တပ်မတော် ကာကွယ်ရေးဦးစီးချုပ် ပင်စင်သက်တမ်း ၆၅ နှစ်သတ်မှတ်ရန် တပ်မတော်လေးလပတ် အစည်းအဝေးတွင် ဆုံးဖြတ်

 တပ်မတော်ကာကွယ်ရေးဦးစီးချုပ်၏ ပင်စင်သက်တမ်းကို ၆၅ နှစ် သတ်မှတ်ရန် တနင်္လာနေ့က ပြီးဆုံးခဲ့သည့် တပ်မတော်လေးလပတ် အစည်းအဝေးတွင် ဆုံးဖြတ်လိုက်ကြောင်း တပ်မတော် အရာရှိတစ်ဦးက ဖေဖော်ဝါရီ ၁၁ ရက်တွင် The Ladies သို့ အတည်ပြုပြောသည်။

"ကာကွယ်ရေးဦးစီးချုပ်က သူကတော့ ၆၅ မှာ ပင်စင်ယူမှာလေ။ ဒါပေမဲ့ ပြောလို့မရသေးဘူးပေါ့။ ဒီကြားထဲ ပြောင်းရင်လည်း ပြောင်းမယ်၊ မပြောင်းရင်လည်း မပြောင်းဘူးပေါ့" ဟု အဆိုပါအရာရှိက The Ladies သို့ ပြောသည်။

ကာကွယ်ရေးဦးစီးချုပ်နှင့် ဒုတိယ ကာကွယ်ရေးဦးစီးချုပ်တို့ နှစ်ဦး၏ ပင်စင်သက်တမ်းကို ၆၅ နှစ် သတ်မှတ်ရန် တနင်္လာနေ့က ပြီးဆုံးခဲ့သည့် တပ်မတော် ၄ လပတ် အစည်းအဝေးတွင် ဆုံးဖြတ်လိုက်ကြောင်း စစ်တပ်နှင့်နီးစပ်သည့် အသိုင်းအ၀ိုင်းက ပြောကြားသည်ဟု BBC မြန်မာပိုင်း သတင်းဌာန၏ ဖေဖော်ဝါရီ ၁၀ ရက် ဗုဒ္ဒဟူးနေ့ ညပိုင်းတင်ဆက်သော သတင်းအကျဉ်းချုပ်တွင်လည်း ထုတ်လွှင့်ခဲ့သည်။

တပ်မတော်သားများ အပါအ၀င် နိုင်ငံ့ဝန်ထမ်းများ အသက်ခြောက်ဆယ် ပြည့်လျှင် အငြိမ်းစားယူသည့် စနစ်ကို ဆက်လက်ထားရှိရန် ၂၀၁၅ ခုနှစ် ဇူလိုင် ၈ ရက်က ပြုလုပ်သည့် ပြည်ထောင်စုလွှတ်တေ်ာ အစည်းအဝေးတွင် လွိုင်ကော်မဲဆန္ဒနယ်မှ လွှတ်တော်ကိုယ်စားလှယ် ဦးခင်မောင်ညိုက အရေးကြီးအဆို အဖြစ် တင်သွင်းခဲ့သေးသည်။ သို့သော် အောင်မြင်မှု မရခဲ့ပေ။ လက်ရှိ တာဝန် ထမ်းဆောင်နေသည့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်မှာ ၂၀၁၆ ခုနစ်တွင် အသက် ၆၀ ပြည့်မည် ဖြစ်သည်။

“အခုလို လုပ်တာ အခြေခံဥပဒေပါ ပြဋ္ဌာန်းချက်နဲ့ အညီပါပဲ” ဟု နိုင်ငံတော်သမ္မတရုံးမှ ညွှန်ကြားရေးမှူး ဦးဇော်ဌေးက ပြောသည်။

အခြေခံ ဥပဒေပုဒ်မ ၂၉၁ တွင် နိုင်ငံ့ဝန်ထမ်းဖြစ်သည့် တပ်မတော်သားများ၏ လုပ်ငန်းသဘာဝသည် ထူးခြားမှုရှိသည့် အလျောက် တပ်မတော်သားများအတွက် တပ်မတော်ဆိုင်ရာ ဥပဒေများနှင့်အညီ ဆောင်ရွက်ရမည်ဟု ပါရှိသည်။

သတင်း - ဇော်မင်းထွန်း
The Ladies News
https://www.facebook.com/News.TheLadies