မန္တလေးတိုင်းဝန်ကြီးချုပ်အဖြစ် ခန့် အပ်ခြင်းခံရမယ့်လို့ သတင်းထွက်ပေါ်နေတဲ့ ဒေါက်တာဇော်မြင့်မောင် အကြောင်း

ကျနော်နှင့် ဒေါက်တာဇော်မြင့်မောင်

လူချစ်လူခင် များသလောက်ကို လူမုန်းလည်း များတဲ့သူ။
ဒါပေမယ့် ချစ်သူရော၊ မုန်းသူရောက လေးစားကြတဲ့သူ … ။
ဆရာဝန်ဆိုပေမယ့် သူ့ပုံစံက ကျနော်နဲ့ခပ်ဆင်ဆင်။ "အသားမည်းမည်း၊ ဂင်တိုတို၊ပုကွကွ" ဆိုတာ ကျနော်တို့နှစ်ယောက်ကို အနီးစပ်ဆုံးပုံဖော်တဲ့ဝေါဟာရဖြစ်မယ်။ မျက်နှာမှာ မှဲ့ခြောက်ပေါင်းများစွာပါတာက ကျနော့်ထက်သာသေး။ ဒါပေမဲ့ ဆရာဇော်က ကျနော့်ထက်ပိုပြီး ကြံ့ခိုင်တောင့်တင်းပါတယ်။ အကျဉ်းထောင်ထဲမှာ ကိုယ်လက်လှုပ်ရှားမှုကျန်းမာရေး အလိုက်စားဆုံးပုဂ္ဂိုလ်ဟာ ဆရာဇော်ပါပဲ။ ကျနော်သူ့ကို လူကိုယ်တိုင် မမြင်ဖူးခင် ကတည်းက နာမည်ကို ကြားဖူးနေတာပါ။ မန္တလေးအမရပူရသား။ ဒေါက်တာမျိုးရိုး။ အဖေဒေါက်တာ၊ဇနီးဒေါက်တာ၊ ညီအစ်ကိုမောင်နှမတွေဒေါက်တာ၊ ယောက္ဖဒေါက်တာ။ (နောက်ပိုင်းမှာဆို သားသမီး သုံးယောက်စလုံးပါ ဒေါက်တာ)။

ဒေါက်တာဇော်မြင့်မောင် ဆရာဝန်ဘွဲ့ရတော့ မန္တလေးဆေးတက္ကသိုလ်မှာပဲ ဆရာပြန်လုပ်တယ်။ ရှစ်လေးလုံး အရေးတော်ပုံကျတော့ တက်တက်ကြွကြွ ပါဝင်လာတယ်။ NLD ပါတီဝင်တယ်။ ၁၉၉၀ခုနှစ် ရွေးကောက်ပွဲမှာ အမရပူရမြို့နယ်ကနေ အမတ်အဖြစ် အရွေးခံရတယ်။၁၉၉၀၊ ဂန္ဓီညီလာခံနောက်ပိုင်း နဝတစစ်အစိုးရက လွှတ်တော်ခေါ် ပေးဖို့ ပျက်ကွက်တာကနေစပြီး နိုင်ငံရေး တင်းမာမှုတွေ ဆက်တိုက်မြင့်မားလာတယ်။ နိုင်ငံရေးအင်းအားစုတွေ (ဒီမိုကရက်တစ်တွေ)ကို တစ်စတစ်စ ဖြိုခွင်းလာတယ်။ ဒီလိုနဲ့ပဲ ဒေါက်တာဇော်မြင့်မောင်အပါအဝင် အမတ်တချို့ကို စင်ပြိုင်အစိုးရထောင်တယ်ဆိုတဲ့စွပ်စွဲချက်နဲ့ ဖမ်းဆီးထောင်ချတယ်။ အမတ်တချို့ကို ရရာပုဒ်မတွေနဲ့အရေးယူတယ်။ ဒေါက်တာစိန်ဝင်းအပါအဝင် အမတ်တချို့က နယ်စပ်(ပြည်ပ)ကို တိမ်းရှောင်သွားကြတယ်။ တချို့က သွေဖည်သွားကြ တယ်။ တချို့လည်း ဖောက်ပြန်သွားကြတယ်။

