ဘိန်းစိုက်တောင်သူတွေကြားက ကွယ်ဝှက်နေတဲ့ ပြဿနာနဲ့ အစိုးရသစ်ဆီက မျှော်လင့်ချက်

နိုဝင်ဘာလရဲ့ နောက်ဆုံးပတ်ရောက်ပြီမို့ ဆောင်းရဲ့အငွေ့သက်လေးတွေဟာ ကယားပြည်နယ်နဲ့ ရှမ်းပြည်နယ်စပ် မှာတည်ရှိနေတဲ့ ပီကင်းတောမြို့လေးကို လွှမ်းခြုံထားပါတယ်။

ပီကင်းမြို့ရဲ့အရှေ့ဖက် ကယန်းလို လဲစွတ်(အနီရောင်)တောင်တန်းကြီးတွေရဲ့အောက်မှာ အရောင်တွေစုံလင်လှတဲ့ ပန်းခင်းကြီးတွေဟာ မျက်စိတဆုံး ရှိနေကြပါတယ်။့ မမြင်တွေ့ဖူးတဲ့ သူတွေအနေနဲ့ရုတ်တရက်ကြည့်လိုက်မိရင်တော့ အလွန်လှပတဲ့ ပန်းခင်းလေးတွေလို့မှတ်ချက်ပေးကြမှာပါပဲ။ ဒါပေမယ့် တကယ်တမ်းမှာတော့ ဒါက ပန်းခင်းတွေမဟုတ်ပဲ ငရဲပန်းကြီးများလို့ တင်စားခေါ်ဝေါ်ကြတဲ့ ဘိန်းခင်းတွေသာဖြစ်ပါတယ်။

အေးချမ်းလှတဲ့ ဆောင်းမနက်ခင်း တစ်ခုမှာ ဒေါ်ဘဲလှ တစ်ယောက် ခေါင်းပေါင်းထူထူလေးတစ်ခုကိုပေါင်းရင်း ကျိုးတို့ကျဲတဲ အရောင်တွေစုံတဲ့ ဘိန်းပန်းတွေရဲ့အကြားမှာ စိမ်းမြမြ ဘိန်းသီးတွေကို သူတို့ကိုယ်တိုင် တီထွင် ပြုလုပ်ထားတဲ့ ဘိန်းခြစ် သည့်တုတ်ချောင်းလေးကို ကိုင်ရင်း၊ ဘိန်းများကိုခြစ်ရင်းနဲ့ အလုပ်ရှုပ်နေခဲ့ပါတယ်။

ကယန်းလို လဲစွတ်(အနီရောင်)တောင်တန်းတွေရဲ့ အပေါ်အောက်တွေမှာ ဘိန်းခင်းတွေဟာ မျက်စိတစ်ဆုံး ရှိနေကြပြီး ဒီလိုတောင်တန်းကြီးရဲ့ ကုန်းစောင်းတစ်ခုမှာ ဒေါ်ဘဲလှရဲ့ တနိုင်တပိုင် စိုက်ပျိုးထားတဲ့ ဘိန်းခင်းတစ်ခုရှိနေတာပါ။ နိုဝင်ဘာလ ထဲမှာ ဘိန်းခြစ်တဲ့ အချိန်ရောက်ပြီမို့ ဒေါ်ဘဲလှက သူ့ရဲ့ ဘိန်းခင်းလေးထဲက ဘိန်းတွေကိုစောစောထပြီး ခြစ်ယူနေတာပဲဖြစ်ပါတယ်။

သြဂုတ်လလောက်မှာ ဒီလိုတောင်တန်းကြီးတွေရဲ့ အပေါ်အောက်တွေမှာ ဘိန်းတွေကိုစတင် စိုက်ပျိုးကြတာဖြစ်ပြီး သုံးလလောက်ကြာရင်တော့ အသီးသီးလာတဲ့ ဘိန်းသီးတွေပေါ်က ဘိန်းစီးတွေကို ခြစ်ယူကြရတာဖြစ်လို့ အခုလိုကာလမျိုးဟာ ဘိန်းခြစ်တဲ့ရာသီဖြစ်တာကြောင့် ဒေါ်ဘဲလှက သူဘိန်းခင်း ထဲကဘိန်းတွေကို ခြစ်ယူနေတာပါ။

ဒေါ်ဘဲလှ ဟာကလေး(၁၁)ယောက်မိခင်တစ်ဦးဖြစ်ပြီး သူတို့မိသားစုရဲ့ စားဝတ်နေရေးပြေလည်စေဖို့ အတွက် ဘိန်းစိုက်ပျိုးရေးကို လုပ်ကိုင်လာတာဟာ (၁၀)နှစ်နီးပါးရှိနေပြီဖြစ်ပါတယ်။ သူမရဲ့ ခင်ပွန်းကတော့ လွန်ခဲ့တဲ့ တစ်လလောက်က အသည်းရောင်ရောဂါ တစ်ခုနဲ့ ကွယ်လွန်သွားခဲ့တာပါ။

ခင်ပွန်းသည် မကွယ်လွန်မီ ဆေးကုသဖို့အတွက် ကျေးရွာရဲ့ ဆေးပေးခန်းတွေမှာ ဆရာဝန် တွေမရှိတာကြောင့် မြို့ပေါ်သို့ သွားရောက် ဆေးကုသရတဲ့ ကုန်ကျစရိတ်တွေဟာလည်း အလွန်များပြားခဲ့ပြီး ဒီနှစ်မှာတော့ ဒေါ်ဘဲလှတစ်ယောက် သိန်း(၃၀)လောက် အကြွေးတင်သွားခဲ့ပါတယ်။

ဒီဒေသမှာတော့ ဘိန်းစိမ်း တစ်ပိသာကို ပေါက်ဈေး (ယခင်ကဆို) ခုနှစ်သိန်းခန့်ရှိခဲ့ပေမယ့် ပြီးခဲ့တဲ့နှစ်ကစလို့ ဘိန်းတစ်ပိသာကို လေးသိန်းဝန်းကျင်ခန့်သာရှိတော့ပါတယ်။

ဘိန်းဈေးအတက်အကျကတော့ ပွဲစားတွေရဲ့ လက်ထဲမှာပဲရှိနေပြီး ဘိန်းအရည်အသွေးပေါ် မူတည်နေတာမဟုတ်ပဲ လိုအပ်ချက်အပေါ်မူတည်ပြီး ဈေးမြင့်၊ ဈေးကျသွားတာမျိုးပါ။ ဒီနှစ်မှာတော့ ဒေါ်ဘဲလှက သူ့ရဲ့တနိုင်တပိုင်စိုက်ပျိုး ထားတဲ့ ဘိန်းခင်းထဲက ဘိန်းစိမ်း သုံးပိသာ၊ လေးပိသာလောက်ရဖို့ မျှော်မှန်းထားပြီး မိသားစုစားဝတ်နေရေး ဖြေရှင်းရမှာထက် တင်နေတဲ့ အကြွေးတွေကို အမြန်ပြန်ဆပ်နိုင်ဖို့သာ ကြိုးစားနေရပါတယ်။

“ကျွန်မတို့ တခြားသီးနှံစိုက်ရင် မိသားစုစားဝတ်နေရေးအတွက် မလုံလောက်ဘူး။ ဘိန်းစိုက်တာတောင်မှ အကြွေးတွေကို ဘယ်လိုဆပ်နိုင်မလဲ ဆိုတာပဲ စဉ်းစားနေရတာ။သူများတွေက အထင်ကြီးလွန်းနေတယ် ဘိန်းစိုက်တာကို ” လို့ ဒေါ်ဘဲလှ မနက်စောစောထခြစ်ထားတဲ့ ဘိန်းဆီခဲတွေကို ဝါးခွက်ထဲ ထည့်ရင်း ပြောပြနေပါတယ်။

ပီကင်းမြို့လေးဟာ ရှမ်းပြည်တောင်ပိုင်း ဖယ်ခုံမြို့နယ်ထဲမှာ ရှိပြီး မိုးဗြဲမြို့ကနေ (၁၈)မိုင်လောက် သွားရင် ရောက်နိုင်ပါတယ်။ ဒီတောမြို့လေးအနီးတစ်ဝိုက်မှာနေထိုင်ကြတဲ့ ဒေသခံအများစုကတော့ နှစ်ပေါင်းများစွာ ကတည်းက ဘိန်းစိုက်ပျိုးရေးကို လုပ်ကိုင်လာကြသူတွေပါ။

