“အိမ်ငှားစာချုပ်ပြည့်ကာနီး နှစ်လသုံးလအလိုလောက် ရောက်လာရင် ရင်တွေပူလာတော့တာပါပဲ။ တရိပ်ရိပ်တက်လာနေတဲ့ အိမ်ငှားခ တွေရဲ့ဒဏ်ကို ခံလာရတာ ဆယ်စုနှစ်နှစ်ခုကျော်လာပြီလေ။ ဒီနှစ်အိမ်ငှားခတွေ စုံစမ်းလိုက်တော့ ကျမ ခေါင်းနပန်းတွေကြီး သထက် ကြီးလာရပြန်တာပါပဲ ” လို့ ပြောလာသူကတော့ နှစ်ပေါင်း ၄၀ ဆယ်ကျော် အိမ်ငှားဘ၀နဲ့ နေလာရသူ သင်္ကန်းကျွန်းမြို့နယ်မှ ဒေါ်တင်နွဲ့ပါ။
အိမ်ပိုင်ဘ၀နဲ့နေထိုင်ခွင့် မရှိခဲ့ဖူးတဲ့ သူ့အဖို့ ဒီနှစ် အိမ်ငှားတဲ့အခါမှာ အရင်နှစ်တွေကထက် သိသိသာသာ ခက်ခဲနေရတယ်လို့ ပြောပါတယ်။ မိသားစုဝင် မများပေမယ့် အလွတ်သင် ဆရာမ အလုပ်နဲ့အသက်မွေး ၀မ်းကျောင်းရတဲ့ သူမအဖို့လွန်ခဲ့တဲ့နှစ်တွေက သင့်သင့်တင့်တင့် လုံးချင်းအိမ်မျိုးကိုသာ ရွေးချယ်ငှားရမ်းခဲ့ပါတယ်။ ဒါပေမယ့် ဒီနှစ်အိမ်ငှားခတွေကို ကြားရတဲ့အခါ လုံးချင်းအိမ်ကလေးတစ်လုံး ငှားနိုင်ပါ့မလားဆိုတာ မသေချာတော့ပါဘူးလို့ ဆိုပါတယ်။
“ကျမတို့က အခုလာမယ့် (၁၂) လပိုင်း အကုန်မှာ အိမ်ပြောင်းရတော့မယ်။ (၉) လပိုင်းအစလောက် ကတည်းက အိမ်ရှာနေ တာ အခုအထိမရသေးဘူး။ အိမ်ဈေးတွေက မကြုံစဘူး မြင့်တက်နေတော့ ရင်တမမနဲ့ချိန်ဆနေရတယ်။ ဒီနှစ်မှာ လုံးချင်းရဖို့ဆိုတာ တကယ်ကို မလွယ်တော့ဘူး။ ” ။
သင်္ကန်းကျွန်းလို ဆင်ခြေဖုန်းရပ်ကွက်မှာ အရင်နှစ်က တစ်လကို အိမ်ငှားခ ရှစ်သောင်းတန် အိမ်တစ်လုံးဟာ ဒီနှစ်မှာ တစ်သိန်း နှစ်သောင်းမှ တစ်သိန်းခွဲဝန်းကျင်အထိ မြင့်တက်သွားတယ်လို့ ဆိုပါတယ်။
အထွေထွေကုန်ကျစရိတ် များပြားပြီး ၀င်ငွေနဲ့ထွက်ငွေ မမျှတဲ့ ယနေ့လို ကာလမှာ နေရေးအတွက် စိုးရိမ်သောက ရောက်နေရတာတွေဟာ မြင့်သထက်မြင့်လာပါတယ်လို့ ဆင်ခြေဖုန်းရပ်ကွက်တွေမှာ အိမ်ငှားနေသူများက ပြောပါတယ်။