ကျနော် ဆရာဇော့်ကို စမြင်ဖူးတာက သိပ်တော့ ကဗျာမဆန်လှပါဘူး။ နေရာက အင်းစိန်ထောင်ရဲ့ စစ်ခွေးတိုက် ထဲမှာ။ အချိန်က ဝေလီဝေလင်း။ အဲဒီ့နေ့က မှတ်မှတ်ရရ ဧပြီလ ၁ရက်နေ့။ မနက်အစောကြီး ၃ နာရီခွဲလောက်မှာ ကျနော် တို့အခန်းတံခါးတွေရဲ့သော့ခလောက်တွေကို တဂျောင်းဂျောင်းနဲ့ လာဆွဲခါရင်း "ထောင်ပြောင်းပါတယ်။ ပြင်ထားကြ" လို့ လာပြောတယ်။ ဘယ်လောက် စိတ်တိုဖို့ကောင်းသလဲဗျာ။ အိပ်လို့ အကောင်းဆုံးအချိန်ကြီးမှာ အဓမ္မလာနှိုးတာလေ။ ဒါပေမယ့် အကျဉ်းထောင်မဟုတ်လား။ ကိုယ့်စိတ်နဲ့ ကိုယ့်ကိုယ်မှ မဟုတ်တာ။ ဒီလိုနဲ့ပဲ လာခေါ်တဲ့ဝါဒါနောက်ကိုလိုက်။ စစ်ခွေးတိုက်ရှေ့မှာ ခြေကျင်းအခတ်ခံ။ စစ်ခွေးတိုက်ထဲက သူတို့ဝင်ခိုင်းတဲ့ အခန်းထဲကိုဝငရတယ်။ ကိုယ့်လူတွေချင်းလဲ ကွဲကုန်တယ်။ ပြောင်းရွှေ့ရမယ့် ထောင်အလိုက် လူတွေပြန်တွဲလိုက်တာကိုး။ ကျနော်တို့အခန်းထဲကို ပါလာတဲ့ တစ်ယောက်က ကိုကြည်ဖေကျော်(ဘိုကလေး)။ သူက ထောင်သက်ရင့်နေပြီ။ ထောင်ထဲမှာနေသားတင် ၇နှစ်ကျော်လို့ မူလအမှုကလည်း လွတ်ပြီ။ ဒါပေမယ့် လွတ်ရက်မစေ့ခင် ထောင်ထဲမှာ နောက်အမှုထပ်ဖြစ်လို့၊ ထောင်ထဲမှာ ထောင်ထပ်ကျ နေသူ။ ထောင်တွင်း နောက်အမှုမှာ ဒေါက်တာဇော်မြင့်မောင်က သူ့အမှုတွဲ။ ကျနော် ကြားဖူးရုံသာ ကြားဖူးတဲ့ ဒေါက်တာ ဇော်မြင့်မောင်ဆိုတာကို သူပဲ ပြတာ။ ခြေကျင်း အခတ်ခံပြီးတဲ့အခါ ကျနော်တို့ အခန်းရှေ့ကနေ ဖြတ်ဖြတ်လျှောက်သွား ကြတဲ့သူတွေထဲက တစ်ယောက်ကို "အဲဒါပေါ့ ဒေါက်တာဇော်မြင့်မောင်" ဆိုပြီး ညွှန်ပြတာ။ ဒါပေမယ့် ကျနော်က လွဲပါ တယ်။ ဆရာဝန်ဆိုတော့ ဖြူဖြူသန့်သန့်၊ခန့်ခန့်ချောချောကို လိုက်ရှာကြည့်နေတာနဲ့ ကျော်သွားတော့မလို့။ ဆရာဝန်ဆိုတော့ ကျနော့်လို အသားမည်းမည်း၊ဂင်တိုတို၊ပုကွကွလို့ ဘယ်ထင်မှာလဲဗျာ။ပြီးတော့ အဲဒီ့နေ့မှာ မြင်တွေ့ လိုက်ရတဲ့ သူ့ပုံစံကိုလည်းကြည့်ဦးလေ။ ထောင်ကပေးတဲ့ ဖျင်ကြမ်းအဖြူ ပုံစံအင်္ကျီကို လက်မောင်းရင်းကနေ ဖွာလန် ကြဲအောင် ဖြတ်ထားတယ်။ ဝါကျင့်ကျင့်ဖြစ်နေတဲ့ ပုံစံပုဆိုးကိုလည်း ဒူးခေါင်းဖုံးရုံ တိုတိုလေးဝတ်ထားတယ်။ ပြီးတော့ သူ့အရပ်နီးပါး လောက်ရှိတဲ့ ဆာလာအိတ်ကြီးကို နောက်ကျောမှာပိုး၊ သိုင်းကြိုးကို နဖူးမှာချိတ်လို့။ လက်တစ်ဖက်မှာလည်း အထုပ်တစ်ထုပ်က ဆွဲထားသေးတယ်။ ကျန်တဲ့လက်တစ်ဖက်က ခြေကျင်းကိုကိုင်။ မြင်ရတာ ကို့ယို့ကားယားဆိုတော့ ဘယ်လိုလုပ် ဆရာဝန်လို့ ထင်ရက်ပါ့မလဲ။

အဲဒီ့နေ့ ထောင်ပြောင်းတာနိုင်ငံရေးအကျဉ်းသားတွေချည့်ပါပဲ။ အရေအတွက်လည်း အတော်များပါတယ်။ ပြောင်းရတဲ့ထောင်တွေက တောင်ငူ၊မန္တလေး၊မြင်းခြံ၊မြစ်ကြီးနား။ ပြောင်းရတဲ့သူစုစုပေါင်းက တစ်ရာကျော်လောက်ရှိမယ်။ လူဟောင်းတွေရော၊လူသစ်တွေရော၊လူငယ်တွေရော၊လူကြီးတွေရော အရောရောအထွေးထွေး။ အထူးတိုက်ကလူတွေကို ဘယ်တုန်းကမှထောင်ပြောင်းလေ့ မရှိခဲ့ပေမယ့်၊ဒီတစ်ခေါက်မှာတော့ အထူးတိုက်ကနေ ဦးဝင်းထိန်(NLD) ထောင်ပြောင်း ပါလာလို့ အားလုံး တအံ့တသြ ဖြစ်ကြရတယ်။ ဦးဝင်းထိန်ကိုယ်တိုင်တောင် April Fool အဖြစ် လာနောက်တယ်လို့ ထင်နေတာတဲ့။ ဒါပေမဲ့ ဘယ်သူက ဘယ်ထောင်ကိုပြောင်းရမယ်ဆိုတာတော့ ဘယ်သူမှမသိရ။ ကြိုပြောလေ့လည်း မရှိ။ ခေါ်တဲ့နောက်ကိုသာ တစ်သီတစ်တန်းကြီး လိုက်သွားရတာ။ အဲဒီ့နေ့ ထောင်ပြောင်းရတဲ့သူတွေ အများကြီးထဲမှာ အပြင် မှာကတည်းက လက်တွဲခဲ့ဖူးသူတွေ၊ ခင်မင်ရင်းနှီးခဲ့တဲ့သူတွေလည်း အတော်များများပါလာပါတယ်။ ကျနော်တို့အမှုတွဲ ကျောင်းသား ၄ယောက်စလုံး ပါတယ်။ လှိုင်သာယာက ဦးဖိုးအေးတို့ သားအဖပါတယ်။ ကိုသားကြီး၊ကိုမျိုးမင်းနိုင် (မျိုးကြီး/နန္ဒ)တို့အတွဲတွေပါတယ်။