ဒီဒေသလေးဟာ လမ်းပန်းဆက်သွယ်ရေး ၊ကျန်းမာရေး ၊ပညာရေး စတဲ့ကဏ္ဍ တွေမှာ ပြည့်စုံမှုမရှိသလို လမ်းပန်းဆက်သွယ်ရေး မကောင်းတဲ့အချက်ကလည်း အဓိက ပြသနာဖြစ်နေတာကြောင့် စားဝတ်နေရေးအတွက်၊ စီးပွားရေး လုပ်ကိုင်ဖို့အတွက်လည်း ရွေးချယ်စရာတွေ မဲ့နေတာဖြစ်ပါတယ်။

အခုလိုဆောင်းရာသီမျိုးမှာ နှင်းခါးတွေကျတတ်သလို နှင်းခါကျတဲ့အချိန်တွေမှာဆိုရင် အခြားသီးနှံစိုက်ပျိုးမှုတွေအတွက် အဆင်မပြေဖြစ်တတ်ပါတယ်။ တကယ်လို့ အောင်မြင်အောင် စိုက်နိုင်ခဲ့တယ်ဆိုရင်လည်း ရောင်းချဖို့ ဈေးကွက်မရှိတဲ့ အနေအထားဖြစ်နေတာကြောင့် ဒေသခံအများစု အခြားသီးနှံတွေ စိုက်ဖို့ မစဉ်းစားကြသလောက်ပါပဲ။

“စပါးစိုက်စိုက် ပြောင်းစိုက်စိုက် သွားရောင်းဖို့က မြို့ထိအဝေးကြီးသွားရမယ် လမ်းစရိတ်နဲ့ တင်ဘာမှ လုပ်လို့မရတော့ဘူး အဲ့ဒါကြောင့် ဒါမစိုက်ရင် ငတ်ကုန်မှာ ”လို့ ဒေါ်ဘဲလှရဲ့ ဘိန်းခင်းမှာ နေ့စားဝင်လုပ်နေတဲ့ ဦးကျော်လှက ပြောပါတယ်။

နေ့စားအလုပ် လုပ်နေရတယ်ဆိုပေမယ့် ဦးကျော်လှက ဘိန်းစိုက်ပျိုးမှုကို အကြိမ်ကြိမ်ကြိုးစားခဲ့တဲ့သူပါ။ ဒါပေမယ့် သူစိုက်ပျိုးတဲ့ ဘိန်းခင်းတွေ မအောင်မြင်တဲ့နောက် နေ့စားဘ၀ကို ရွေးချယ်လိုက်ရပါတယ်။ ဘိန်းစိုက်ပျိုးတဲ့ တောင်သူတွေအနေနဲ့ကတော့ စိုက်ပျိုးတိုင်း အောင်မြင်တာမဟုတ်ဘဲ ဘိန်းစိုက်ခင်းမကောင်းတဲ့ နှစ်ရောက်ပြီဆို အကြွေးတွေ တင်ကြပြီး အကြွေးသံသရာ လည်ကြရတော့တာပါပဲ။

ဘိန်းစိုက်ပျိုးဖို့အတွက် တစ်ဧကကို ပျမ်းမျှအားဖြင့် အရင်းအနှီး(၁၀)သိန်းလောက်ကုန်ပြီး မြေသြဇာခ ၊လုပ်အားခ ကုန်ကျစရိတ်တွေလည်းများပါတယ်။ မိုးရွာသွန်းတဲ့ အချိန်တွေဆိုရင်တော့ ဘိန်းခင်းတွေ ပျက်စီး တတ်ပြီး စိုက်ပျိုးတဲ့နေရာမှာတော့ စက်ယန္တယားကြီးတွေနဲ့ စိုက်ပျိုးတာမဟုတ်ဘဲ လူနဲ့သာ စိုက်ပျိုးကြတာဖြစ်ပါတယ်။

ဒေသခံတွေအနေနဲ့ ဘိန်းစိုက်ပျိုးရေးကို လုပ်ကိုင်နေကြပေမယ့် ဘိန်းစိုက်ပျိုးခြင်းကနေရရှိလာတဲ့ အကျိုးအမြတ်တွေကိုတော့ ပွဲစားတွေကပဲ သိမ်းကြုံးရရှိသွားကြပါတယ်။ ဘိန်းလာရောက်ဝယ်ယူကြတဲ့ ပွဲစားတွေက ရွာအထိလာရောက်ဝယ်ယူကြပြီး ဘိန်းစိုက်တောင်သူများ ဘိန်းစိုက်ပျိုးနိုင်ရန်အတွက် ရင်းနှီးငွေတွေကိုလည်း ထုတ်ချေးပေးလေ့ရှိပါတယ်။ တောင်သူတွေအနေနဲ့ ဘိန်းခြစ်တဲ့အချိန်မှာ ရလာတဲ့ ဘိန်းတွေကို ချေးငွေအနေနဲ့ ပြန်လည်ပေးဆပ်ရတာဖြစ်ပြီး ဘိန်းစိုက်ပျိုးမှု မအောင်မြင်တဲ့ နှစ်တွေမှာတော့ သိန်းရာနှင့်ချီလို့ အကြွေးတင်နေကြရပါတယ်။

ဘိန်းစိုက်တောင်သူတွေအနေနဲ့ ဒေသတွင်းမှာရှိတဲ့ အာဏာပိုင်အဖွဲ့စည်းများဖြစ်တဲ့ ရဲတပ်ဖွဲ့၊မြန်မာအစိုးရစစ်တပ် ၊ကယန်းပြည်သစ်တပ်မတော် နှင့် ပြည်သူ့စစ်တပ်ဖွဲ့တွေဆီကိုလည်း နှစ်စဉ် အခွန်ငွေဆောင်ကြရပြီး စိုက်ပျိုးတဲ့ ပမာဏ အနည်းအများပေါ် မူတည်ပြီး ပေးဆောင်ရတဲ့ အခွန်ပမာဏကလည်း ကွာခြားသွားပါတယ်။

ကယန်းပြည်သစ်ပါတီ အနေနဲ့ကတော့ ပီကင်းကျေးရွာအုပ်စုအတွင်းမှာရှိတဲ့ ကျေးရွာများရဲ့ ဒေသဖွံ့ဖြိုးရေး ဆောင်ရွက်နိုင်ဖို့အတွက် အလှူငွေသဘောမျိုး အခွန်ငွေ ကောက်ခံလေ့ရှိပါတယ်။ ဘိန်းစိုက်ပျိုးတဲ့ အိမ်တိုင်းကို တစ်အိမ်ကို တစ်နှစ်စာ ခြောက်သောင်း ခုနှစ်သောင်းခန့်ကောက်ခံတယ် လို့ ကယန်းပြည်သစ်ပါတီ ပီကင်းဆက်ဆံရေးရုံးတာဝန်ခံ ဗိုလ်လွီး ကပြောပါတယ်။

“နင်တို့မစိုက်ကြတော့နဲ့ လျော့ပါလျော့ပါ လို့လည်းပြောထားတယ် ။စားဝတ်နေရေးအတွက်က ဒါပဲရှိတယ်လေ ။အလှူငွေသဘောမျိုးနဲ့ ကျွန်တော်တို့အခွန်ကောက်တာပါ ရတဲ့အခွန်ကို ဒေသဖွံ့ဖြိုးရေးအတွက် ပြန်သုံးတယ် ”လို့ပြောပါတယ်။

အစိုးရအဖွဲ့စည်းတွေဖြစ်တဲ့ ရဲတပ်ဖွဲ့ ၊စစ်တပ်စတဲ့ အဖွဲ့တွေရဲ့အခွန်ကောက်ခံမှုများကိုတော့ မေးမြန်းလို့ မရခဲ့ပေမယ့် အရင်နှစ်တွေတုန်းကလို ဘိန်းခင်းတွေကို လာရောက်ဖျက်ဆီးတာမျိုး မလုပ်တော့တာ နှစ်နှစ်လောက်ရှိပြီလို့ ကယန်းပြည်သစ်ပါတီက ပြောပါတယ်။

ဘိန်းစိုက်တောင်သူတွေအတွက် ဘိန်းစိုက်ပျိုးမှု့လျော့ကျစေဖို့ရည်ရွယ်ပြီး အစိုးရကနေ ၂၀၁၅ ခုနှစ်အတွက် အစားထိုး သီးနှံအဖြစ်နဲ့ စပါး နဲ့ နေကြာ မျိုးစေ့တွေ ဖြန့်ဝေပြီး စမ်းသပ်စိုက်ပျိုးစေခဲ့ပါတယ်။ စပါးမျိုးစေ့က အထွက်နှုန်းကောင်းခဲ့ပြီး စိုက်ပျိုးလို့ အဆင်ပြေခဲ့ပေမယ့်လည်း ရောင်းချဖို့ ဈေးကွက်မရှိတာကြောင့် ဘိန်းစိုက်ပျိုးမှု ဖက်ကိုသာ ပြန်လှည့်ခဲ့ရတယ်လို့ ဘိန်းစိုက်တောင်သူတွေက ဆိုပါတယ်။

