ကလေးခိုးမှုသတင်းများ အသေးစိတ်လေ့လာစုံစမ်းထုတ်ပြန်မည်ဟုဆို

မူဆယ်၊ နမ့်ခမ်းမြို့များတွင် ကလေးကစားစရာများ မကောက်မိရန် စာများ ကပ်၍ လက်ကမ်းစာများ ဖြန့်ဝေနေကြောင်း သိရှိရသည်။ လာရှိုးလူငယ်များ ပရဟိတအဖွဲ့က လုပ်ဆောင်နေကြောင်း အဆိုပါကိစ္စနှင့် ပတ်သက်၍ အမြန်ဆုံး အတည်ပြုပေးရန် နေပြည်တော် လူကုန်ကူးမှု တားဆီးကာကွယ်ရေးအဖွဲ့မှ ဒုရဲမှူးကြီး သက်နောင်က သက်ဆိုင်ဂျာနယ်မြေရှိ လူကုန်ကူးအဖွဲ့တို့ထံ ညွှန်ကြားထားကြောင်း သိရသည်။

“ကလေးခိုးမှုဖြစ်စဉ်နဲ့ ပတ်သက်ပြီး သံသယဖြစ်ဖွယ် ၂ ခုပဲတွေ့ရပါတယ်။ လက်ရှိဖြစ်ပေါ်နေမှုအနေအထားအရ ကလေးပျောက်တာ မရှိသေးပါဘူး။ လူပျောက်တယ်ဆိုတာကတော့ သက်ဆိုင်ရာနယ်မြေရဲစခန်းတွေက ဆောင်ရွက်နေပါတယ်။ သူတို့နဲ့ သက်ဆိုင်ပါတယ်။ လောလောဆယ် ကျွန်တော်တို့လိုက်ရှင်းနေရတာက ပျောက်တာမဟုတ်ဘဲ ကလေးခိုးတဲ့ ကိစ္စဟုတ်မဟုတ် ကိစ္စလိုင်ရှင်းနေရတာဖြစ်ပါတယ်”ဟု ပြောကြားသည်။
ကလေးခိုးမှုဖြစ်စဉ် ရှိ မရှိနှင့်ပတ်သက်၍ “ဖြစ်စဉ်ဆိုတဲ့ နေရာမှာ ပြီးခဲ့တဲ့ ၂ လ၊ ၃လက စပြီး အင်တာနက် စာမျက်နှာတွေအပေါ် တက်လာတာ ၂ မှု၊ ၃မှုလောက်ရှိတယ်။ သာမန်လောက်ဖွတယ်လို့ ထင်တာပေါ့။ နောက်ပိုင်း တနေ့တည်းမှာပဲ နိုင်ငံအတွင်း နေရာစုံက တက်လာတယ်။ ဧရာဝတီတိုင်းတခုလုံးလိုလို ဖြစ်နေသလိုလို ကောလာဟလတွေ ပြန့်လာပါတယ်။ ဒါတွေကို ကြည့်ပြီး တာဝန်ရှိသူတွေက ပြန်လည်ဆန်းစစ်လိုက်တဲ့အခါမှာ ဒါဟာ သဘောရိုးမဟုတ်တော့ဘူး။ ရည်ရွယ်ချက်တခုနဲ့ ဆောင်ရွက်နေတယ်လို့ သုံးသပ်ရတယ်”ဟု ၄င်းက ပြောသည်။

“ဖြစ်စဉ်တွေ အားလုံး လေ့လာစုဆည်းလိုက်တဲ့အခါမှာ ယနေအထိ သံသယဖြစ်နိုင်ခြေရှိတဲ့ ကလေးခိုးမှုလို့ ပြောနိုင်တဲ့ အမှု ၂ မှုပဲ တွေ့ရပါတယ်။ တမှုက ဖျာပုံမှာ ဥာဏ်ရည်မမီတဲ့ ကရင်မလေး ၆ နှစ်သမီးကို အမျိုးသမီးတယောက်က ခေါ်သွားတာ။ လိုက်ရှာတော့ ပြန်တွေ့တယ်။ အဲဒီဖြစ်စဉ်မှာ ကလေး ၇ ယောက်ကို ခိုးတဲ့ သူမိပြီဆိုပြီး တသင်းဖြန့်တယ်။ ဖျာပုံမှာ ဥာဏ်ရည်မမီတဲ့ ကလေးမပျောက်ခင်မှာ ဘုရားပွဲဈေးမှာ တယ်လီဖုန်းတွေလိုက်ခိုးတယ်။ ပိုက်ဆံအိတ်တွေ လိုက်နှိုက်တယ်ဆိုပြီး လင်မယား ၂ နှစ်ယောက်ကို ဖမ်းထားတဲ့ ဖြစ်စဉ်တခုရှိပါတယ်။ အဲဒီလင်မယား ၂ ယောက်မှာ ကလေး ၆ ယောက်ပါလာတယ်။ သူတို့နှစ်ယောက်ကို စစ်ဆေးနေစဉ် ကာလမှာ ကလေး ၆ ယောက်ကို ရဲစခန်းက ကျွေးမွေးစောင့်ရှောက်ထားရပါတယ်”

“အဲဒီအချိန်မှာ ကလေးတယောက်ပျောက်တဲ့ ဖြစ်စဉ်က ပေါ်လာတယ်။ အဲဒီကိစ္စကိုလည်း စခန်းကို ခေါ်အမှုဖွင့်တယ်။ ဒီအခါမှာ ပထမကလေး ၆ ယောက်နောက်ရောက်လာတဲ့ ကလေး ၁ ယောက်ဆိုတော့ ကလေး ၇ ယောက်ဖြစ်လာပါတယ်။ အဲဒါကို ကလေး ၇ ယောက်ခိုးတဲ့ တရားခံမိပြီဆိုတဲ့ သတင်းကို ဖွတော့ တာပါပဲ။”