ဘယ်ထောင်ကို ဘယ်သူတွေပြောင်းကြရမယ်ဆိုတာ အတိအကျ မသိရပေမယ့် အရင်ဆုံးသွားရ မယ့်လမ်း ကြောင်းက မန္တလေးထောင်ဆိုတော့၊ မန္တလေးသားဒေါက်တာဇော်မြင့်မောင် အလွန်ပျော်နေပါတယ်။ ထောင်ထဲမှာ နေလာရတာလည်း ၇နှစ်လောက်ရှိနေပြီဆိုတော့ အခုလိုအုတ်ရိုးပြင်ပက မြင်ကွင်းတွေကို
မြင်ရ၊ ပြင်ပလေကို ရှူရှိုက် ခွင့်ရတာကြောင့်လည်း ဆရာဇော်တစ်ယောက် အတော်လေး ရွှင်ရွှင်လန်းလန်း၊တက်တက်ကြွကြွဖြစ်နေပါတယ်။ ဆရာဇော့်မှာ တက်ကြွဖြတ်လတ်တဲ့ ဟန်ပန်ရှိတယ်။ စကားပြောရင်လည်း မျက်နှာသာမက၊ တစ်ကိုယ်လုံး ပါအောင် ပြောတတ်တယ်။ ဟန်ဆောင်ပလွှားမှုတွေ လုံးဝမရှိဘဲ ဟောဟောဒိုင်းဒိုင်းနဲ့ အားရပါးရ ပြောတတ်တယ်။ " နောက်ထပ် ၇ နှစ်နေဖို့ ခွန်အားတွေ ရှိသွားပြီ" တဲ့။ (ဒါပေမဲ့ နောက်ထပ် ၁၀နှစ်ကျော်လောက် ထပ်နေရဦးမယ်ဆိုတာကိုတော့ ဘယ်သူမှ မထင်ရက်ကြ ဘူးလေ) ရထား အချုပ်တွဲထဲမှာဆိုလည်းသူ့အသံချည့်ပါပဲ။ ကျနော်တို့စီးရတဲ့ ရထားကလည်း အတော်နှေး ပါတယ်။လမ်းမှာတွေ့သမျှ ဘူတာစဉ် အကုန်ရပ်တယ်။ ဧပြီလ ၁ရက်နေ့၊ နေ့လည်လောက်ကတည်းက ရန်ကုန်ဘူတာ ကြီးကနေ ထွက်ခဲ့တဲ့ရထားဟာ နောက်တစ်ရက် နေ့ခင်းပိုင်းမှ မန္တလေးကိုရောက်တယ်။

အဲဒီ့ကာလမှာ မန္တလေးထောင်က နန်းတွင်းထဲကနေ အိုးဘိုဘက် ရွှေ့ပြီးနေပါပြီ။ ဒါပေမဲ့ ဆောက်လက်စတွေလည်း ရှိနေပါသေးတယ်။ အကျဉ်းထောင်ရဲ့ ထုံးစံအတိုင်း၊ ကျနော်တို့ထောင်ပြောင်းလူသစ်တွေ ရောက်လာတဲ့အခါ ဦးချိုးဖို့ ကြိုးစားပါတယ်။ ပါလာသမျှ ပစ္စည်းတွေ အတော်များများကို အကြောင်းအမျိုးမျိုးပြပြီး သိမ်းပစ်တယ်။ တစ်ကျောင်းတစ်ဂါထာ၊ တစ်ရွာတစ်ပုဒ်ဆန်းဆိုသလို၊ အင်းစိန်ထောင်မှာ တရားဝင်တဲ့ပစ္စည်းဟာ မန္တလေးထောင်ရောက်မှ တရားမဝင်ဖြစ်ရတာမျိုးလည်း ရှိတယ်။ ကျနော်တို့ရောက်လာမှ အရေးပေါ် ထုတ်ပြန်လိုက်တဲ့ စည်းကမ်းအသစ်တွေလည်း ပါတယ်။ ဖိနပ်လုံးဝမစီးရဘူး၊ ပလပ်စတစ်ခွက် လုံးဝ မသုံးရဘူး ဆိုတာမျိုးပေါ့။ ကျနော်တို့ကတော့ ဒီမန္တလေးထောင်မှာနေရမှာမဟုတ်ပါဘူး။ တခြားထောင်ကို ထပ်ပြောင်းရဦးမှာပါဆိုပြီး ဆရာဇော်က ပြန်တောင်းလို့ ဖိနပ်တွေ ပြန်ရခဲ့တယ်။ဘူးဝမှာ တန်းစီလူစစ် နေတုန်း၊ ထောင်အရာရှိတွေ သူတို့အချင်းချင်း ပြောနေသံတွေအရ၊တချို့ကို မြင်းခြံထောင်၊ တချို့ကို မြစ်ကြီးနားထောင် ပြောင်းမယ်ဆိုတာတော့ သိလိုက်ရတယ်။ ကျနော်တို့အားလုံးကို မန္တလေးထောင်ရဲ့တိုက်ခန်းတွေထဲ
ခွဲထည့်တယ်။ ညနေစောင်းမှာတော့ တချို့ကို တိုက်ရုံး ခန်းခေါ်ပြီး ကျန်းမာရေး စစ်ဆေးတယ်။ ကျနော့်အရှေ့မှာက ဆရာဇော်။ နောင်မှ သိလိုက် ရတာက မနက်ဖြန်မြစ်ကြီးနား ထောင် ဆက်ပြောင်းရမယ့်သူတွေကို fit for travel ဖြစ်မဖြစ် စစ်ဆေးတာ တဲ့။ အဲဒီ့မှာ မန္တလေးထောင်ဆေးရုံအုပ်ကြီး ဒေါက်တာဦးအောင်သန်းနဲ့ ဆရာဇော်တို့ တွေ့ကြတယ်။ ရှေ့မှာပြောခဲ့ပါရောလား။ ဆရာဇော်တို့ကဒေါက်တာမျိုးရိုး ဆိုတာလေ။ ဆရာဇော့်အဖေ ဒေါက်တာဦးချစ်မောင်ဆိုတာက ဒေါက်တာဦးအောင်သန်းရဲ့ဆရာရင်း။ ဆရာဇော့်ကို ဆေးစစ်ရင်းနဲ့ မိသားစုဆီ အကျိုးအကြောင်း ပြောပေးပါ့မယ်လို့ ဂတိပေးတယ်။ နဝတရဲ့မျက်စောင်း အကြောင်းသုံးပါး မရွေးတဲ့ကာလမို့၊ အမှန်တကယ်အကြောင်းကြားပေးရဲလိမ့်မယ်လို့ ဘယ်သူမှ မယုံကြည်ခဲ့ကြပါဘူး။

နောက်တစ်ရက်၊နေ့လည်မှာတော့ မြစ်ကြီးနားထောင်ကို ဆက်ပြောင်းရမယ့်ကျနော်တို့(၁၂) ယောက်ကို လာခေါ်ထုတ်ပါတယ်။ မန္တလေးထောင်ကနေ အချုပ်ကားပြာကြီးနဲ့ မန္တလေးဘူတာကြီးကို သွားရတယ်။ မြစ်ကြီးနားကို ထွက်မယ့်ရထားက အဆင်သင့်မရှိသေးတော့ ကားပြာကြီးပေါ်မှာပဲ အတော်ကြာကြာ နေနေရတယ်။ အဲဒီ့အချိန်မှာပဲ ဆရာဇော့်ရဲ့ဇနီးဒေါက်တာဒေါ်ယုယုမေ ဆိုင်ကယ်လေးနဲ့ ရောက်လာပါတယ်။ ဒေါက်တာဦးအောင်သန်း အကြောင်းကြား လို့တဲ့။ ကျနော်တို့မှာ မန္တလေးထောင်ဆေးရုံအုပ်ကြီး ဒေါက်တာဦးအောင်သန်းကို ကြည်ညိုလေးစားလို့မဆုံး ဖြစ်ခဲ့ရ ပါတယ်။ ရထားပေါ်ကို တက်ရတော့လည်း ရထားက အတော်နဲ့မထွက်ပါဘူး။ ရထားမထွက်သ၍ ဆရာဇော့်ဇနီး ဒေါက်တာ ဒေါ်ယုယုမေလည်း အတော်ပင်ပမ်းရှာပါတယ်။ လိုအပ်မယ်ထင်တာတွေ သွားဝယ်ပေးလိုက်၊ ရထားဆီ ပြန်လာလိုက်။ အိမ်လိပ်စာတွေပေး၊ဖုန်းနံပါတ်တွေပေးပြီး အိမ်တွေကို ဆက်သွယ်ခိုင်းတဲ့ သူတွေကလည်း ခိုင်းပေါ့။ ညနေစောင်းမှာ ရထားထွက်တော့လည်း၊ ရထားလမ်းနဲ့ယှဉ်လျက် ကားလမ်းကနေ ဆိုင်ကယ်နဲ့ လိုက်လာပါသေးတယ်။ ရထားပေါ်နဲ့ ဆိုင်ကယ်ပေါ်ကနေ တစ်ယောက်နဲ့တစ်ယောက် လက်ပြနှုတ်ဆက် ကြလို့မဆုံး။ လမ်းချင်း ကွာသွားတဲ့အခါ မြင်ကွင်းကနေ ပျောက်သွားလိုက်၊ခနနေတော့ ပြန်ပေါ်လာလိုက်။ ဒီလိုနဲ့ ထုံးဖိုဘူတာမှာ ရထားခနကလေးရပ်တော့၊ ကြိုတင်အကြောင်း ကြားထားလို့ထင်ပါရဲ့ ဆရာဇော့်ရဲ့သားသမီးတွေနဲ့ မိသားစုတွေ၊ မိတ်ဆွေတွေ လာပြီးနှုတ်ဆက်ကြတယ်။ ဆရာဇော် စတင်အဖမ်းခံရစဉ် တုန်းက တစ်နှစ်သမီးလေးက အခုဆို ၇နှစ်ကျော်နေပြီ။ ဖခင်ဖြစ်သူကို ပထမဆုံးအကြိမ် နီးနီးကပ်ကပ် မြင်ခွင့်ရတာဆိုတော့ ကလေးက မျက်ရည်ဝဲနေပါတယ်။ မျက်ရည်ဥလေးက မျက်ဝန်းစပ်မှာ တွဲလဲလေး။
" သမီး ဖေဖေက ငိုတာမကြိုက်ဘူးနော်" လို့ အမေကလည်း ပြောလိုက်ရော၊ တွဲလဲခိုနေတဲ့ မျက်ရည်ဥလေး ပြန်ဝင်သွားတာကို ကျနော်တို့ တတွေ တအံ့တသြမြင်လိုက်ကြရတယ်။ ဆရာဇော်က အတော်လေးကို စိတ်ခိုင်ပါတယ်။ ဘေးက ကျနော်တို့လူငယ် တွေတောင် မျက်ရည်မဆယ်နိုင်ဖြစ်ကြရတဲ့ မိသားစုတွေ့ဆုံပွဲမှာ ဆရာဇော် တစ်ချက်မှ မျက်နှာမပျက်ခဲ့ပါဘူး။

 မြစ်ကြီးနားထောင်ဟာ ကျနော်တို့ မရောက်ခင်အထိက ဂငယ်ထောင်ပါ။ ထောင်အသေးလေး။ အကျဉ်းသားစုစု ပေါင်းမှ(၈၀၀)လောက်ရှိတာပါ။ ထောင်ဆေးရုံဆိုတာလည်း မရှိပါဘူး။ ကျနော်တို့ကို အဓမ္မ ပြောင်းရွှေ့ပြီး ကကြီးထောင် အဖြစ် မဟားဒယားသတ်မှတ်လိုက်တာပါ။ကျနော်တို့တတွေ မြစ်ကြီးနားထောင်ကိုရောက်တော့ ည ၉နာရီထိုးပါပြီ။ ခပ်မှိန် မှိန်မီးရောင်မှာမြင်နေရတဲ့ တိုက်ဟောင်းတစ်ခုထဲကို ဒေါက်တာဇော်မြင့်မောင်နဲ့ ဒေါက်တာခင်ဇော်ဝင်းတို့ကို ခေါ်သွားပါ တယ်။ ကျန်တဲ့ ကျနော်တို့ ၁၀ယောက် ကိုတော့ ငါးခန်းတွဲမျက်နှာချင်းဆိုင် အခန်း ၁၀ခန်းရှိတဲ့ တိုက်သစ်ထဲမှာ တစ်ခန်းစီ ထားပါတယ်။ ရောက်စ မှာ ထုံးစံအတိုင်း အနေနည်းနည်းကြပ်ပေမယ့်၊ ICRC ရောက်လာပြီးနောက်ပိုင်း မှာတော့ အနည်းငယ်သက် တောင့်သက်သာ ဖြစ်လာပါတယ်။ ဆရာဇော်ဟာ ကိုယ့်အချင်းချင်း စည်းရုံးရေးထက်၊ ထောင်ဝန်ထမ် တွေကိုစည်းရုံးတာ ပိုအောင်မြင်ပါတယ်။ ပွင့်ပွင့်လင်းလင်း ဟောဟောဒိုင်းဒိုင်းပြောတတ်တဲ့ သူ့စရိုက်သဘာဝကြောင့် မလိုမုန်းထားဖြစ်သူတွေလည်း ရှိပါတယ်။ ထောင်ဝန်ထမ်းတွေအပေါ် စည်းရုံးရေးကောင်းတဲ့ ဆရာဇော်ကြောင့် ထောင်တွင်းနိုင်ငံရေးလှုပ်ရှားမှုတွေတော့ အများကြီးလုပ်နိုင်ခဲ့ပါတယ်။ အမှတ်တရ စာစောင်တွေ၊ လက်ရေးဂျာနယ်၊ မဂ္ဂဇင်းတွေ အတော်များများလည်း ထုတ်နိုင်ခဲ့ပါတယ်။ ဆရာဇော်က စာလည်း အတော် ဖတ်ပါတယ်။ သိပ်မညံ့လှတဲ့ ကဗျာအတိုအစလေးတွေလည်းရေးပါတယ်။ နိုင်ငံရေး ရပ်တည်ချက်ကလည်း အတော်ကို ခိုင်မာပါတယ်။ ကျနော့်လိုပဲ လူပုစိတ်တို ဆိုပေမယ့် အခက်အခဲ အကြပ်အတည်းကြားထဲ၊ မိုးထဲရေထဲရောက်တဲ့အခါတွေမှာတော့ အလွန်ကို စိတ်ရှည် သည်းခံနိုင်စွမ်း ရှိပါတယ်။ သူ့တစ်ဦးတည်း ရပ်တည်ချက်အရ ခေါင်းမာတတ်ပေမယ့် အများကျိုးနဲ့ ယှဉ်လာတဲ့အခါမျိုး၊ အထူးသဖြင့် လူငယ်တွေနဲ့ ပတ်သက်လာရင်ပျော့ပြောင်းလေ့ရှိပါတယ်။ ဆရဇော့်ဆီကနေ ကျနော်တို့ တတွေ အတုယူရ တဲ့ ထူးခြားမှုကတော့၊ ထောင်ထဲမှာပေမယ့် အချိန်ကို အလဟဿ မဖြစ်စေတာပါပဲ။ သူ့ရဲ့အချိန်အများစုကိုလည်း စာဖတ်ခြင်း၊ ကျန်းမာရေးလေ့ကျင်းခန်းလုပ်ခြင်း၊ တရားထိုင်ခြင်းတွေနဲ့သာ ကုန်လွန်စေပါတယ်။

၂၀၀၄ခုနှစ်နောက်ပိုင်း၊ နိုင်ငံရေးအကျဉ်းသားတချို့ကို သာမန်အကျဉ်းသားတွေ အများစုနဲ့ရောပြီး အသုတ်လိုက်၊ အသုတ်လိုက် ပြန်လွှတ်ပေးတဲ့အခါ အများနည်းတူပဲ ဆရာဇော်လည်း မျှော်လင့်ခဲ့မိမှာပါ။ ဒါပေမယ့် ကိုယ်မပါဘဲ ကျန်နေ ရစ်လို့လည်း ဘယ်တော့မှ အနေအစား ပျက်လေ့မရှိပါဘူး။ ဒါကလည်း ထုံးစံပါပဲ။ ထောင်ထဲမှာ ကျန်နေရစ်ရသူအတွက်က ဆက်လက်ရှင်သန်၊ရပ်တည်နိုင်ဖို့အတွက် ရုန်းကန် ရင်ဆိုင်ရဦးမှာ မဟုတ်လား။ ထိုင်မှိုင်နေလို့မှ မရတာ။ ဒါပေမယ့် ၂၀၀၅ခုနှစ်၊ ဇူလိုင်လ ကျနော်တို့တတွေ လွတ်တဲ့အခါမှာတော့ ဆရာဇော် အတော်လေး စိတ်မကောင်းဖြစ် ကျန်ရစ်ခဲ့ပုံရ ပါတယ်။ လွတ်သွားတဲ့သူ ၅ယောက်က သူနဲ့အရင်းနှီးဆုံးသူတွေဖြစ်ယုံမက၊ လူကလည်း မကျန်တော့သလောက် ဖြစ်သွား တာကိုး။ စစ်အစိုးရက ဆရာဇော့်အပေါ်မှာတော့ အတော်ကို အညှိုးကြီးခဲ့ပုံ ရပါတယ်။ ကျနော်တို့ လွတ်မြောက်ပြီးမှကိုပဲ အကြိမ်ကြိမ်ထုတ်ပြန်တဲ့ လွတ်ငြိမ်းချမ်းသာခွင့်တွေမှာလည်း ဆရာဇော်မပါပါဘူး။

၂၀၁၁ခုနှစ်၊နှစ်ဆန်း ပိုင်းလောက်မှ ဆရာဇော် ပြန်လွတ်တယ်လို့ ကြားပါတယ်။ ထောင်ထဲမှာ ဆရာဇော်နေခဲ့ရတာ အနှစ် ၂၀ကျော်လိမ့်မယ် ထင်ပါတယ်။ ဆရာဇော် ထောင်ကလွတ်တော့ ဆရာဝန်လိုင်စင် ပြန်လျှောက်တာ မရတဲ့အကြောင်း ကြားရပါတယ်။ ထုံးဖိုဘူတာမှာ မျက်ရည်ဥလေးတွေပြန်သိမ်းနိုင်ခဲ့တဲ့ သမီးငယ်လေးတောင် ဆရာဝန်ဘွဲ့ရသွားပြီ ဆိုတာလည်း ကြားရပါတယ်။ ထောင်ထဲမှာ ကိုယ်ရောစိတ်ပါ ကျန်းကျန်းမာမာနဲ့ နေထိုင်နိုင်ခဲ့ပြီး၊ ကိုယ့်ရဲ့ယုံကြည်ချက်၊ ရပ်တည်ချက်တွေ မယိုင်မလဲ၊ မပွန်းပဲ့ခဲ့တဲ့ ဆရာဇော့်အတွက် ကျနော်ဂုဏ်ယူပါတယ်။ ဒါ့အပြင် မမေ့မလျော့ ထပ်ဆင့်ဂုဏ်ပြုသင့်သူ တစ်ယောက်ကတော့ ဆရာဇော့်ရဲ့ဇနီး ဒေါက်တာဒေါ်ယုယုမေပါပဲ …. ။ ။

ကိုမာကီ(၈၈မျိုးဆက်)

ဇူလိုင်လ(၂၀)ရက်နေ့ထုတ် အာရှအလင်းဂျာနယ်မှ …. ….