“လခထုတ်ရင် အိမ်လခအတွက် အရင်ဆုံးဖယ်ရတယ်။ ကိုယ်စားတာကို လျှော့စားလို့ရပေမယ့် သူများအိမ် ငှားနေတာ ကျတော့ လခပုံမှန်ပေးမှ နေလို့ရတာလေ။ တက်နေတဲ့ဈေးနှုန်းအတိုင်း ပေးနိုင်အောင် တစ်လချင်း ခြစ်ချုပ်စုတာပဲ။ တစ်လုံးတည်း ပေးရအောင်လည်း ၀င်ငွေကမရှိဘူးလေ” လို့မင်္ဂလာဒုံမြို့နယ်မှ အိမ်ငှားတစ်ဦးက ဆိုပါတယ်။
တခါတရံမှာ သာရေးနာရေးနဲ့ ကျန်းမာရေးကိစ္စတွေ ကြုံလာပြီး အိမ်လခအတွက် စုထားတဲ့ငွေထဲက ထုတ်သုံးမိတဲ့ အခါမျိုးမှာတော့ တခြားလက်လှမ်းမီသူများထံကနေ အတိုးနဲ့ ငွေချေးငှားရမ်းတာတွေ လုပ်ရပါတယ်လို့ ၎င်းက ဆက်လက်ပြောပါတယ်။
အိမ်ငှားရမ်းနေထိုင်သူ အများစုကတော့ ၄င်းတို့ဝင်ငွေရဲ့ ၂၀ရာခိုင်နှုန်းမှ ၄၀ရာခိုင်နှုန်းခန့်ဟာ အိမ်ငှားခအဖြစ် သုံးစွဲရတယ်လို့ ပြောကြပါတယ်။ ယခုလက်ရှိအချိန်မှာ အိမ်ခြံမြေဈေးတွေ တက်လာပြီးနောက် အိမ်ငှားရမ်းခတွေပါ လိုက်တက်လာပေမယ့် လခစားအလုပ်သမား တွေ ရဲ့ တစ်ဦးချင်း ၀င်ငွေကတော့ သိသိသာသာ တက်မလာလို့ စားဝတ်နေရေး အခြေအနေက ကြပ်သထက် ကြပ်လာတယ်လို့ ပြောဆိုကြပါတယ်။
အခုလို အိမ်ငှားရမ်းခတွေ မြင့်တက်လာရခြင်းဟာ အိမ်ဈေးမြေဈေးတွေ အရောင်းအ၀ယ် ကောင်းလာတာနဲ့ အဓိက ဆက်စပ်နေပါ တယ်။ စီးပွားရေးဖွံ့ဖြိုးလာနိုင်မယ် အလားအလာ၊ နိုင်ငံခြားနဲ့ဖက်စပ် အိမ်ယာစီမံကိန်းတွေ စတင်တော့မယ်ဆိုတဲ့သတင်း၊ အစိုးရက နိုင်ငံခြားသားတွေ အနေနဲ့ ပုဂ္ဂလိကထံမှလည်း အိမ်ခြံမြေ နှစ်ရှည်ငှားရမ်းလုပ်ကိုင်ခွင့် ပေးတယ် ဆိုတဲ့ သတင်းတွေ အပြင် အိမ်နီးချင်းတိုင်းပြည်တွေကနေ ရင်းနှီးမြုပ်နှံမှုတွေစတင်တော့မယ် သတင်းတွေကြောင့် အိမ်ဈေးမြေဈေးတွေ ဒီနှစ် နှစ်လယ်ပိုင်းမှာ သိသိသာသာ မြင့်တက်လာရတယ်လို့ အိမ်ခြံမြေ အကျိုးဆောင်တွေက ပြောပါတယ်။
ရန်ကုန်မြို့လယ် ရဲ့ အိမ်ငှားခဟာ လွန်ခဲ့တဲ့ ၁၁ နှစ်အတွင်း ၆ ဆလောက်အထိ မြင့်တက်သွားတယ်လို့ ပထမထပ်မှာ ငှားနေသူတဦးက သူ့အတွေ့အကြုံအရ ပြောပါတယ်။
ရန်ကုန်မြို့လယ်ရှိ တန်ဖိုးကြီး တိုက်ခန်းစီမံကိန်း တခုဘယ်နေရာမှာ ဘာကြောင့်တက်
အခုလို အိမ်ငှားခတွေမြင့်တက်လာရာမှာ ရန်ကုန်မြို့လယ်ထက် ဆင်ခြေဖုန်း ရပ်ကွက်တွေမှာ မြင့် တက်မှုနှုန်းက ပိုများတယ်လို့ အိမ်ခြံမြေ အကျိုးဆောင်တွေက ပြောကြပါတယ်။ ရန်ကုန်မြို့ရဲ့ အချက်အချာကျတဲ့ နေရာတွေမှာ အိမ်ငှားခတွေဟာ နှစ်စဉ်ငွေကြေးဖောင်းပွမှုတွေ ဖြစ်လေ့ရှိတတ်တဲ့ သဘောကြောင့် ၁၀ ရာခိုင်နှုန်းဝန်းကျင်သာ မြင့်တက်နေပေမယ့် မြို့နဲ့လှမ်းတဲ့ ဆင်ခြေဖုံးတွေမှာတော့ ၃၀ရာခိုင်နှုန်းဝန်းကျင် မြင့်တက်လာတယ်လို့လည်း သူတို့က ရှင်းပြပါတယ်။
“အခုဒီနှစ်လယ်ကနေ နှောင်းပိုင်းကြားမှာ အိမ်ခြံမြေဈေးတွေ မြင့်တက်လာတဲ့အတွက် အရောင်းအ၀ယ် တွေများလာသလို ဈေးကောင်းပေးဝယ်တာတွေလည်း အပြိုင်အဆိုင်ဖြစ်လာတယ်။ ဒီလိုအိမ်ခြံမြေ ဈေးတွေမြင့် လာတော့ ငါတို့အိမ်က ရောင်းရင် ဘယ်လောက်တောင် ဈေးရတယ် စသဖြင့် တွက်ပြီး အိမ်ငှားခတွေ တိုးတောင်းလာကြတယ်” လို့ မဏ္ဍိုင် အိမ်ခြံမြေ အကျိုးဆောင်လုပ်ငန်းမှ အုပ်ချုပ်မှု ဒါရိုက်တာ ဦးသန်းဦးကဆိုပါတယ်။
နောက်အကြောင်း တချက်ကတော့ ဈေးကွက်သဘောအရ ၀ယ်အားများလာတဲ့ အချက်ပါ။ နှစ်စဉ်မြင့်တက်နေတဲ့ လူဦးရေ၊ ရန်ကုန်မြို့မှာ သင်တန်းလာတက်ဖို့၊ အလုပ်လာလုပ်ဖို့ နိုင်ငံခြား ကုမ္ပဏီတွေရဲ့ ရုံးခွဲသစ်ဖွင့်ဖို့ စတဲ့အချက်တွေက ၀ယ်လိုအား တနည်း ငှားလိုအားများလာစေတယ်လို့ ၎င်းကပဲ ပြောပါတယ်။
“အခု ရန်ကုန်မြို့ရဲ့လူဦးရေတိုးနှုန်းကသာ မြင့်တက်လာပေမယ့်၊ အိမ်ရာသစ်တွေ တိုးချဲ့ဆောက်လုပ်တဲ့ နှုန်းက နိမ့်ကျလွန်းနေတယ်။ ဒါကြောင့် လိုချင်တဲ့သူနဲ့ ပေးနိုင်တဲ့ ပမာဏ ကွာဟနေတာကြောင့် အိမ်ငှားခတွေ မြင့်တက်လာတယ်” လို့လည်း ဦးသန်းဦးကပဲ ရှင်းပြပါတယ်။