ဦးဆီမိုးနယ် ဟာလည်း အိမ်ထောင်ကျပြီးကတည်းက သားသမီးလေးယောက် ထွန်းကားခဲ့ပြီး စားဝတ်နေရေး ပြေလည်စေဖို့အတွက် အနီရောင် တောင်တန်းကြီးတွေရဲ့အောက်မှာ ဘိန်းစိုက်နေတာ ဆယ်နှစ်ကျော်ပါပြီ။တစ်နှစ် ကို ဘိန်းနှစ်ပိသာ သုံးပိသာ သာရတဲ့အတွက် အလုပ်သမားလည်းမငှားနိုင်သလို လင်မယား နှစ်ယောက် ကိုယ်တိုင်စိုက်ပျိုး လုပ်ကိုင်နေကြရတာပါ။

“စားဝတ်နေရေးအတွက် ဒါစိုက်မှဖြစ်မယ်လေ။ ဒါမစိုက်ရင် အကုန်ခိုးပြီး လုယက်တာတွ ဖြစ်လိမ့်မယ်။ ဘိန်းက လူကိုပြုန်းတီးစေတယ်ဆိုတာ ကျွန်တော်တို့သိပါတယ်။ ဒီမှာက ဘိန်းကလွှဲရင်ဘာမှ စိုက်ဖို့မရှိဘူးလေ။ အခြားသီးနှံစိုက်ဖို့ကလည်း ဈေးကွက် မရှိတော့ရှုံးမှာပေါ့ အကြွေးတွေထူ ကုန်မှာပေါ့”လို့ပြောပြပါတယ်။

စားဝတ်နေရေးအတွက် ပြေလည်စေရန် မဖြစ်မနေဘိန်းစိုက်ပျိုးနေရတာဖြစ်ပေမယ့် ဦးဆီမိုးနယ်ကတော့ ဘိန်းစိုက်ပျိုးရတာကို မပျော်မွေ့တော့ပါဘူး။

ရွေးကောက်ပွဲအတွင်းမှာလည်း မိမိတို့စားဝတ်နေရေးအတွက် ကောင်းမွန်သည့် လမ်းကနေလုပ်ကိုင်စားသောက်နိုင်ဖို့ အခွင့်လမ်းတွေဖန်တီးပေးနိုင်မယ် ဆိုတဲ့မျှော်လင့်ချက်နဲ့ NLD ပါတီကိုမဲပေးခဲ့သလို တတ်လာမယ့် အစိုးရသစ် အနေနဲ့ ဘိန်းစိုက်ပျိုးမှုကို စွန့်လွှတ်ပြီး ကောင်းမွန်တဲ့ စားဝတ်နေရေးအတွက် ဖြေရှင်းနိုင်မည့် နည်းလမ်းတွေကို ရှာဖွေ ပေးနိုင်လိမ့်မယ်လို့ မျှော်လင့်နေတာပါ။

“လူတွေကို ဒုက္ခပေးနေတဲ့ ဒီအပင်တွေကို ကျွန်တော်လုံးဝမစိုက်ချင်ပါဘူး။ ကျွန်တော်တို့တက်လာမယ့် အစိုးသစ်ကို မျှော်လင့်ပါတယ်။ အစားထိုးသီးနှံတွေနဲ့ ရောင်းလို့ရမယ့် အဝယ်ဒိုင်တွေ ဈေးကွက်တွေ ရှာဖွေပေးဖို့ လုပ်ပေးစေချင်တယ်။ လမ်းပမ်းဆက်သွယ်ရေး၊ လျှပ်စစ်မီး၊ ပညာရေး ကောင်းအောင် လုပ်ပေးနိုင်ရင် ကျွန်တော့် မိသားစုစားဝတ်နေရေးဖူလုံရင် ဘိန်းလုံးဝမစိုက်ဖို့ အာမခံရဲပါတယ် စိုက်လည်းမစိုက်ချင်တော့ဘူး”လို့ ဦးဆီမိုးနယ်က သူ့ရဲ့လိုလားချက် ခံစားချက်တွေကို မျှော်လင့်ချက်ကြီးကြီးနဲ့ ပြောပြပါတယ်။

