ရေကြီး ပျက်ဆီးမှုများကြောင့် စာသင်ရန်အခက်ခဲကြုံ

ပြီးခဲ့သည့် သြဂုတ်လ ၂၆ ရက်နေ့ ကရင်နီအမှတ် ၁ ဒုက္ခသည်စခန်းတွင်း မိုးရေကြီးမှုကြောင့် စခန်းတွင်းရှိ ဆယ်တန်းလွန်ကျောင်း တကျောင်းဖြစ်သည့် SDC (Social Development Center) ကျောင်း၏ စာသင်ဆောင် မျောပါပျက်ဆီးသွားပြီး စာသင်ရန် အခက်ခဲကြုံနေရသည်ဟု SDC ဒုတာဝန်ခံ ပြောသည်။

တာဝန်ခံ ဆရာ မြာရယ်က “ကျနော်တို့ ဒီလိုမျိုးကြုံနေရတာ အရင်ကတော့ ဒီလောက်ထိ အခြေအနမဆိုးဘူးပေါ့ အခုက တအားဆိုးနေတဲ့ အခြေနေမျိုးဖြစ်သွားတော့ ကျနော်တို့ အစီစဉ်လေး တော်တော်ပျက်တာပေါ့လေ။ ကျနော်တို့ စာသင်ဖို့ အများကြီး နောက်ကျသွားတာပေါ့နော်။ ကျနော်တို့ Plan ထားတဲ့ဟာနဲ့ နောက်ကျသွားတာပေါ့လေ။ နှောက်နှေးစေတာတော့ အမှန်ပဲ” ဟု ပြောသည်။

လက်ရှိတွင် အရေးပေါ် စာပြန်လည်သင်ကြားနိုင်ရေးအတွက် ကျောင်းဆောင်သစ် တဆောင်လိုအပ်နေပြီး အဆိုပါ ကျောင်းဆောင်သစ်အား ပြန်လည်ဆောက်လုပ်ပေးရန် ကုန်ကျစရိတ်ကို ပြုစုပြီး စခန်းကော်မတီသို့ တင်ပြနေကြောင်းသိရသည်။

ဆုံးရှုံးသွားသည့် ကျောင်းဆောင်သစ်အားပြန်လည် ဆောက်လုပ်ပေးမည့် ကိစ္စနှင့် ပါတ်သက်ပြီး စခန်းကော်မတီ ဒုဥက္ကဌ မခူဖေါ က “ပျက်သွားတဲ့ကျောင်းက ဆုံးရှုံးသွားတဲ့ပစ္စည်းတွေကို ပြန်ရဖို့အတွက် ကျမတို့ စခန်းကော်မတီမှာ အင်အားမရှိဘူးပေါ့နော်။ ကျမတို့စခန်းကော်မတီအနေနဲ့ NGOs တွေကို ဖိအားပေးပေးမယ်။ စရင်းစယားတွေကို ပြုစုပြီးတော့မှ စခန်းကော်မတီကို တင်ပေးပါလို့ ပြောထားပါတယ်”ဟု ပြောသည်။

၎င်းမိုးရေကြီးမှုကြောင့် SDC ကျောင်း၏ စာသင်ဆောင်များနှင့် ကျောင်းသားအိပ်ဆောင်များ ပျက်ဆီးခဲ့ရပြီး ကျောင်းသား၊ ကျောင်းသူ အချို့မှာလည်း စိတ်ပိုင်းဆိုင်ရာထိခိုက်မှုများလည်း ရှိကြောင်း ဒုတာဝန်ခံကဆိုသည်။

“ကျနော်တို့ ကျောင်းမရှိတော့ဘူး စာသင်ဖို့က ခက်သွားပြီ။ ကျနော့်အတွက်ကတော့ စာကို ဆက်သင်ချင်နေသေးတယ်” ဟု SDCကျောင်းသား နဲ့ရယ်က ဆိုသည်။

SDC ကျောင်းသည် ယခုနှစ်အတွင်း ကျောင်းသား၊ ကျောင်းသူ ၅၀ဦးကို လက်ခံထားရှိကြောင်း သိရသည်။ မိုးရေးကြီးမှုကြောင့် စာသင်ဆောင်တလုံး အပြင် ကျောင်းသုံးပစ္စည်းများဖြစ်သည့် ထိုင်ခုံ ၇၈လုံး၊ စားပွဲ ၂၆လုံး၊ ပရိုဂျင်တာ၊ တီဗီ၊ စလောင်း၊ အောက်စက်၊ ဗီဒိုသုံးလုံးနဲ့ စာရွက်စာတမ်းများ ပါသွားကြောင်း ဒုတာဝန်ခံက ဆိုသည်။

“တခြားနေရာကို သွားလုပ်ချင်တယ်။ လုံခြုံတဲ့နေရာမှာနေချင်တယ် ဒါပေမယ့် နေရာတွေကရှားသွားပြီလေ။ ဆုံးရှုံးသွားတဲ့ ပစ္စည်းကိုလည်း အရမ်းနှမြောတယ်။ ကျောင်းကိုမြန်မြန်ပြီးစေချင်ပြီးတော့ စာကို မြန်မြန်ပြန်သင်ချင်တယ်” ဟု ကျောင်းသား နဲ့ရယ်က ဆက်ပြောသည်။

သြဂုတ်လ ၂၆ ရက်နေ့ည ကရင်နီအမှတ် ၁ ဒုက္ခသည်စခန်းတွင်း တောင်ကျချောင်းရေကြီးမှုကြောင့် နေအိမ် ၁၅၄လုံး ထိခိုက်ပျက်စီးသွားကြောင်း စခန်းကော်မတီမှ သိရသည်။

Written by စူးမယ်
Kantarawaddy Times
http://www.ktimes.org/index.php/news/1026-2014-09-01-06-08-37