ဆင်ခြေဖုန်းတွေမှာ အိမ်ငှားရမ်းမှုတွေ မြင့်တက်လာတာနဲ့ အတူ အိမ်ငှားရမ်းရာမှ ဆက်စပ်ပေးသူ တနည်း အရပ်ပွဲစားတွေကလည်း များလာပြီး ဆိုက်ကားဆရာ၊ လမ်းထိပ်က ကွမ်းယာသည်အထိ ငှားချင်သူနဲ့ ငှားလိုသူကို ဆက်သွယ်ပေးပြီး အရပ်ပွဲစား တပိုင်းဖြစ်လာတာတွေလည်း အများအပြား မြင်တွေ့လာရပါတယ်။
အိမ်ငှားပွဲစားတွေကြောင့် အိမ်ငှားခတက်လာရတာ တနေရာမှာ ကြာကြာနေချင်ပေမယ့်လည်း မနေနိုင်အောင် ဈေးပိုပေးတဲ့ အခြားတဦးကိုငှားဖို့ ပွဲစားတွေက ဆွယ်တဲ့အဖြစ်တွေ ကလည်း အိမ်ငှားဈေးကွက်ကို မတည်မငြိမ်ဖြစ်စေတယ်လို့ အချို့သော အိမ်ငှားတွေကပြောပါတယ်။
ဈေးကွက်သဘောအရ ၀ယ်ယူသူများတာ အဓိကလို့ ဆိုပေမယ့် ပွဲစားတွေဈေးကစားတာမျိုးတော့ မဖြစ်သင့်ဘူး။ ဒါကြောင့် ဆင်ခြေဖုံး ရပ်ကွက်တွေမှာ အိမ်ငှားရမ်းနေထိုင်သူတွေအတွက် အမှန်တကယ် စဉ်းစားပေးတဲ့ အကျိုးဆောင်သူများ ပေါ်ထွက်သင့်တယ် လို့ ယူနစ်တီ အိမ်ခြံမြေအကျိုးဆောင်လုပ်ငန်းမှ တာဝန်ရှိသူက ဆိုပါတယ်။
အိမ်ငှားတွေအတွက် ဘယ်သူက စဉ်းစားပေးမလဲ
လူဦးရေ ၆ ဒသမ ၉သန်းကျော် နေထိုင်တယ်ဆိုတဲ့ ရန်ကုန်မြို့မှာ တစ်နှစ်ကို အိမ်ရာလိုအပ်ချက် ယူနစ် ၂၀၀၀၀ ရှိပါတယ်လို့ မြန်မာနိုင်ငံ အင်ဂျင်နီယာဗိသုကာပညာရှင်အသင်းရဲ့ ထုတ်ပြန်ချက်အရ သိရပါတယ်။ အဲဒီလိုလိုအပ်ချက် ရှိနေပေမယ့် ယခုနှစ်ပိုင်းမှာ အိမ်ရာ စီမံကိန်းသစ် ဖော်ထုတ်မှုတွေ၊ အထပ်မြင့်ကွန်ဒိုတိုက်ခန်း တည်ဆောက်မှုတွေ မရှိသလောက်နည်းပါးပါတယ်လို့ အိမ်ခြံမြေ အကျိုးဆောင် လုပ်ငန်းရှင်များက သုံးသပ်ဝေဖန်ကြပါတယ်။
‘အခြေခံလူတန်းစားတွေအများဆုံးနေထိုင်တဲ့ ဆင်ခြေဖုံးရပ်ကွက်တွေမှာ အိမ်ငှားခတွေ မြင့်တက်လာတာဟာ မဖြစ်သင့်ဘူး။ ရေရှည်မှာ ဒီလိုပဲဆက်ဖြစ်နေအုန်းမယ်ဆိုရင် လူမှုပဋိပက္ခတွေ ဖြစ်လာနိုင်သလို ဒုစရိုက်မှုလည်း များလာနိုင်တယ်” လို့ ဦးသန်းဦးကဆိုပါတယ်။