လူတွေရဲ့ အမြင်မှာတော့ အခုလိုဘိန်းစိုက်တောင်သူတွေ ဘိန်းစိုက်ပျိုးတာဟာ ချမ်းသာနိုင်တယ်လို့ ထင်ကြပေမယ့် လက်တွေ့ဘဝမှာတော့လမ်းပမ်းဆက်သွယ်ရေး ၊ပညာရေး၊လူမှုရေး၊ကျန်းမာရေး စတဲ့အခက်ခဲများစွာရဲ့ကြားမှာ ရုန်းကန်နေကြရတာပါ။

ဘိန်းစိုက်ပျိုးမှု ပပျောက်ဖို့ အတွက် တက်လာမယ့် အစိုးသစ်လက်ထက်မှာ ဘိန်းအစားထိုးသီးနှံတွေစိုက်ဖို့ ပညာရှင်တွေနဲ့ စနစ်တကျသင်တန်းပေး ခြင်း ၊စိုက်ပျိုးရေး နည်းပညာများ ဖော်ဆောင်ပေးခြင်း၊ အစားထိုးသီးနှံများရောင်းချနိုင်ရန်ဖို့ ဈေးကွက်များ ၊သီးနှံအဝယ်ဒိုင်များ ပေါ်ပေါက်အောင်လုပ်ဆောင် ပေးဖို့လိုအပ်တယ်လို့ လူငယ်အဖွဲ့စည်းတွေက ထောက်ပြထားပါတယ်။

ကမ္ဘာ့ကုလသမဂ္ဂမူးယစ်ဆေးဝါးနှင့် ရာဇဝတ်မှုတိုက်ဖျက်ရေး (UNODC)ကထုတ်ပြန်ထားတဲ့ ၂၀၁၅ ခုနှစ်ကမ္ဘာ့မူးယစ်ဆေးဝါး အစီရင်ခံစာအရ မြန်မာနိုင်ငံမှာ ဘိန်းစိုက်ပျိုးမှုဧရိယာ ခန့်မှန်း ဟက်တာပေါင်း ၅၇٫၆၀၀(၁၄၂٫၃၃၂ ဒသမ ၇ဧက)ထိရှိပြီး မြန်မာနိုင်ငံနဲ့ လာအိုနိုင်ငံက မူးယစ်ဆေးဝါးနဲ့ ဘိန်းဖြူထုတ်လုပ်ရာ အဓိကဗဟိုဖြစ် လာတယ်လို့ဖော်ပြထားပါတယ်။

ရှမ်းပြည်တောင်ပိုင်း မိုးဗြဲမြို့လေးကနေ (၁၈)မိုင်ဝေးတဲ့ ပီကင်းဆိုတဲ့ တောမြို့လေးမှာနေသူတွေကတော့ ဒီထုတ်ပြန်ချက်တွေကို ဘယ်တုန်းကမှ မသိခဲ့ကြပါဘူး။

မညီမညာနဲ့ အရောင်တွေစုံလင်လှတဲ့ လမ်းကြမ်းကလေးတွေ ၊ကျောက်ခင်းလမ်း ၊မြေနီလမ်း စတဲ့ လမ်းကြမ်းတွေ ကြားမှာ သူတို့ရဲ့အသက်ရှင်သန်မှုအတွက် ဘိန်းစိုက်ပျိုးမှုတွေကို ဆက်လက်လုပ်ဆောင်နေကြတုန်းပါပဲ။

ဘိန်းစိုက်တာက မကောင်းဘူးလို့ ခံစားသိရှိနေကြပေမယ့်လည်း ဘိန်းခင်းထဲမှာ ဆက်လက်ရှင်သန်နေကြတုန်းပါပဲ။ သူတို့စိတ်ထဲမှာတော့ အစိုးရသစ်ဆီက ရလာမယ့် အနာဂတ်၊ ဘိန်းအစားထိုး သီးနှံတွေ၊ ပိုက်ဆံတွေနဲ့ လူမှုဘ၀တွေ ရှိနေကြလေရဲ့။

Written by ဆန်းဖြိုးထွန်း
Kantarawaddy Times
http://www.ktimes.org