“ဒီဖြစ်စဉ်မှာ ကလေးခိုးတယ်လို့ စွပ်စွဲခံရတဲ့ အမျိုးသမီးရဲ့ တုံ့ပြန်ချက်က သူအလုပ်သွားမယ်လို့ ထွက်လာချိန်မှာ ကလေးတဦးလမ်းဖြတ်ကူးဖို့ လုပ်နေတာတွေ တွေ့ရတယ်။ ကလေးက ဥာဏ်ရည်မမီဘူး။ ကလေးရဲ့ အဖေက ဆိုက်ကားသွားနင်းတယ်။ အမေက ဈေးရောင်းသွားတယ်။ ကလေးက အိမ်မှာ အဒေါ်နဲ့ ကျန်ခဲ့တယ်။ အဒေါ်ကလည်း လေဖြတ်ထားလို့ စကားမပြောနိုင်ဘူး။ ဒီအချိန်မှာ ကလေးပျောက်သွားတယ်။ ကလေးကို လမ်းဖြတ်ကူးဖို့အတွက် ကူညီပေးတယ်။ သူအလုပ်သူဆက်သွားတယ်။ ကလေးက နောက်ကလိုက်လာတယ်။ အလုပ်ခွင်ဖြစ်တဲ့ ဂ၀ံတင်သင်္ဘောမှာ ဂ၀ံတင်တယ်။ ကလေးက သူဘာသာကစားနေတယ်။ ဆိုပြီး ရဲစခန်းမှာ ထွက်ဆိုထားပါတယ်။ ဒီကိစ္စကို ကလေးခိုးတယ်။ မခိုးဘူး သံသယ ဖြစ်စရာကို သက်ဆိုင်ရာက စစ်ဆေးရင်းအဖြစ်မှန်ပေါ်လာမှာပါ”

“ဖြစ်သယောင်ယောင်အခြေအနေပေါ် မူတည်ပြီး ကောလဟာလ ဖြန့်တာပါ။ ဒါက တမှု နောက်တမှုက တောင်ကြီး ဖြစ်စဉ် တောင်ကြီးအမှုမှာလဲ ဖြစ်စဉ်က အမျိုးသားတယောက်က ပျံကျအလုပ်တွေ လုပ်တယ်။ လယ်တဲတခုမှာ နေတယ်။ အဲဒီအချိန်မှာ ကလေး ၃ ယောက် ငှက်ပစ်ဖို့်ဆိုပြီး ရောက်လာတယ်။ အတူတူငှက်ပစ်ကြတယ်။ ညမှောင်လို့ မပြန်ရဲဘူးဆိုတော့ သူက လိုက်ပို့တယ်။ ဒါက ပထမတရက်နောက်ရက်တွေမှာလဲ ငှက်တွေပစ်ကြတယ်။ အကြီးဆုံး ကလေးတယောက်က ကျောင်းတက်ရမယ်ဆိုပြီး ပြန်တယ် (၂) ယောက်က မပြန်ဘဲ ငှက်ပစ်ဖို့ ကျန်ခဲ့တယ်။ ဒီလိုနဲ့ ၃ ရက်လောက်ပျောက်နေတယ်။ ရွာကလည်း ကလေးပျောက်တယ်။ ခိုးခံရတယ်ဆိုပြီး အသံချဲ့စက်နဲ့အော်တယ်။ သူတို့က ရွာနဲ့အလှမ်းဝေးတော့ မကြားဘူး။ ဖြစ်စဉ်က ငှက်ပစ်ရင်း ရွာအနီးမှာ သစ်ရွက်သစ်သီးခူးစားငှက်ပစ်စားနေကြကြောင်း ဖမ်းမိတဲ့အချိန်မှာ ရဲစခန်းမှာယ ထွက်ဆိုတယ်။ ဖြစ်စဉ်ကတော့ သူတို့တွေဟာ အဝေးကို ထွက်မသွားဘူး။ ရွာနဲ့ မလှမ်းမကမ်းနေရာတွေမှာ ငှက်ပစ်ရင်း ပတ်သွားနေတာတွေ့ရတယ်။ သုံးသပ်ကြည့်ရင် တကယ်ကလေးခိုးတယ်ဆိုရင် ပျောက်နေတဲ့ ၃ ရက်လောက်အတွင်းမှာ အတော်ဝေးဝေးကို ရောက်နေလောက်ပါပြီ။ ဒီသုံးသပ်ချက်တော့ ကျွန်တော့်သုံးသပ်ချက်ပါ။ ဖြစ်စဉ်ကိုတော့ သက်ဆိုင်ရာ ရဲစခန်းက စစ်ဆေးနေပါတယ်”လို့ ဒုရဲမှူးကြီး သက်နောင်က News Watch သို့ ပြောကြားသည်။

ကလေးခိုးမှုဖြစ်စဉ်နှင့်ပတ်သက်၍ မိဘပြည်သူများ စိုးရိမ်သောကမှု မဖြစ်ပွားစေရန် သက်ဆိုင်ရာတာဝန်ရှိသူအဆင့်ဆင့်က သတင်းထုတ်ပြန်ပေးနိုင်ရန် စီစဉ်လျက်ရှိပါကြောင်း သိရှိသည်။

ထွန်း (နေပြည်တော်)
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal