ရခိုင် အမ်းမြို့ရေဘေး ၆ ဦးသေ ဆုံး၊ နေအိမ် ၂၀၀ ကျော်ပျက်စီး

 ရခိုင်ပြည်နယ် စစ်တွေမြို့မှာ ဇွန်လ ၂၆ ရက်နေ့က ရေကြီးရေလျှံဖြစ်နေတာကို တွေ့ရစဉ် Photo: Min Thein Aung/RFA
ရခိုင်ပြည်နယ် အမ်းမြို့နယ်မှာ ပြီးခဲ့တဲ့အပတ်က မိုးအဆက်မပြတ်ရွာတာကြောင့် ကျေးရွာပေါင်း ၁၈ ရွာနဲ့ မြို့ပေါ် ရပ်ကွက် ၃ ခုက နေအိမ်အလုံးပေါင်း ၂၀၀ လောက် ပျက်စီးဆုံးရှုံးခဲ့ပြီး ကယ်ဆယ်ရေးလုပ်ငန်း ဆောင်ရွက်နေတဲ့ တပ်မတော်သား တစ်ဦးအပါအ၀င် ရေနစ်မြုပ်မှုကြောင့် လူ ၆ ဦးအထိ သေဆုံးခဲ့ရတယ်လို့ ဒေသခံတွေက ပြော ပါတယ်။

အမ်းမြို့နယ်က ဒေသခံ ၇၀၀ လောက်က နီးစပ်ရာ အဆောက်အဦးတွေမှာ ယာယီခိုလှုံနေကြတယ်လို့ အမ်းမြို့နယ် ဘက်စုံဖွံ့ဖြိုးတိုးတက်ရေး အထောက်အကူပြု အဖွဲ့ အတွင်းရေးမှူး ဦးစိုးသိန်းက ပြောပါတယ်။

"ကျေးရွာ ၃၀ ကျော်လောက်မြုပ်သွားပါတယ်၊ ဒါပေမယ့် စာရင်းလိုက်ကောက်လိုက်တော့ အိမ်ပြိုသွားတဲ့ရွာ ၁၈ ရွာနဲ့ ရပ်ကွက် ၃ ခုရှိပါတယ်၊ ရွာ ၁၈ ရွာမှာ အိမ်က စုစုပေါင်း ၁၅၃ အိမ်ရှိပါတယ်၊ တိုင်ကနေကျွတ်ပြီးပါသွား တာပါ၊ တစ်ဝက်စီပြိုသွားတဲ့ အိမ်က ၄၀ ကျော်ရှိပါတယ်၊ နောက်ပြီးတော့ ဆိုင်ခန်းတွေ မှာ ရေဝင်ပြီးဆုံးရှုံး တာတွေက ဆိုင်ခန်းပေါင်း ၃၀ ကျော်ရှိပါတယ်၊ လတ်တလော မိသားစုတွေက နီးစပ်ရာအိမ်မှာ နေကြပါတယ်"

စခန်းမော်၊ လုံးရွာ၊ ပြောင်းခြောက်၊ တိုက်မော်၊ ပဲပဒုံ စတဲ့ ကျေးရွာတွေမှာ ပျက်စီးမှု အများဆုံးဖြစ်ပြီး ဒေသခံတွေ ကိုကူညီဖို့ အလှူရှင်တွေထံ အကူအညီတောင်း ထားတယ် လို့လည်း ဦးစိုးသိန်းက ပြောပါတယ်။

ရခိုင်ပြည်နယ်မှာ တစ်ပတ်ကြာ ရွာသွန်းခဲ့တဲ့မိုးကြောင့် ဇွန်လ ၂၆ ရက်နေ့မှာ အမ်းမြို့နယ်က တစ်ချို့ကျေးရွာတွေ မှာ ရေအမြင့်ပေ ၂၀ ကျော်အထိ မြင့်တက်သွားခဲ့ပါတယ်။

ရေကျသွားပြီဖြစ်ပေမယ့် ကျေးရွာအတော်များများမှာ စားနပ်ရိက္ခာနဲ့ သောက်သုံးရေ အခက်အခဲဖြစ်နေတယ် လို့လည်း အမ်းမြို့နယ်ဘက်စုံဖွံ့ဖြိုးတိုးတက်ရေး အထောက်အကူပြုအဖွဲ့ အတွင်းရေးမှူး ဦးစိုးသိန်းက ပြောပါတယ်။

RFA Burmese
http://www.rfa.org/burmese
ရခိုင် အမ်းမြို့ရေဘေး ၆ ဦးသေ ဆုံး၊ နေအိမ် ၂၀၀ ကျော်ပျက်စီး  ရခိုင် အမ်းမြို့ရေဘေး ၆ ဦးသေ ဆုံး၊ နေအိမ် ၂၀၀ ကျော်ပျက်စီး Reviewed by သစ်ထူးလွင် on 03:04 Rating: 5
Powered by Blogger.