UWSA နယ်မြေ ရွေးကောက်ပွဲ ကျင်းပနိုင်မည်မဟုတ်

 UWSA ၀ပြည် သွေးစည်း ညီိညွတ်ရေး အဖွဲ့ ထိန်းချုပ်ထားတဲ့ လူဦးရေ ၆ သိန်းရှိ နယ်မြေအတွင်း ၂၀၁၅ ရွေးကောက်ပွဲကို ကျင်းပနိုင်မှာ မဟုတ်ကြောင်း ၀ပြည်သွေးစည်း ညီညွတ်ရေးအဖွဲ့က RFA ကိုပြောပါတယ်။

 အထူးဒေသ၂၊ ၀ဒေသအတွင်း ရွေးကောက်ပွဲမကျင်းပနိုင်ဘူးဆိုတာဟာ ဒေသတွင်းနေထိုင်သူ အများစုအနေနဲ့  မှတ်ပုံတင်မရှိလို့ဖြစ်တယ်လို့ အစိုးရနဲ့ အပစ်အခတ်ရပ်စဲထားတဲ့ UWSA အဖွဲ့ရဲ့ ပြောရေးဆိုခွင့်ရှိသူ ဦးအောင်မြင့်က ပြောပါတယ်။

 "ကျနော်တို့နယ်မြေထဲမှာတော့ လုံးဝမရှိဘူး၊ အစိုးရလည်း ရွေးကောက်ပွဲလုပ်မှာ မဟုတ်ဘူး၊ ဒါပေမဲ့ အစိုးရနယ်ထဲမှာပေါ့နော် ဟိုပန်မြို့နယ် တို့မှာတော့ အစိုးရကလုပ်မယ်လို့ထင်တယ်၊ လူ ၆ သိန်းရှိတဲ့အထဲက ဒီမှာမှတ်ပုံတင်ရှိတာက နှစ်ထောင်ကျော်ကျော်လေးပဲ ရှိမယ်ထင်တယ်၊ နောက်မှတ်ပုံတင်ရှိတယ် အိမ်ထောင်စုစာရင်းမရှိဘူး"

 ၀ဒေသတွင်းမြို့နယ်ပေါင်း ၆ မြို့နယ် လူဦးရေ ၆ သိန်းကျော်မှာ  မှတ်ပုံတင်လက်ဝယ်ရှိသူ ထောင်ဂဏန်းသာရှိပြီး (လ၀က) က မှတ်ပုံတင်လာရောက်လုပ်ကိုင်ပေးဖို့ကိစ္စကို ဒေသတွင်း ငြိမ်းချမ်းမူမရှိတာကြောင့် မလာရောက်ဘူးလို့ဆိုပါတယ်။  ပြည်ထောင်စု ရွေးကောက်ပွဲကော်မရှင်ကလည်း ငြိမ်းချမ်းမှုမရှိတဲ့ ရှမ်းပြည်မြောက်ပိုင်း၊ ကချင်ပြည်နယ်တွေမှာ ရွေးကောက်ပွဲကျင်းပမှာ မဟုတ်ဘူးလို့ ဆိုထားပါတယ်။  ဒါပေမဲ့ နောက်ဆုံးရရှိတဲ့ သတင်းတွေအရ ရှမ်းပြည်မြောက်ပိုင်း ကိုးကန့်နယ်မှာ ရွေးကောက်ပွဲကျင်းပနိုင်တဲ့ အလားအလာရှိနေပါတယ်။

 ၂၀၁၀ ရွေးကောက်ပွဲတုန်းကလည်း ၀ဒေသအတွင်းမှာ ရွေးကောက်ပွဲမကျင်းပခဲ့ပဲ  ရွေးကောက်ပွဲမတိုင်ခင် ပါတီများဖွဲ့စည်းခြင်းနဲ့ ရွေးကောက်ပွဲ မဲဆွယ်ရေးကိစ္စများကို လုပ်ကိုင်ခွင့်ပေးမှာ မဟုတ်ကြောင်း UWSA က ကြေညာထားပါတယ်။ အဲဒီတုန်းက အထူးဒေသ (၂) မှာ တာဝန်ထမ်းဆောင်သူ အစိုးရ၀န်ထမ်းများဟာ မိမိတို့နေရပ်ကို ပြန်ပြီးမဲထည့်ခဲ့ကြရပါတယ်။ အစိုးရ၀န်ထမ်းများ ပြန်သွားကြပြီးနောက်ပိုင်း ဒေသတွင်းကို ပြန်လာသူမရှိသလောက်ပဲလို့လည်း သိရပါတယ်။

RFA Burmese
http://www.rfa.org/burmese