဆုံးမှုဖြစ်ပွား

မတ်လ ၂၅ ရက်၊ နံနက် ၉း၃၀ နာရီ အချိန်ခန့်တွင် လှော်ကားဘူတာမှ ရန်ကုန်သို့ သွားသည့် ရထားကို အသက်ငါးဆယ်ကျော် အရွယ်ရှိ အမျိုးသားတစ်ဦးတွယ်စီးရာမှ ပြုတ်ကျကာ ရထားကြိတ်မိ သေဆုံးသွားကြောင်း မျက်မြင်သက်သေများထံမှ သိရှိရသည်။

“စက်မှုဇုန်ဘူတာကနေ ၃၀၀ ကျပ်တန်ရထားကို တံခါးပိတ်သွားတာ မမီလို့ တွယ်စီးတာ။ တံခါးဖွင့်ရင်တက် မလို့လုပ်တာပါ။ ငါးစာစစ်တဲ့နေရာမှာ ခြေချော်ချတာ ခြေထောက်ပြတ်၊ ဝမ်းလျားမောက်ကျပြီး ခါးတစ်ပိုင်းပြတ် သေသွားပါတယ်”ဟု ရွှေပြည်သာမြို့နယ် ၊ စက်မှုဇုန် ၂ မှ ဒေသခံမျက်မြင် ဒေါ်အေးက ပြောသည်။

ရွှေပြည်သာမြို့နယ်ရှိ စက်မှုဇုန်ဘူတာနှင့် တညင်းကုန်း ဘူတာကြားတွင် ရထားတွယ်စီးရာမှ ခြေချော်၍ ပြုတ် ကျပြီး ရထားကြိတ်မိကာ သေဆုံးသွားကြောင်း ရထားပေါ်ပါ ခရီးသည်များထံမှ သိရသည်။

“ခုကိစ္စကို ရထားကို အကြောင်းမကြားသေးပါဘူး။ ဒါကို ရဲက ပြုတ်ကျသေတာလား၊ ဘာဖြစ်တယ်ဆိုတာ ဆက်လက် ဆောင်ရွက်သွားပါလ်ိမ့်မယ်။ ရထားလမ်းပေါ်မှာ အတိုက်ခံရရင် လူပဲဖြစ်ဖြစ် တိရစ္ဆာန်ပဲဖြစ်ဖြစ် တရားစွဲ ပါတယ်။ ခုလို မဖြစ်အောင်လည်း မီဒီယာတွေကို အမြဲပြောပြပါတယ်။ တွယ်မစီးအောင်ပေါ့”ဟု မြန်မာ့မီးရထား၊ သွားလာရေးဌာနမှ မန်နေဂျာ ဦးကျော်စိုးလင်းက ပြောသည်။

လက်ရှိအချိန်တွင် အဆိုပါ အလောင်းကို ရွှေပြည်သာရဲစခန်းက သယ်ယူသွားပြီး လိုအပ်သည်များကို ဆက်လက် ဆောင်ရွက်လျက် ရှိကြောင်း သိရသည်။

သတင်း - MMK
The Ladies News
https://www.facebook.com/News.TheLadies