စီးပွားရေးပညာရှင်တစ်ဦးဖြစ်တဲ့ အငြိမ်းစားပါမောက္ခ ဒေါက်တာ ရီရီမြင့်ကတော့ အခုလို အခြေခံ လူတန်းစားတွေ နေထိုင်တဲ့ ရပ်ကွက်တွေမှာ အိမ်ငှားခမြင့်တက်လာနေတာဟာ ဈေးကွက်လှုပ်ရှားမှု သဘောအရ ဖြစ်ပေမယ့် အဆိုပါ ဖြစ်ရပ်တွေကို ထိန်းချုပ်ပေးဖို့ အစိုးရအနေနဲ့ ပေါ်လစီတစ်ရပ် ချမှတ်ပေးသင့်တယ်လို့ အကြံပြုပြောဆိုပါတယ်။
ဒါ့အပြင် နှစ်စဉ်မြို့သစ်တိုးချဲ့မှုစီမံကိန်းများကို ထည့်သွင်းစဉ်းစား အကောင်အထည် ဖော်ပေးသင့်သလို ပြည်သူလူထုတစ်ရပ်လုံး အိမ်ယာပိုင်ဆိုင်မှုအတွက်လည်း တန်ဖိုးနည်းအိမ်ယာဖန်တီးပေးမှုတွေ၊ ငွေချေးမှုတွေ၊ အရစ်ကျငွေပေးသွင်းပြီး အိမ်ယာဝယ်ယူမှုတွေလည်း လုပ်ဆောင်ပေးသင့်တယ်လို့ ထပ်မံပြောဆိုပါတယ်။
“ဒီပြသနာကို လက်ရှိအခြေအနေထက် ပိုကြီးမလာအောင် လူတွေ စားဝတ်နေရေး ကျပ်တည်း မသွားအောင် တာဝန်ရှိသူတွေ အနေနဲ့ စဉ်းစားပေးoသင့်တယ်။ ဒါ့အပြင် လူတစ်ဦး တစ်ယောက်ချင်းအနေနဲ့လည်း ကိုယ့်အိမ် နေရာ အတွက် လေးလေးနက်နက် စဉ်းစားရမှာဖြစ်ပါတယ်။ဈေးကြီးတဲ့နေရာမှာ အမြဲငှားနေမယ့်အစား ဈေးသက်သာ တဲ့နေရာမှာ ၀ယ်ယူထားတာမျိုးလုပ်ဖို့ စဉ်းစားသင့် ပါတယ်” လို့ ၄င်းက အကြံပြု ပြောဆိုပါတယ်။
အိမ်တစ်ခါပြောင်းတိုင်း အိမ်ငှားခအဆင်ပြေစေဖို့ စုရ ဆောင်းရ ချေးငှားရှာဖွေနေရတဲ့ ရန်ကုန်က အိမ်ငှားအချို့ဟာ ဘဏ်တွေက အ်ိမ်တွေ မြေတွေကို အရစ်ကျစနစ်နဲ့ ရောင်းချမယ်ဆိုတဲ့ အသံကြားနေရုံနဲ့တင် ကိုယ်ပိုင်အိမ်နဲ့ နေရမယ့် ဘ၀တွေကို စိတ်ကူးပုံဖော်ကြည့်ရင်း မျှော်လင့်ချက် အလင်းရောင်မြင်တွေ့လာနေသလိုပါပဲ၊ သို့ပေမယ့် ဒီမျှော်လင့်ချက်တွေ အကောင်အထည် ပေါ်မပေါ်တာကတော့ ယခုချိန်မှာ ရေရာတဲ့ အဖြေတစ်ခုမရသေးပါဘူး လို့ အိမ်ငှားတွေက ဆိုကြပါတယ်။
နိုဝင်ဘာ ၂၁၊ ၂၀၁၁ (YPI) ပိုင်ပိုင် ရေးသားသည်
မြို့ပြမှ နားခိုရာအိမ်
Reviewed by သစ်ထူးလွင်
on
12:17
Rating:
Reviewed by သစ်ထူးလွင်
on
12:17
Rating:
No comments:
Post a Comment