တာချီလိတ်တွင် မူးယစ်ဆေးဝါး ထုတ်လုပ်သည့်နေရာအား ဝင်ရောက်ရှာဖွေရာ ပစ်ခတ်မှုဖြစ်ပွား

ရှမ်းပြည်နယ်အရှေ့ပိုင်း တာချီလိတ်မြို့၌ မူးယစ်ဆေးဝါး ထုတ်လုပ်သည်ဟု သံသယရှိသော ရာဘာခြံအား ဖေဖော်ဝါရီ ၁၂ ရက်နေ့တွင် ၀င်ရောက်ရှာဖွေရာ ပစ်ခတ်မှု အနည်းငယ်ဖြစ်ပွားခဲ့ပြီး ကျပ်သိန်း ၂,၅၀၀ ကျော် တန်ဖိုးရှိ မူးယစ်ဆေးဝါးများ ဖမ်းဆီးရမိခဲ့ကြောင်း တာချီလိတ် မူးယစ်တပ်ဖွဲ့စု ၃၀ မှ သိရှိရသည်။

" ကျွန်တော်တို့ နယ်မြေခံတပ်တွေနဲ့ မူးယစ်တပ်ဖွဲ့ဝင်တွေ ရာဘာခြံထဲ ၀င်သွားတော့ ကြောက်အား လန့်အားနဲ့ နှစ်ချက်ပစ်ပြီး ပြေးတာပါ။ ကျွန်တော်တို့ဘက်က တစ်ချက်ပြန်ပစ်လိုက်တော့ လန့်ပြီးပြေးသွားတယ်။ ဖမ်းမမိလိုက်ဘူး။ ဒဏ်ရာရတာတော့မရှိပါဘူး။ သူ့အမျိုးသမီးတော့ အခုဖမ်းမိထားပါတယ် " ဟု တာချီလိတ်မူးယစ်တပ်ဖွဲ့မှ တာဝန်ကျ ဒုတပ်ကြပ် တိုးမြင့်အောင်က ပြောသည်။

တာချီလိတ်မြို့နယ်၊ မိုင်းကိုးကျေးရွာအုပ်စု၊ ယမ်းခမ်း ၂ ကျေးရွာအနီးရှိ စိုင်းအေးနှင့် နန်းဝိုင်းတို့ ပိုင်ဆိုင်သော ရာဘာခြံအတွင်း မူးယစ်ဆေးဝါး သတင်းအရ ၀င်ရောက်ရှာဖွေရာ နေအိမ်အောက် သီးသန့် လျှို့ဝှက်ခန်းအတွင်း မူးယစ်ဆေးဝါး ထုတ်လုပ်သည့်
ဆက်စပ်ပစ္စည်းများနှင့် WY စာတမ်းပါ စိတ်ကြွဆေးပြား တစ်သိန်းအား တွေ့ရကြောင်း၊ သေနတ်မျိုးစုံသုံးလက်၊ လက်ပစ်ဗုံးတစ်လုံးနှင့် မော်တော်ကားငါးစီး၊ ဆိုင်ကယ်ခုနစ်စီးတို့အား သိမ်းဆည်းရရှိခဲ့ကြောင်း တာချီလိတ် မူးယစ်တပ်ဖွဲ့စု ၃၀ ထံမှသိရသည်။

အမှုနှင့် ပတ်သက်၍ ထွက်ပြေး တိမ်းရှောင်သွားသူ စိုင်းအေးနှင့် ၎င်း၏ အမျိုးသမီးဖြစ်သူ မနန်းဝိုးအား တာချီလိတ်မြို့မရဲစခန်းက မယ(ပ)၁၂/၂၀၁၆၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ပုဒ်မ ၁၅/၁၆(ခ)/၁၉(က)/၂၂(ခ)/၂၁ ဖြင့် အမှုဖွင့်ဆောင်ရွက်ထားကြောင်း သိရသည်။

သတင်း - MMK
The Ladies News
https://www.facebook.com/News.TheLadies