 |
| ဓာတ်ပုံ-ကိုသန်းဝင်းအောင်(နှလုံးလှ(အခမဲ့)လူမှုကူညီရေးအသင်း |
ရှမ်းပြည်နယ်အရှေ့ပိုင်း၊ ကျိုင်းတုံမြို့ရှိ နောင်တုံရေကန်အတွင်း ယခုလ၂၁ရက်နေ့က ငါးများ အစုလိုက်အပြုံ လိုက် သိန်းချီ သေဆုံးခဲ့ပြီး ယနေ့ ၂၂.၇.၂၀၁၅တွင်လည်း ထပ်မံသေဆုံး လျက်ရှိကြောင်း ငါးသေများအား လိုက်လံဆယ်ယူ ပေးနေသည့် ကျိုင်းတုံမြို့၊နှလုံးလှ(အခမဲ့)လူမှုကူညီရေးအသင်းမှ ကိုသန်းဝင်းအောင်က ဖုန်းဖြင့်ဆက် သွယ်ပြောကြားသည်။
“အခုနောင်တုံကန်ပတ်လည်က တည်းခိုခန်းတွေ၊ စားသောက်ဆိုင်တွေမှာ ဧည့်သည်တွေ မရှိသလောက်ပဲ။ ငါးပုပ်နဲ့က ခုနှစ်မိုင်၊ရှစ်မိုင်လောက်ထိ ပျံ့နေတယ်”ဟု ၎င်းကဆိုသည်။
 |
| ဓာတ်ပုံ-ကိုသန်းဝင်းအောင်(နှလုံးလှ(အခမဲ့)လူမှုကူညီရေးအသင်း |
ယမန်နေ့က ငါးသေများဆယ်ယူရာတွင် ဖောကားနှစ်စီးတိုက်ရကြောင်း၊ယနေ့တွင်လည်း ဆက်လက်ဆယ်ယူလျက်ရှိကြောင်း ၎င်းကပြောသည်။
ကျိုင်းတုံမြို့၏ကျက်သရေဆောင်ရေကန်ဖြစ်သော နောင်တုံရေကန်မှာ မြို့အလယ်တွင်ရှိပြီး ကန်ပတ်လည်ရှိ အသေးစားစက်မှုလုပ်ငန်းများမှ စွန့်ပစ်ရေဆိုးများကန်ထဲသို့ စီးဝင်မှု၊မြို့ခံများမှ အမှိုက်သရိုက်များပစ်ချမှုတို့ကြောင့် ရေထုညစ်ညမ်းကာ ယခုလိုသေဆုံးရခြင်းဖြစ်နိူင်ကြောင်းမြို့ခံများက ဝေဖန်သည်။
နောင်တုံကန်မြောက်ဘက်ခြမ်းရှိ မိမိ၏ ဧည့်စံအိမ်တွင် ငါးညှီပုပ်နံ့များကြောင့် လာရောက်တည်းခိုသူများပြောင်းရွှေ့သွားကြကြောင်း၊တာဝန်ရှိသူများလာရောက်စစ်ဆေးရာ ရေထုညစ်ညမ်းမှု ၆ရာခိုင်နှုန်းကျော်ရှိကြောင်း၊ငါးကောင်ရေ ခုနှစ်သိန်းကျော်ခန့် သေဆုံးသွားကြောင်း ကျိုင်းတုံလူမှုရေးအသင်းဥက္ကဌ ဦးစိုင်းဇော်မင်း၏ ဖေ့ဘွတ်စာမျက်နှာတွင်ရေးသားဖော်ပြထားသည်။
“စီးပွားရေးသမားကလည်း လုပ်ငန်းလုပ်ဖို့ပဲစိတ်ဝင်စားတယ်။တာဝန်ရှိသူတွေကလည်း အခွန်အခကောက်ဖို့ပဲ အားသန်တယ်။ကန်ကိုစောင့်ရှောက်မယ့်လူမရှိဘူးဖြစ်နေတယ်” ဟု ကိုသန်းဝင်းအောင်က ပြောသည်။
ရေထဲ၌ အောက်ဆီဂျင်နည်းပါးခြင်းနှင့် ရေထုညစ်ညမ်းခြင်းကြောင့် ယခုလိုငါးများအစုလိုက်အပြုံလိုက်သေဆုံးရခြင်းဖြစ်ပြီး ယခင်နှစ်များကလည်း ငါးများအစုံလိုက်အပြုံလိုက်သေဆုံးမှုများဖြစ်ခဲ့ဖူးကြောင်း ကျိုင်းတုံဒေသခံများထံမှ သိရှိရသည်။
သော်တာ
The Street View
https://www.facebook.com/pages/The-Street-View
ကျိုင်းတုံနောင်တုံကန် ငါးများသိန်းချီသေပြီး အပုတ်နံ့များ ခုနှစ်မိုင်အကွာထိပျံ့နှံ့လျက်ရှိ
Reviewed by THITHTOOLWIN
on
20:03
Rating:
Reviewed by THITHTOOLWIN
on
20:03
Rating:
