ရှမ်းပြည်နယ် လွှတ်တော် အစည်းအဝေး ကျင်းပနေစဉ် |
တိုက်ပွဲအတွင်းမှာ ပြည်သူတွေ သေဆုံးရတာကို ကန့်ကွက်ရှုတ်ချကြောင်းနဲ့ စစ်ဘေးဒုက္ခသည်တွေ ပြန်လည် ထူထောင်ရေးအတွက် အကူအညီပေးဖို့ ရှမ်းပြည်နယ် အစိုးရကို တိုက်တွန်းတာဖြစ်တယ်လို့ ရှမ်းတိုင်းရင်းသားများ ဒီမိုကရေစီအဖွဲ့ချုပ် ကျောက်မဲမြို့နယ် အမှတ် ၂ ပြည်နယ်လွှတ်တော် ကိုယ်စားလှယ် ဦးစိုင်းထွန်းဥာဏ်က ပြော ပါတယ်။
"အရေးကြီးတဲ့အဆိုထဲမှာ လက်နက်ကိုင်တိုင်းရင်းအချင်းချင်း တိုက်ခိုက်တဲ့စစ်ပွဲမှာ လူသားတွေကို လူသားတိုင်းအဖြစ်အသုံးပြုပြီးတော့ စစ်ပွဲဆင်နွှဲတာကိုတော့ ရှမ်းပြည်နယ်မှာလည်း ဖြစ်ပွားနေတယ်၊ ရှမ်းပြည်နယ်လွှတ်တော်အနေနဲ့ ဒီကိစ္စကို အပြင်းအထန် ကန့်ကွက်ရှုတ်ချသင့်တာပေါ့၊ ကျနော် ပထမ တစ်ချက်အနေနဲ့ မီးမောင်းထိုးပြီးတော့ တင်ပြတာပေါ့လေ၊ နံပါတ် ၂ က အရပ်သားတွေ သတ်ဖြတ်ခံ ရတယ်၊ ပြည်သူတွေရဲ့ အိမ်နဲ့ပစ္စည်းတွေ လုယက်ခံရတာပေါ့လေ၊ အဲ့ဒါကို တိုင်းရင်းသားအချင်းချင်း တိုက်ခိုက်တဲ့စစ်ပွဲမှာ အပြစ်မဲ့ပြည်သူများကို သတ်ဖြတ်တာတို့ဘာတို့ အဲ့ဒါလည်းပဲ လွှတ်တော်ကနေ တဆင့်ပေါ့လေ အပြင်အထန် ကန့်ကွက်ရှုတ်ချဖို့ စစ်ပွဲကာလအတွင်းမှာ နေအိမ် ၈ လုံး မီးရှို့ခံရတယ်၊ ဆိုင်ကယ် ၈ စီး ၉ စီးလောက် ဖျက်ဆီးခံရတယ်၊ အခြားပစ္စးတွေအများကြီး လုယက်ခံရတယ်၊ ဒီလိုမျိုး အနေအထားမှာဆိုလို့ရှိရင် ပြန်လည်ထူထောင်တဲ့ကာလမှာ အစိုးရအနေနဲ့ အပြည့်အဝ ကူညီဆောင် ရွက်ပေးဖို့ပေါ့လေ ကျနော် အလေးအနက် အစိုးရကို တိုက်တွန်းတာပေါ့"
ပြီးခဲ့တဲ့နှစ် နိုဝင်ဘာလကစပြီး ရှမ်းပြည်နယ်မြောက်ပိုင်း နမ့်ခမ်း၊ နမ့်ဆန်၊ မန်တုံ၊ ကျောက်မဲ၊ သီပေါနဲ့ နမ့်မတူမြို့နယ်တွေမှာ TNLA နဲ့ RCSS/SSA တို့ကြား တိုက်ပွဲတွေ ဖြစ်ပွားနေတာ ဖြစ်ပါတယ်။
တိုက်ပွဲတွေကြောင့် ကျောက်မဲမြို့နယ် မင်းကုန်း၊ ညောင်မောင်းနဲ့ တော့ဆန်ကျေးရွာတွေမှာ နေအိမ်တွေနဲ့ ဆိုင်ကယ်တွေ ဖျက်ဆီးခံခဲ့ရတယ်လို့ သိရပါတယ်။
တိုက်ပွဲတွေကြောင့် ကျောက်မဲမြို့ပေါ်မှာ ဒုက္ခသည်စခန်း ၂ဝ ကျော် ဖွင့်လှစ်ထားရပြီး စစ်ဘေးဒုက္ခသည် ၄ ထောင် ကျော် ခိုလှုံနေကြပါတယ်။ ဒီရက်ပိုင်းအတွင်း တိုက်ပွဲတွေ မရှိပေမယ့် ဒုက္ခသည်တွေဟာ နေရပ်ကို မပြန်ရဲကြသေးဘူးလို့လည်း သိရပါတယ်။
အဲ့ဒီအဆိုဟာ ပြီးခဲ့တဲ့ဖေဖော်ဝါရီလ ၈ ရက်နေ့မှာ အသစ်စတင်တဲ့ တိုင်းဒေသကြီးနဲ့ ပြည်နယ်လွှတ်တော် အစည်းအဝေးတွေမှာ ပထမဆုံးတင်သွင်းတဲ့ အဆိုဖြစ်ပါတယ်။ အဆိုကို ပြည်နယ်လွှတ်တော်မှာ ဆွေးနွေးဖို့ ကန့်ကွက်သူမရှိတာကြောင့် မနက်ဖြန် ဆွေးနွေးကြမှာဖြစ်ပါတယ်။
ဒီနေ့ ရှမ်းပြည်နယ် လွှတ်တော်အပြင် ဧရာဝတီတိုင်းဒေသကြီးနဲ့ မကွေးတိုင်းဒေသကြီးတို့မှာ လွှတ်တော်အစည်း အဝေးတွေ ပြန်လည်ကျင်းပခဲ့ပြီး လွှတ်တော်ရေးရာ ကော်မတီတွေကို ဖွဲ့စည်းခဲ့ကြပါတယ်။
RFA Burmese
http://www.rfa.org/burmese/news/northern-shan-state-war-refugees-02252016101155.html
စစ်ဘေးဒုက္ခသည်တွေကို အမြန်ဆုံးကူညီဖို့ ပြည်နယ် လွှတ်တော်မှာ အဆိုတင်သွင်း
Reviewed by THITHTOOLWIN
on
23:47
Rating: