 |
| ရခိုင်ပြည်နယ်၊ စစ်တွေမြို့က ရခိုင်အမျိုးသားပါတီ ANP ဌာနချုပ်ကို တွေ့ရစဉ်။ Photo: Min Thein Aung/RFA |
ပြီးခဲ့တဲ့ ဖေဖော်ဝါရီလ ၆ ရက်နေ့က စစ်တွေမြို့မှာ ကျင်းပခဲ့တဲ့ ရခိုင်အမျိုးသားပါတီ ဗဟိုအလုပ်မှုဆောင် အစည်း အဝေးရဲ့ ဆုံးဖြတ်ချက်ဟာ တဖက်သတ်ဆုံးဖြတ်ခဲ့တာဖြစ်လို့ အခုလို စီစဉ်တာဖြစ်တယ်လို့ ရခိုင်အမျိုးသားပါတီရဲ့ ဗဟိုအလုပ်အမှုဆောင် ကော်မတီဝင် ဦးမျိုးကျော်က ပြောပါတယ်။
"ကျနော်တို့ တဖက်သတ်ဖြတ်တောက်လိုက်တယ်၊ ဒီဟာကတော့ ကျနော်တို့အနေနဲ့လည်း လက်ခံနိုင်ဖွယ် မရှိပါဘူး၊ ဒီတော့ ဒီကိစ္စတွေကိုက ကျနော်တို့ပါတီထဲမှာ ပါတီခေါင်းဆာင်တွေရဲ့စာရင်း ကျနော်တို့ ထားပြီးတော့လည်း ကျနော်တို့မှာ ကျယ်ကျယ်ပြန့်ပြန့် ဆွေးနွေးရမယ့် ကိစ္စတွေလည်းရှိတယ်၊ ရခိုင်လူမှုအဖွဲ့အစည်းတွေနဲ့ ကျနော်တို့သွားမယ် ပြီးတော့လည်း ကျနော်တို့ပါတီပြင်ပဖြစ်တဲ့ အဲ့ဒီ UNA အပါအဝင် တခြားမဟာမိတ်တွေနဲ့ ကျနော်တို့ လက်တွဲသွားဖို့ရှိပါတယ်"
အဲ့ဒီ ဖေဖော်ဝါရီလ ၆ ရက်နေ့က ANP ပါတီ ဗဟိုအလုပ်မှုဆောင် အစည်းအဝေးကနေ UNA နဲ့ မဟာမိတ်ဖြတ်တောက်ပြီး ညီနောင်တိုင်းရင်းသားများ ဖက်ဒရေးရှင်း NBF နဲ့သာ မဟာမိတ်အဖြစ် လက်တွဲသွား မယ်လို့ ထုတ်ပြန်ကြေညာခဲ့တာ ဖြစ်ပါတယ်။
ရခိုင်အမျိုးသားပါတီ ANP ဟာ ရခိုင်ဒီမိုကရေစီအဖွဲ့ချုပ် ALD နဲ့ ရခိုင်တိုင်းရင်းသားများ တိုးတက်ရေး ပါတီ RNDP တို့ ပေါင်းစပ်ထားတာဖြစ်ပါတယ်။
ယခင် ALD ပါတီဟာ ညီညွတ်သောတိုင်းရင်းသားလူမျိုး များမဟာမိတ်အဖွဲ့ UNA ရဲ့ အဖွဲ့ဝင်ဖြစ်ပြီး RNDP ကတော့ ညီနောင်တိုင်းရင်းသားများ ဖက်ဒရေးရှင်း NBF ရဲ့ အဖွဲ့ဝင်ဖြစ်ပါတယ်။
စစ်တွေမြို့မှာ ကျင်းပခဲ့တဲ့ ရခိုင်အမျိုးသားပါတီ ဗဟိုအလုပ်မှုဆောင်ကော်မတီ အစည်းအဝေးကို တက်ရောက်ခဲ့သူ ၂၆ ဦးဟာ ယခင် ရခိုင်တိုင်းရင်းသားများ တိုးတက်ရေးပါတီ RNDP က အဖွဲ့ဝင်တွေသာဖြစ်တယ်လို့ သိရပါတယ်။
ပါတီနှစ်ခုပူးပေါင်းစဉ်က နှစ်ဖက်မဟာမိတ်အဖွဲ့တွေကို အရင်အတိုင်းဆက်လက်ထားဖို့ ဆုံးဖြတ်ထား ခဲ့တာကြောင့် ဒီလအတွင်းတွေ့ဆုံမယ့် ဆွေးနွေးပွဲမှာ ပါတီနှစ်ခုပူးပေါင်းဖို့ တိုက်တွန်းခဲ့တဲ့ မဟာမိတ် အဖွဲ့တွေကိုလည်း ဖိတ်ကြားသွားမယ်လို့ ပြောပါတယ်။
RFA Burmese
http://www.rfa.org/burmese
UNA နဲ့ မဟာမိတ် ဖျက်တဲ့ကိစ္စ ANP ပါတီိတွင်း ဆွေးနွေးဦးမည်
Reviewed by THITHTOOLWIN
on
09:06
Rating:
Reviewed by THITHTOOLWIN
on
09:06
Rating:
