ဆီးရီးယား ကူညီရေး ယာဉ်တန်း စတင်ထွက်ခွာ

 အစားအသောက်နဲ့ ဆေးဝါးတွေ တင်ထားတဲ့ ယာဉ်တန်း ဒမာ့စကတ်မြို့ကနေ စတင်ထွက်ခွာ။

ဆီးရီးယား နိုင်ငံမှာ တိုက်ပွဲတွေကြား ပိတ်မိနေတဲ့ ဒုက္ခသည်တွေအတွက် အစားအသောက်နဲ့ ဆေးဝါးတွေ ပေးပို့မယ့် ထောက်ပံ့ရေး ယာဉ်တန်းဟာ မြို့ ငါးမြို့ဆီကို သွားရောက်ဖို့ ပြင်ဆင်နေပါတယ်။

ဒမာ့စကတ် မြို့ကနေ ကုန်တင်ကားတွေ စတင် ထွက်ခွာနေပြီလို့ အပြည်ပြည်ဆိုင်ရာ ကြက်ခြေနီ အဖွဲ့ IFRC ရဲ့ ပြောခွင့်ရသူက ဘီဘီစီကို ပြောပါတယ်။

အဲဒီ ယာဉ်တန်းဟာ ဒမာ့စကတ် မြို့အနီး သူပုန်တွေ လက်အောက်က Madaya, Zabadani and Muadhamiya မြို့တွေဆီ ဦးတည် ထွက်ခွာမှာ ဖြစ်ပြီး မြောက်ဘက်က အစိုးရ လက်အောက်ခံ ရွာနှစ်ရွာ ဖြစ်တဲ့ Foah နဲ့ Kefraya တို့ကိုလည်း သွားရောက်မှာ ဖြစ်ပါတယ်။

ဒီလို အကူအညီတွေ ပေးပို့မှုဟာ သောကြာနေ့မှာ အပစ်ရပ်နိုင်မယ်လို့ မျှော်လင့်ချက်နဲ့ ကမ္ဘာ့ ခေါင်းဆောင်တွေ သဘောတူ ထားခဲ့တဲ့ အစီအစဉ်ရဲ့ တစိတ်တပိုင်း ဖြစ်ပါတယ်။

ဒါပေမယ့် ဆီးရီးယား အစိုးရတပ်ရဲ့ အလက်ပိုမြို့ တဝိုက်က ထိုးစစ်တွေနဲ့ ကာဒစ်ရှ် တပ်တွေရဲ့ တိုက်ပွဲတွေကြောင့် အပစ်ရပ်နိုင်ရေး မျှော်လင့်ချက်က မှေးမှိန်လာခဲ့ပါတယ်။

ကုလ သမဂ္ဂရဲ့ အဆိုအရ တိုက်ပွဲတွေကြား ပိတ်မိနေတဲ့ ဆီးရီးယား ပြည်သူပေါင်း ငါးသိန်းလောက် ရှိတယ်လို့ ဆိုပါတယ်။

BBC Burmese
http://www.bbc.com/burmese