အလုပ်ရှင်နဲ့ အလုပ်သမားကြား မကြာခဏ ဖြစ်ပေါ်နေတဲ့ လုပ်ခလစာတိုးမြင့်ရေး အငြင်းပွားမှု၊ ဆန္ဒပြမှုတွေ ပပျောက်ရေးအတွက် အနိမ့်ဆုံးလစာငွေ သတ်မှတ်ပေးရေး နည်းဥပဒေ အမြန်ဆုံး အကောင်အထည်ဖော်ဖို့ လိုအပ်ကြောင်း ပြည်သူ့လွှတ်တော် ဥက္ကဋ္ဌ သူရဦးရွှေမန်းက ဒီနေ့ ပြောပါတယ်။
ရန်ကုန်မြို့ လှိုင်သာယာမြို့နယ် ကနောင်ခန်းမမှာ ဒီနေ့ကျင်းပတဲ့ အလုပ်ရှင်၊ အလုပ်သမားတွေနဲ့ တွေ့ဆုံ ပွဲမှာ သူရဦးရွှေမန်း က ပြောခဲ့တာပါ။
"နည်းဥပဒေရှိပြီလား၊ လုပ်ထုံးလုပ်နည်းရှိပြီလား၊ အမိန့်ကြေညာစာရှိလား မရှိဘူးဆိုရင် ခုနကထုတ်ပြန်ချက်တွေကလည်း အလကားပဲ၊ လုပ်ခလစာ အနည်းဆုံးသတ်မှတ်ဖို့ ဥပဒေကပြီးပြီ၊ နည်းဥပဒေနဲ့ စည်းမျဉ်းတွေ စည်းကမ်းတွေ လုပ်ထုံးလုပ်နည်းတွေ မပေါ်တဲ့အတွက် ဒီနေ့ အဓိကပြဿနာဖြစ်နေတာ ဒီကိစ္စပဲ"
ဒီနေ့ ဆွေးနွေးပွဲကို တက်ရောက်လာတဲ့ ရန်ကုန်တိုင်းဒေသကြီး အလုပ်သမားညွှန်ကြားရေဦးစီးဋ္ဌာနက တာဝန်ရှိသူတွေက အနိမ့်ဆုံးလုပ်ခလစာ သတ်မှတ်ပြဋ္ဌာန်းနိုင်ရေးအတွက် လာမယ့် ၂၀၁၅-၂၀၁၆ ခုနှစ်မှာ မြို့နယ်အဆင့်အထိ စစ်တမ်းကောက်ယူသွားမယ်လို့ ပြောပါတယ်။
ပြည်သူ့လွှတ်တော်ဥက္ကဋ္ဌ သူရဦးရွှေမန်းက အလုပ်ရှင်၊ အလုပ်သမား ဥပဒေတွေကို ပြည်ထောင်စုလွှတ်တော်က ပြဋ္ဌာန်းပြီးဖြစ်တာကြောင့် အစိုးရတာဝန်ရှိသူအဆင့်ဆင့်က တာဝန်ခံမှု၊ တာဝန်ယူမူအပြည့်နဲ့ နည်းဥပဒေ၊ လုပ်ထုံးလုပ်နည်းဥပဒေတွေကို ရေးဆွဲဖို့လိုတယ်လို့ ပြောပါတယ်။
ပြီးခဲ့တဲ့ ၂၀၁၂ နဲ့ ၂၀၁၃ ခုနှစ်အတွင်း ပြည်ထောင်စု လွှတ်တော်က အလုပ်သမား၊ အလုပ်ရှင်နဲ့ ပတ်သက်တဲ့ ဥပဒေပေါင်း ၅ ခု ပြဋ္ဌာန်းပေးခဲ့တယ်လို့ သိရပါတယ်။
ဒီနေ့ပွဲမှာ တက်ရောက်လာတဲ့ အလုပ်ရှင်ကိုယ်စားလှယ်တွေက မြန်မာနိုင်ငံက လုပ်ငန်းရှင်အများစုဟာ အသေးစားစက်မှုလက်မူလုပ်ငန်းရှင် အဆင့်ပဲရှိတဲ့အတွက် အလုပ်သမားခန့်ထားရေး နဲ့အလုပ်သမားတွေ တောင်းဆိုတဲ့ လုပ်ခလစာပေးရေး အခက်အခဲရှိကြောင်း ပြောပါတယ်။
အလားတူ အလုပ်သမား ကိုယ်စားလှယ်တွေကလည်း အနိမ့်ဆုံးလုပ်ခလစာငွေ သတ်မှတ်ပေးရေးနဲ့ အလုပ်ရှင်တွေက ဥပဒေတွေ မလိုက်နာရင် ထိုက်သင့်တဲ့ထောင်ဒဏ် အပြစ်ဒဏ်တွေကို နည်းဥပဒေမှာ ထည်းသွင်းရေးဆွဲရေး တောင်းဆိုခဲ့ကြပါတယ်။
RFA Burmese
https://www.facebook.com/pages/RFA-Burmese/39218993127
အနိမ့်ဆုံးလစာငွေ သတ်မှတ်ရေး အကောင်အထည်ဖော်ပေးဖို့ သူရဦးရွှေမန်း ပြောကြား
Reviewed by သစ်ထူးလွင်
on
01:41
Rating: