မန္တလေးမြို့ ချမ်းမြသာစည်မြို့နယ် မြရည်နန္ဒာရပ်ကွက်သစ် အကွက်အမှတ်(၅၃၇)ပေါ်တွင် ကျူးကျော်အဖြစ်နေထိုင် သူများအား အောင်ပင်လယ်ရဲစခန်းမှ ဖယ်ရှင်းရာ၌ အင်အားသုံး အကြမ်းဖက်ဖြိုခွင်းမှုများပြုလုပ်ခဲ့ကြောင်း တွေ့ရှိရသည်။
ထိုသို့ဖယ်ရှားရာတွင် ရိုက်နှက်မှုများ ထိုးကြိတ်မှုများနှင့်ကိုယ်ဝန်ဆောင်မိခင်များအား ခြေထောက်ဖြင့်ကန်ကျောက်မှုများ ပြုလုပ်ခဲ့ကြောင်း ကာယကံရှင်များက ပြောကြားခဲ့သည်။
“ ဗိုက်ကြီးသည်တွေပါမချန်ဘူး ၊ အကုန်လုံးအကန်ခံရတယ် ၊ ယောင်္ကျားတွေဆိုပိုဆိုးတယ်” ဟု ကျူးကျော်အဖြစ်နေထိုင်သူ အမျိုးသမီးက ၎င်းမြင်တွေ့ပုံကို ပြောပြသည်။
ထိုသို့ လာရောက်ဖြေရှင်းမှုတွင် ကျူးကျော်အဖြစ်နေထိုင်သော ကွင်းအတွင်း ရဲအင်အား(၇၀) ၀န်းကျင်က လာရောက်ခဲ့ခြင်းဖြစ်ပြီး ကွင်းအပြင်ဘက်တွင် ချထားသော လုံခြုံရေးရဲတပ်သားများနှင့် ဆိုပါက ရဲဝန်ထမ်းအင်အား (၂၀၀)ခန့်သုံးစွဲပြီးဖြိုခွင်းခဲ့ခြင်းဖြစ်သည်။
‘’အင်အား (၇၀)လောက်ရှိတယ် ၊ သေနတ်တွေရော ဒိုင်းတွေရော ၊ အောင်ပင်လယ်စခန်း စခန်းမှုးလည်းပါတယ်’’ဟု ၎င်းက ဆက်လက်ပြောကြားသည်။
ထိုကဲ့သို့ဖြိုခွင်းမှုကြောင့် ထိခိုက်ဒဏ်ရာရရှိမှုများရှိခဲ့ပြီး နားရွက်ပြတ်သည်အထိ ဒဏ်ရာရရှိသွားသော သူလည်း ရှိခဲ့ကြောင်းနှင့် နှလုံးရောဂါရှိသူဟုသိရပြီး အသက်ထွက်မတတ် သတိလစ်နေသောအမျိုးသမီးတစ်ဦးကိုမှု မန္တလေးမြို့ပေါ်ရှိ လူမှုကူညီရေးအသင်းတစ်သင်းမှ လူနာတင်ယဉ်ဖြင့် လာရောက်ခေါ်ဆောင်သွားခဲ့သည်။
သြဂုတ်လ(၂၁)ရက်နေ့ နံနက် ရှစ်နာရီခွဲတွင် နယ်မြေခံရဲတပ်ဖွဲ့မှ ရောက်ရှိလာပြီး ကျူးကျော်နေထိုင် သူများအား စတင်ဖြိုခွင်း ရှင်းလင်းခဲ့ခြင်းဖြစ်သည်။ အောင်ပင်လယ်ရဲစခန်းအား ဆက်သွယ်မေးမြန်းရာတွင် မန္တလေးအခြေစိုက် သတင်းမီဒီယာများအားပြန်လည်ဖြေကြားခဲ့ခြင်းမရှိပေ။
အဆိုပါ အကွက်အမှတ် (၅၃၇)တွင် နေထိုင်နေသည့် အိမ်ခြေမဲ့ပြည်သူများအား ဦးဝင်းမြင့်ထွန်းမှ နေစရာ ကူညီမှုများပေးနေကြောင်းသိရှိရပြီး ယခုနောက်ဆုံးအချိန်အထိ တဲအိမ်များအရောက် ရေစံနစ်နှင့် မီးစံနစ်ကိုလည်း စီစဉ်ပေးထားကြောင်းနှင့် နေ့စဉ်ချက်ပြုတ် ကျွေးမွေးမှုများလည်း ရှိကြောင်း သိရှိရသည်။
ထိုကဲ့သို့ ကူညီထောက်ပံမှုများပြုလုပ်ရန်အတွက် ၎င်းအား ငွေကြေးထောက်ပံ့ပေးသောအလှူရှင်များလည်းရှိကြောင်း သိရပြီး ထိုအလှူရှင်များ၏ အမည်နာမများကိုမှု ထုတ်ဖေါ်ပြောကြားရန်အတွက် ဦးဝင်းမြင့်ထွန်းက ငြင်းဆိုခဲ့သည်။
မြရည်နန္ဒာရပ်ကွက် ကွင်းအမှတ် (၅၃၇)တွင် ကျူးကျော်အဖြစ်နေထိုင်နေသူအိမ်ခြေ(၅၀၀)ရာရှိကြောင်း သိရှိရသည်။
အဆိုပါ ကွင်းအမှတ်(၅၀၃)သည် ကေအိုင်အိုငြိမ်းချမ်းရေးအဖွဲ့မှပိုင်ဆိုင်ကြောင်းသိရပြီးအဖွဲ့ရန်ပုံငွေရရှိရန် အဆို ပါမြေကွက်အား အကွက်ချ၍ ပြန်လည်ရောင်းချပေးမှု များလည်း ရှိကြောင်းသိရှိရသည်။
အဆိုပါ ကေအိုင်အို ငြိမ်းချမ်းရေးအဖွဲ့မှ ၎င်းတို့ပိုင် မြေကွက်များပေါ်တွင် ယခုလို မတရားကျူးကျော် အဖြစ် လာရောက်နေထိုင်နေကြခြင်းကို လက်မခံကြောင်းနှင့် ထိုမြေကွက်သည် အဖွဲ့ပိုင်မြေကွက် ဖြစ်ကြောင်း မန္တလေးအခြေစိုက်သတင်းသမားများနှင့်တွေ့ဆုံကာ ကေအိုင်အိုမှဗိုလ်မှူးညွန့်စိန်မှ ရှင်းလင်းပြောကြားခဲ့သည်။
ကေအိုင်အိုမှ ဗိုလ်မှူးညွန့်စိန်၏ ဇနီးဖြစ်သူ ဒေါ်နန်းမြသစ်မှာ ပြည်ထောင်စုမြန်မာနိုင်ငံ၏ ဒုသမ္မတ ဖြစ်သူ ဒေါက်တာစိုင်းမောက်ခမ်း၏ တူမဖြစ်သည်။
“မန္တလေးက တာဝန်ရှိတဲ့သူအတွေနဲ့ ဒီကျူးကျော်ကိစ္စကို အမြန်ဆုံးဖြေရှင်းပေးစေချင်တယ်။ မရဘူး ဆိုရင်တော့ ကျမက ကျွန်မ ဦးကြီးကို အကြောင်းကြားသင့် ကြားရမယ် ´´ ဟု ပြီးခဲ့သည့်ရက်က အိုရီယန်တယ် ခန်းမတွင် ပြုလုပ်သော သတင်းစာရှင်းလင်းပွဲတွင် ဒေါ်နန်းမြသစ်က ပြောကြားခဲ့သည်။
မြရည်နန္ဒာအကွက်အမှတ် ( ၅၃၇ )တွင် လာရောက်နေထိုင်နေကြသူများသည် ပခုက္ကူ ၊စဥ့်ကိုင် ၊ ကျောက်ဆည် မြို့များမှ လူများ ပါဝင်သလို မန္တလေးဝန်းကျင်ရပ်ကွက် များဖြစ်သော သမန်းကုန်း ၊ ဧရာထွန်း ၊ ထွန်တုံးနှင့် ရွှေကျက်ယက်မှ သူများနေထိုင်မှုများကြောင်းသိရသည်။
ထိုကဲ့သို့နေထိုင်နေကြသောသူများမှာ ၎င်းတို့အနေဖြင့် နေရာပေါင်းစုံမှ ဖယ်ရှားခြင်းခံရပြီး ယခုနေရာသို့ ရောက်ရှိလာကြောင်းသိရကာ ၊ သက်ဆိုင်ရာမှ နေစရာနေရာတစ်ခုကို စီစဉ်ပေးမည် ဆိုပါက ပြောင်းရွှေ့ပေးရန် ဆန္ဒရှိကြောင်း မြစ်မခသို့ ပြောကြားခဲ့သည်။
“အမတို့ အရင်တာဝါတိုင်အောက်မှာနေတာ၊ အဲဒီမှာကိုက (၈)နှစ် အဲဒီကနေ တာဝါတိုင်ကြိုးနဲ့ မလွတ်ဘူး ရွှေ့ဆိုလို့ ရွှေ့ကြရင်း ရွှေ့ကြရင်း ဒီကိုရောက်လာတာ ၊ အစကတော့ လူနည်းစုပေါ့ ၊ အရင်က ဒီနေရာက သင်္ချိုင်းမြေနေရာဟောင်းလေ ၊ ဒီမှာမှမနေရရင် အမတို့ နေစရာမရှိတော့ဘူး”ဟုကျူးကျော်နေထိုင်သူ အမျိုးသမီးတစ်ဦးက ဆိုသည်။
အဆိုပါ ကျူးကျော်နေထိုင်သူ လူ၂၀၀၀ ၀န်းကျင်မှာ ၁၅ ဧက ခန့်ကျယ်ဝန်းသော မန္တလေးမြို့ ချမ်းမြသာ စည်မြို့နယ် မြရည်နန္ဒာ ရပ်ကွက် ကွင်းအမှတ် (၅၃၇) မြေနေရာတွင် လာရောက်စုစည်းနေထိုင်ခြင်း ဖြစ်သည်။
မင်းမင်းလတ်-မန္တလေး(မြစ်မခ)
by Shwe Myitmakha Media Group
