ဗြိတိန်က မြန်မာ့ သယ်ပို့ အခြေခံအဆောက်အအုံ အတွက် ကူညီမယ်

 မြန်မာ့ ပို့ဆောင်ရေး အခြေခံ အဆောက်အအုံတွေ အတွက် ဗြိတိန်ကူညီဖို့ ရှိ

မြန်မာနိုင်ငံရဲ့ ပို့ဆောင်ရေး အခြေခံ အဆောက်အအုံပိုင်း ကဏ္ဍတွေမှာ ဗြိတိသျှ ကုမ္ပဏီတွေ ပါဝင် ဆောင်ရွက်နိုင်မယ့် စီးပွားရေး အခွင့်အလမ်းတွေ ရှာဖွေဖို့နဲ့ ယူကေဘက်က မြန်မာနိုင်ငံကို ထုတ်ကုန် တင်ပို့တဲ့အခါမှာ ပံ့ပိုး ပေးဖို့ ဗြိတိန်နိုင်ငံက အမေရိကန် ဒေါ်လာ သန်း ၃၀၀ ဘိုး ထောက်ပံ့ ကူညီသွားမယ်လို့ ဗြိတိန်ရဲ့ ပို့ဆောင်ရေး ဝန်ကြီး လော့ဒ် အာမာ့ဒ်က ပြောပါတယ်။

သောကြာနေ့က မြန်မာနိုင်ငံ ကုန်သည်များနဲ့ စက်မှုလုပ်ငန်းရှင်များ အသင်းချုပ်မှာ ကျင်းပတဲ့ မြန်မာနိုင်ငံရဲ့ သယ်ယူပို့ဆောင်ရေး အခြေခံအဆောက်အအုံပိုင်း လိုအပ်ချက်များနဲ့ ယူကေရဲ့ အခန်းကဏ္ဍ ဆိုင်ရာ ဆွေးနွေးပွဲမှာ ပြောခဲ့တာပါ။

ဒါနဲ့ ပတ်သက်လို့ အဲဒီဆွေးနွေးပွဲကို ကိုယ်တိုင် တက်ရောက်ခဲ့တဲ့ မြန်မာနိုင်ငံ ကုန်သည်များနဲ့ စက်မှုလုပ်ငန်းရှင်များ အသင်း ဒုတိယဥက္ကဌ ဒေါက်တာ မောင်မောင်လေးက ဗြိတိသျှ ပို့ဆောင်ရေး ဝန်ကြီးဟာ ပို့ဆောင်ရေးကဏ္ဍနဲ့ ပတ်သက်လို့ ကျွမ်းကျင်ပြီး အတွေ့အကြုံ များသူ ဖြစ်တာကြောင့် မြန်မာနိုင်ငံအနေနဲ့ အဲဒီကဏ္ဍမှာ ဘယ်လို ရှေ့ဆက်သွားမလဲ ဆိုတာနဲ့ ပတ်သက်လို့ အခွင့်အရေးတွေနဲ့ စိန်ခေါ်မှုတွေကို ဆွေးနွေးခဲ့ကြောင်း ပြောပါတယ်။

ဒီပံ့ပိုး ပေးသွားမယ့် ဒေါ်လာသန်း ၃၀၀ ကိုတော့ ငွေသား အဖြစ်မဟုတ်ဘဲ မြန်မာဘက်က ဗြိတိသျှ ကုမ္ပဏီတွေဆီကနေ ဝယ်ယူတဲ့ အခါမှာ အဲဒီ ကုမ္ပဏီတွေကို ပိုက်ဆံ စိုက်ထုတ်ပေးတဲ့ သဘောဖြစ်ကြောင်း၊ တချိန်မှာ ပြန်ဆပ်ရမှာ ဖြစ်ပြီး နိုင်ငံတော်နဲ့ ပူးပေါင်းဆောင်ရွက်တဲ့ အခြေခံအဆောက်အအုံ စီမံကိန်းတွေ မှာ ပံ့ပိုးပေးသွားဖို့ အတွက် ဖြစ်တယ်လို့ ဆိုပါတယ်။

ဒီပံ့ပိုးငွေ တွေကို ယူကေရဲ့ ထုတ်ကုန်တင်ပို့ရေး ဘဏ္ဍာငွေ ဆိုင်ရာ အဖွဲ့ UKEF ကနေပြီး ပံ့ပိုးပေးသွားမှာ ဖြစ်တယ်လို့ သိရပါတယ်။

BBC Burmese
http://www.bbc.com/burmese